ބައިނަލްއަގުވާމީ އެޖެންސީތަކާއި އޯގަނައިޒޭޝަންތަކަަކަށް ރާއްޖެއިން ކަނޑައަޅަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުށަހެޅުއްވި މަންދޫބުންނަށް ރައްޔިތުންގެ މަޖިލީހުން މިއަދު ރުހުންދިފީ އެވެ.

މަޖިލީހުގެ މިއަދުގެ ޖަލްސާގައި ރައީސް ހުށަހެޅުއްވި ބޭފުޅުން އައްޔަނު ކުރުމަށް މަޖިލީހުގެ ރުހުން ހޯދުމަށް ވަނީ ވޯޓަށް އަހާފައެވެ: 

އެގޮތުން ރުހުންދިން ބޭފުޅުންނަކީ؛

• އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ) އަށް ރާއްޖެއިން ކަނޑައަޅާ ދާއިމީ މަންދޫބަކަށް އިނގިރޭސިވިލާތަަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު އިރުތިޝާމް އާދަމް. އައިއެމްއޯއަށް ރާއްޖެއިން ކަނޑައަޅާ މަންދޫބަކަށް އިރުތިޝާމް އައްޔަންކުރަން ފާސްވީ ވޯޓު ދެއްވި 73 މެންބަރުންގެ އިއްތިފާގުން.

• އިންޓަނޭޝަނަލް ރިނިއުބަލް އެނާޖީ އެޖެންސީއަށް ރާއްޖެއިން ކަނޑައަޅާ ސަފީރަކަށް ޔުނައިޓެޑް އަރަބް އެމިރޭޓްސް (ޔޫއޭއީ) އަށް ރާއްޖެއިން ކަނޑައަޅުއްވާފައި ހުންނަވާ ސަފީރު މުހައްމަދު ހުސައިން ޝަރީފު (މުންދު). މުންދު އައްޔަންކުރަން ފާސްވީވެސް ވޯޓު ދެއްވި 73 މެންބަރުންގެ އިއްތިފާގުން.

• ވޯލްޑް ޓްރޭޑް އޯގަނައިޒޭޝަން (ޑަބްލިއުޓީއޯ) އަށް ކަނޑައަޅާ ދާއިމީ މަންދޫބަކަށް އައްޔަންކުރަން ޖެނީވާގައި ހުންނަ އެކުވެރި ދައުލަތްތަކުގެ މަރުކަޒަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު، މ. ވިލާދަށުގެ، ޑރ. ސަލްމާ ރަޝީދު. ސަލްމާ އައްޔަންކުރަން ފާސްވީ ވޯޓު ދެއްވި 72 މެންބަރުންގެ އިއްތިފާގުން.

• އޯގަނައިޒޭޝަން އޮފް އިސްލާމިކް ކޯޕަރޭޝަނަށް ރާއްޖެއިން ކަނޑައަޅާ މަންދޫބުގެ މަގާމަށް ސައުދީ އަރަބިއްޔާއަށް ރާއްޖެއިން ކަނޑައަޅުއްވާފައި ހުންނަވާ ސަފީރު މ. ވެސްޓްސައިޑް އަހުމަދު ސަރީރު. ސަރީރު އެ މަގާމަށް އައްޔަންކުރަން ފާސްވީ ވޯޓު ދެއްވި 74 މެންބަރުންގެ އިއްތިފާގުން.