ސަރުކާރުގެ އިގުތިސޯދީ އިސްލާހީ އެޖެންޑާގެ ދަށުން، ރައްޔިތުންގެ މަޖިލީހާއި ޝަރުއީ ދާއިރާ އާއި މިނިވަން މުއައްސަސާތަކުގެ ވެރިންގެ މުސާރަަތައް ކުޑަކުރަން ސަރުކާރުން ހުށަހެޅި ގޮތަށް މުސާރަތައް ކުޑަކުރެވެން ނެތް ކަމަށް ރައީސް ޑރ. މުހައްމަދު މުއިއްޒަށް ލަފާއަރުވަން މާލިއްޔަތު ކޮމިޓީން މިއަދު ނިންމައިފި އެވެ.

ރައީސް ޑރ. މުހައްމަދު މުއިއްޒު ހުށަހަޅުއްވާފައިވާ އިގްތިސާދީ އިސްލާހުތަކުގެ ތެރޭގައި މުސާރައަށް ގެންނަން ނިންމެވި ބަދަލު ތަކަކީ:

• ސިޔާސީ މަގާމުތަކުގެ މުސާރައިން 10 އިންސައްތަ އުނިކުރުން

• ދައުލަތުގެ ވިޔަފާރި ކުންފުނިތަކުގެ (ބޭންކުތައް ފިޔަވައި) މުވައްޒަފުންގެ މުސާރައިން 10 އިންސައްތަ އުނިކޮށް، އެތަން ތަނުގެ އިސްވެރިންގެ މުސާރަ 90،000 ރުފިޔާގައި ހިފެހެއްޓުން

• މިނިވަން މުއައްސަސާތަކުގެ އިސްވެރިންގެ މުސާރައިން 10 އިންސައްތަ އުނިކުރުން

• ޝަރުޢީ ދާއިރާގެ އޮފިޝަލުންނާއި މަޖިލިސް މެންބަރުންގެ މުސާރައިން 10 އިންސައްތަ އުނިކުރުން

• ރައީސުލްޖުމްހޫރިއްޔާގެ އަމިއްލަ މުސާރަ 50 އިންސައްތައިން ދަށްކޮށް، 100،000 ރުފިޔާއިން 50،000 ރުފިޔާއަށް ކުޑަކުރުން

ނަމަވެސް މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި ފުނަދޫ ދާއިރާގެ މެންބަރު މުހައްމަދު މަމްދޫހް ވިދާޅުވީ، ގިނަ މުވައްސަސާތަކާއި މުސްތަގިއްލު މުވައްސަސާތަކުގެ އަސާސީ މުސާރައިން %10 މުސާރަ އުނި ކުރެވޭނީ ގެންނަން ޖެހޭ ބަދަލުތައް ގެނެސްގެން ކަމަށާއި، އެއް ގިންތިއެއްގެ މަގާމުތަކާއި މުސާރަތައް އެއް ހަމައެއްގައި ހިފެހެއްޓުމަކީ ކޮމެޓީގެ ޒިންމާއަކަށްވާއިރު، ގާނޫނުތަށް ބަދަލު ނުގެނެސް މުސާރަ އުނި ކުރުމަށް ކޮމެޓީން ނިންމުމަކީ އިންސާފުވެރި އަދުލުވެރި ގޮތެއް ނޫން ކަމަށް ފެންނަ ކަމަށެވެ.

"މަޖިލީސް މެންބަރުންނާއި، ޝަރުއީ ދާއިރާގެ އިސްވެރިންނާއި، މިނިވަން މުވައްްސަަސަތަކާއި، މުސްތަގިއްލު މަގާމުތަކާއި އަދި ރައްޔިތުން މަޖިިލީހުން ކަނޑައަޅަން ޖެހޭ އެހެނިހެން މަގާމުތަކުގެ އަސާސީ މުސާރައިން %10 އުނި ކުރަން މިވަގުތު ނުފެންނަ ކަމަށް ރައީސަށް ލަފާ ދިނުމަށް، އަދި މިނިވަން މުވައްސަސާތަކުގެ ތެރޭގައި އެމްއެމްސީ އެއްކޮށްލައިފިނަމަ، އެފިޝެންސީ އިތުރު ކުރެވި ހަރަދުތައް ބޮޑުތަނުން ކުޑަ ކުރެވޭނެ ކަމަށް ކޮމެޓީއަށް ފެންނަ ކަމަށް، އަދި މި މުވައްސަސާތަކުގެ އިތުރުން، އެއްކޮށްލައިގެން ސިނާޖީ ހާސިލް ކުރެވޭނެ އެހެނިހެން މުވައްސަސާތައް ދެނެގަނެ އެ މުވައްސަސާތައް އެއްކޮށްލުމަށް ގާނޫންތަކަށް ގެންނަންޖެހޭ ބަދަލުތައް އަވަސްކޮށް، އެ މަސައްކަތް ހަލުވި ދުވެއްޔެއްގައި ތަންފީޒުކުރެވިއްޖެ ނަމަ، ދައުލަތުގެ ޚަރަދު ކުޑަކުރުމުގެ ސިޔާސަތުގެ ދަށުން އެދެވޭ ހައްލެއް ނެރެވޭނެ ކަމަށް ކޮމިޓީއަށް ފެންނަ ކަމަށް ރައީސުލްޖުމްހޫރިއްޔާއަށް ލަފާދިނުމަށް.“ މަމްދޫހު ވިދާޅުވިއެވެ. 

މި ހުށަހެޅުން ފާސްވީ ކޮމިޓީ ބައްދަލުވުމުގައި ބައިވެރިވި މެންބަރުންގެ އިއްތިފާގުންނެވެ.