ސަރުކާރުގެ އިގުތިސޯދީ އިސްލާހީ އެޖެންޑާގެ ދަށުން، މުސާރަތައް ކުޑަކުރަން ސަރުކާރުން ހުށަހެޅި ގޮތަށް މިވަގުތު ކުޑަކުރެވެން ނެތް ކަމަށް ރައީސް ޑރ. މުހައްމަދު މުއިއްޒަށް ލަފާއަރުވަން މަޖިލީހުގެ މާލިއްޔަތު ކޮމިޓީން މިއަދު ނިންމައިފި އެވެ.

ރައީސް ޑރ. މުހައްމަދު މުއިއްޒު ހުށަހަޅުއްވާފައިވާ އިގްތިސާދީ އިސްލާހުތަކުގެ ތެރޭގައި މުސާރައަށް ގެންނަން ނިންމެވި ބަދަލު ތަކުގެ ތެރޭގައި ޝަރުޢީ ދާއިރާގެ އޮފިޝަލުންނާއި މަޖިލިސް މެންބަރުންގެ މުސާރައިން 10 އިންސައްތަ އުނިކުރުން ހިމެނެއެވެ. 

އޭގެ އިތުރުން، ސިޔާސީ މަގާމުތަކުގެ މުސާރައިން 10 އިންސައްތަ އުނިކުރުމާއި، ދައުލަތުގެ ވިޔަފާރި ކުންފުނިތަކުގެ (ބޭންކުތައް ފިޔަވައި) މުވައްޒަފުންގެ މުސާރައިން 10 އިންސައްތަ އުނިކޮށް، އެތަން ތަނުގެ އިސްވެރިންގެ މުސާރަ 90،000 ރުފިޔާގައި ހިފެހެއްޓުމާއި، މިނިވަން މުއައްސަސާތަކުގެ އިސްވެރިންގެ މުސާރައިން 10 އިންސައްތަ އުނިކުރުމާއި، ރައީސުލްޖުމްހޫރިއްޔާގެ އަމިއްލަ މުސާރަ 50 އިންސައްތައިން ދަށްކޮށް، 100،000 ރުފިޔާއިން 50،000 ރުފިޔާއަށް ކުޑަކުރުން ހިމެނެއެވެ. 

ނަމަވެސް މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި ފުނަދޫ ދާއިރާގެ މެންބަރު މުހައްމަދު މަމްދޫހް ވިދާޅުވީ، ގިނަ މުވައްސަސާތަކާއި މުސްތަގިއްލު މުވައްސަސާތަކުގެ އަސާސީ މުސާރައިން %10 މުސާރަ އުނި ކުރެވޭނީ ގެންނަން ޖެހޭ ބަދަލުތައް ގެނެސްގެން ކަމަށާއި، އެއް ގިންތިއެއްގެ މަގާމުތަކާއި މުސާރަތައް އެއް ހަމައެއްގައި ހިފެހެއްޓުމަކީ ކޮމެޓީގެ ޒިންމާއަކަށްވާއިރު، ގާނޫނުތަށް ބަދަލު ނުގެނެސް މުސާރަ އުނި ކުރުމަށް ކޮމެޓީން ނިންމުމަކީ އިންސާފުވެރި އަދުލުވެރި ގޮތެއް ނޫން ކަމަށް ފެންނަ ކަމަށެވެ.

މަމްދޫހުގެ މި ހުށަހެޅުމާއި ގުޅިގެން ވާހަކަދައްކަވަމުން ހުޅުމާލޭ ދެކުނު ދާއިރާގެ އެމްޑީޕީ މެންބަރު ޑރ. އަޙުމަދު ޝަމްހީދު ވެސް ވަނީ، މުސާރަތަކަށް ބަދަލު ގެނެވޭނީ ގާނޫނަށް ބަދަލު ގެނެސްގެން ކަމަށާ، ނުގެނެސް މިވަގުތު އެކަން ނުކުރެވޭނެ ކަމަށް ވިދާޅުވެފައެވެ. 

ޝަމްހީދުގެ ވާހަކައާއި ގުޅިގެން ކޮމިޓީ މުޤައްރިރު އަދި މާމިގިލީ ދައިރާގެ މެންބަރު ގާސިމް އިބްރާހީމް ވިދާޅުވީ، މުސާރަތައް ކުޑަކޮށް ދައުލަތުގެ ޚަރަދު ކުޑަކުރުމަށް ރައީސް މުޢިއްޒު ނިންމެވި ނިންމެވުމަކީ ރަނގަޅު ނިންމެވުމެއް ކަމަށެވެ. އެހެން ނަމަވެސް، ގާނޫނުތަކަށް ބަދަލު ނުގެނެސް އެކަން ކުރެވެން ނެތް ކަމަށެވެ. 

މިއަދުގެ ކޮމިޓީ ބައްދަލުވުނުގައި މަމްދޫހުވަނީ، މިނިވަން މުވައްސަސާތަކުގެ ތެރޭގައި ހިމެނޭ ބްރޯޑްކާސްޓިން ކޯޕަރޭޝަނާއި އެމްއެމްސީ އެއްކޮށްލައިފިނަމަ، އެފިޝެންސީ އިތުރު ކުރެވި ހަރަދުތައް ބޮޑުތަނުން ކުޑަ ކުރެވޭނެ ކަމަށް ކޮމެޓީއަށް ފެންނަ ކަމަށާ، އަދި މި މުވައްސަސާތަކުގެ އިތުރުން، އެއްކޮށްލައިގެން މަސައްކަތް ކުރެވޭނެ އެހެނިހެން މުވައްސަސާތައް ދެނެގަނެ އެ މުވައްސަސާތައް އެއްކޮށްލުމަށް ގާނޫންތަކަށް ގެންނަންޖެހޭ ބަދަލުތައް އަވަސްކޮށް، އެ މަސައްކަތް ހަލުވި ދުވެއްޔެއްގައި ތަންފީޒުކުރެވިއްޖެ ނަމަ، ދައުލަތުގެ ޚަރަދު ކުޑަކުރުމުގެ ސިޔާސަތުގެ ދަށުން އެދެވޭ ހައްލެއް ނެރެވޭނެ ކަމަށް ކޮމިޓީއަށް ފެންނަ ކަމަށް ރައީސުލްޖުމްހޫރިއްޔާއަށް ލަފާދިނުމަށް ވެސް  ހުށަހެޅުއްވާފައެވެ. 

މި ހުށަހެޅުންތައް ފާސްވީ ކޮމިޓީ ބައްދަލުވުމުގައި ބައިވެރިވި މެންބަރުންގެ އިއްތިފާގުންނެވެ.