އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އާއި ރައްޔިތުންގެ މަޖްލިސް ގުޅިގެން މަޖިލީހުގެ މެމްބަރުންނަށް ޝަރީއާއާއި ގާނޫނީ ދާއިރާއިން ތަމްރީނު ޕްރޮގްރާމެއް ފަށައިފި އެވެ.
މި ޕްރޮގްރާމުގައި އެއް އަހަރު ދުވަހުގެ އެޑްވާންސް ސެޓްފިކެޓް އިން ޝަރީއަތް އެންޑް ލޯ ކޯހެއް ހިމެނެއެވެ. އަދި މަޖިލިސް މެންބަރުންނަށް ހާއްސަކޮށް ޝަރީއަތާއި ގާނޫނީ ދާއިރާއިން ބެޗްލަރސް ޑިގްރީ ޕްރޮގްރާމެއް އެކުލަވާލަމުންދާކަން ވެސް އައިޔޫއެމްއިން ވަނީ ބުނެފައެވެ.
އައިޔޫއެމްގެ އޮފިޝަލުންނާއެކު ބޭއްވި ބައްދަލުވުމެއްގައި ރައްޔިތުންގެ މަޖްލިސްގެ ރައީސް ޢަބްދުއްރަޙީމް ޢަބްދުالله ވިދާޅުވީ މި ޕްރޮގްރާމްގެ މައިގަނޑު މަގުސަދަކީ 20 ވަނަ ރައްޔިތުންގެ މަޖްލިސް, އިލްމީ މަސައްކަތްތަކުގައި ބައިވެރިވާ މަތީ ތައުލީމީ އަދި ފިކުރީ ގާބިލް މެންބަރުން ހިމެނޭ ނަމޫނާ މަޖިލީހަކަށް ބަދަލުކުރުން ކަމަށެވެ. މި ތަޞައްވުރަކީ 20 ވަނަ ރައްޔިތުންގެ މަޖިލީހަށް ރައީސް ޑރ. މުޙައްމަދު މުޢިއްޒުގެ އުންމީދުތަކާ އެއްގޮތްވާ ތަޞައްވުރެއްކަން މަޖިލީހުގެ ރައީސް ފާހަގަކުރެއްވިއެވެ.
މަޖިލީސް މެންބަރުންނަށް ތަމްރީން ދެއްވުމަށް އައިޔޫއެމްއަށް ލިބުނު ފުރުސަތަށްޓަކައި ޔުނިވާސިޓީގެ އެކްޓިން ޑެޕިއުޓީ ވައިސް ޗާންސެލަރ އޮފް އެޑްމިނިސްޓްރޭޝަން އެންޑް ފައިނޭންސް އަޙްމަދު އަމީން މުޙައްމަދު ވަނީ ޝުކުރު އަދާކުރައްވާފައެވެ. އޭނާ ވަނީ މި ކޯހަކީ މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) އާއި ބާ ކައުންސިލް އޮފް މޯލްޑިވްސް އިން ވެސް ކަނޑައަޅާފައިވާ މިންގަނޑުތަކަށް ފެތޭ ކޯހެއް ކަމުގެ ޔަގީންކަން ދެއްވާފަ އެވެ.
Advertisement
This content is created and paid for by advertisers and does not involve Voice Journalists
