ރާއްޖެއިން ފަސް ގައުމަކަށް ކަނޑައެޅި ނޮން-ރެސިޑެންޓް ސަފީރުންނަށް ރައްޔިތުންގެ މަޖިލީހުން މިއަދު ރުހުންދީފި އެވެ.

މަޖިލީހުގެ މިއަދުގެ ޖަލްސާގައި ވަނީ ކެނެޑާ އާއި މިސްރާއި ބޫޓާނުގެ އިތުރުން ކުވެއިތާއި ސްވިސް ކޮންފެޑަރޭޝަނަށް ނޮން-ރެސިޑެންޓް ސަފީރުން އައްޔަން ކުރުމާމެދެ ކޮމިޓީން ނިންމި ގޮތިގެ ރިޕޯޓް އިއްވައި ވޯޓަށް އަހާފައެވެ. 

އެގޮތުން، ކެނެޑާގެ ނޮން-ރެސިޑެންޓް ސަފީރު ކަމަށް އައްޔަންކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުށަހެޅުއްވި، މިހާރު އެމެރިކާއަށް ރާއްޖެއިން ކަނޑައަޅުއްވާފައި ހުންނަވާ ސަފީރުގެ މަގާމުގައި ހުންނެވި އަބްދުލްގަފޫރު މުހައްމަދު، މއ. އަތަމާވިލާ މަގާމަށް އައްޔަންކުރަން ފާސްވީ ވޯޓު ދެއްވި 71 މެންބަރުންގެ އިއްތިފާގުންނެވެ.

Advertisement

މިސްރާއި ކުވެއިތަށް ރާއްޖެއިން ކަނޑައަޅާ ނޮން-ރެސިޑެންޓް ސަފީރު ކަމަށް އައްޔަންކުރަން ރައީސް މުއިއްޒު ހުށަހެޅުއްވި މިހާރު ސައުދީ އަރަބިއްޔާއަށް ރާއްޖެއިން ކަނޑައަޅުއްވާފައި ހުންނަވާ ސަފީރުގެ މަގާމުގައި ހުންނެވި އަހުމަދު ސަރީރު، މ. ވެސްޓްސައިޑް އަށް، މަގާމަށް އައްޔަންކުރަން ފާސްވީ ވޯޓު ދެއްވި 71 މެންބަރުންގެ އިއްތިފާގުންނެވެ.

އަދި ކުވެއިތުގެ ނޮން-ރެސިޑެންޓް ސަފީރު ކަމަށް އޭނާ އައްޔަންކުރަން ފާސްވީ ވޯޓު ދެއްވި 73 މެންބަރުންގެ އިއްތިފާގުންނެވެ.

މީގެ އިތުރުން، ބޫޓާނަށް ރާއްޖެއިން ކަނޑައަޅާ ނޮން-ރެސިޑެންޓް ސަފީރު ކަމަށް އައްޔަންކުރަން ރައީސް މުއިއްޒު ހުށަހެޅުއްވި މިހާރު ރާއްޖެއިން ބަންގްލަދޭޝަށް ކަނޑައަޅުއްވާފައި ހުންނަވާ ސަފީރު ސ. ހުޅުދޫ، އަސަރީގެ، ޝިއުނީން ރަޝީދު މަގާމަށް އައްޔަންކުރަން ފާސްވީ ވޯޓު ދެއްވި 72 މެންބަރުންގެ އިއްތިފާގުންނެވެ.

އަދި ސްވިސް ކޮންފެޑަރޭޝަނަށް ރާއްޖެއިން ކަނޑައަޅާ ނޮން-ރެސިޑެންޓް ސަފީރު ކަމަށް އައްޔަންކުރަން ރައީސް މުޢިއްޒު ހުށަހެޅުއްވި މިހާރު ޖެނީވާގައި ހުންނަ އެކުވެރި ދައުލަތްތަކުގެ މަރުކަޒުތަކަށް، ދިވެހިރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދު އައްޔަންކުރަން ފާސްވީ ވޯޓު ދެއްވި 74 މެންބަރުންގެ އިއްތިފާގުންނެވެ.