ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ރައްޔިތުންގެ މަޖިލީހުގެ މެންބަރުންގެ އަޑުއައްސަވާ ދެއްވަވާ ލަފާތައް ގަބޫލުކުރައްވާނެ ބޭފުޅެއް ކަމަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހިމް ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ މަޖިލީހުގެ މާލިއްޔަތު ކޮމެޓީގައި ވާހަކަފުޅު ދައްކަވަމުންނެވެ. ރާއްޖޭގެ އެންމެ ވަރުގަދަ ވިޔަފާރިވެރީންގެ ތެރޭގައި ހިމެނިވަޑައިގަންނަވާ ގާސިމް ވިދާޅުވި ގޮތުގައި ރައީސް މުއިއްޒުގެ މާލީ އިސްލާހުތަކަށް ފުރުސަތު ދޭން ޖެހެ އެވެ.
ރާއްޖެ މިއަދު އޮތް ހާލަތު ރައީސުލްޖުމްހޫރިއްޔާއަށް ސާފުކޮށް ކިޔައިދޭން ޖެހޭ ކަމަށާ އެއީ މެންބަރުންގެ ޒިންމާއެއް ކަމަށް ގާސިމް ވިދާޅުވި އެވެ. އަދި ވިދާޅުވީ ރައީސަށް އިތުބާރު ކުރައްވާ ކަމަށާ އެމަނިކުފާނަކީ މެންބަރުންގެ އަޑުއައްސަވާނެ ބޭފުޅެއް ކަމަށެވެ. މަޖިލީހުގެ މާލިއްޔަތު ކޮމެޓީއަށް ފެންނަ މާލީ އިސްލާހުތަކާ ގުޅޭ ލަފާ ރައީސަށް އަރުވަން ޖެހޭ ކަމަށް ވިދާޅުވެ އެ ލަފާތައް ރައީސް ގަބޫލުފުޅު ކުރައްވާނެ ކަމަށް ވެސް ގާސިމް ވިދާޅުވި އެވެ.
ގާސިމް ވިދާޅުވީ ދިވެހި އިގްތިސާދު މިއަދު އޮތީ ކުރީގެ ވެރީންނާއި ވާދައަށް ބޮޑެތި މަޝްރޫއުތައް ހިންގޭނެ ފަދަ ހާލަތެއްގައި ނޫން ކަމަށެވެ. އެ ހަގީގަތް ގަބޫލުކޮށް ސަރުކާރު ހިންގުމަށް ހަރުދަނާ މުހިންމު ބަދަލުތައް ގެންނަން ޖެހޭ ކަމަށް ވިދާޅުވި އެވެ.
ސަރުކާރު ކޯލިޝަންގައި ނުހިމެނުނަސް ސަރުކާރަށް ތާއީދު ކުރައްވާ ބޭފުޅެއްގެ ގޮތުގައި ހުންނެވި ގާސިމް ވަނީ އިގްތިސާދު ދުޅަހެޔޮ ކުރަން ވަރަށް ގިނަ ކަންކަން ބަދަލު ކުރަން ޖެހޭ ކަމަށް ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
