ރާއްޖޭގައި ތަކެތީގެ އަގު ކުރިއަށް އޮތް ތަނުގައި މައްޗަށް ދާނެ ކަމުގެ އިންޒާރު، އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ދީފިއެވެ.
އައިއެމްއެފް އިން މިގޮތަށް ބުނީ މި ހިނގާ ފެބްރުއަރީ 3 އިން ފެބްރުއަރީ 16 އަށް އައިއެމްއެފްގެ ވަފްދެއް ރާއްޖެއަށް ކުރި ޒިޔާރަތަކަށްފަހު ނެރުނު ނޫސްބަޔާނެއްގައެވެ. މި ޒިޔާރަތަކީ އަހަރަކުު އެއް ފަހަރު ގައުމުތަކުގެ އިގްތިސާދީ ހާލަތު ވަޒަން ކުރުމަށް ކުރާ "އާޓިކަލް 4 މިޝަން" ގެ ދަށުން ކުރި ދަތުރެކެވެ.
މި ނޫސްބަޔާނުގައި އައިއެމްއެފް އިން ވަނީ މި އަހަރުގެ ތެރޭ ރާއްޖޭގެ އިންފްލޭޝަން 2.3 އިންސައްތައިން މަތިވާނެ ކަމަށް ލަފާކޮށްފައެވެ. އިންފްލޭޝަން މަތިވާނެ ކަމަށް ލަފާކުރެވެނީ އިމްޕޯޓް ޑިއުޓީ ބޮޑުވުމުން ކަމަށް އައިއެމްއެފް އިން ބުންޏެވެ.
ކަރަންޓް އެކައުންޓް ޑެފިސިޓް ބޮޑުވުމާއި ފޮރިން އެކްސްޗޭންޖް ރިޒާވަށް ނުރަނގަޅު އަސަރުކޮށްފައިވާކަން މި ބަޔާނުގައި ފާހަގަކޮށްފައި ވެއެވެ. ޖުމްލަ މާލީ ޑެފިސިޓްތަކާއި ދަރަނި މަތިވެފައި އޮންނާނެ ކަމަށް ލަފާކުރެވޭތީ، މާލީ ސިޔާސަތުތަކަށް އަވަސް ބަދަލުތަކެއް ގެނައުމަށް އައިއެމްއެފް އިން ގޮވާލާފައި ވެއެވެ.
މީގެ އިތުރަށްވެސް، އައިއެމްއެފް އިން ވަނީ މިއަހަރުގެ ބަޖެޓުގައި ބަޔާންކޮށްފައިވާ ގޮތަށް ހަރަދުތައް އިސްލާހުކުރުމުގެ ފިޔަވަޅުތައް އަވަހަށް ތަންފީޒުކުރުމަކީ ޑެފިސިޓް ކުޑަކުރުމާއި އިގްތިސާދީ ހަމަޖެހުން އަލުން ގާއިމްކުރުމަށް މުހިންމު ކަމެއްކަން ފާހަގަކޮށްފައެވެ.
ސަރުކާރުން ކޮންމެހެން ކުރަންޖެހޭ ހަރަދުތައް ފިޔަވައި އިތުރު ހަރަދުތައް ނުކުރުމަށްވެސް މި ބަޔާނުގައި ގޮވާލާފައި ވެއެވެ. އެއާއެކު، ދަރިނި ކުޑަކުރުމުގެ އިތުރުން އިސްރާފު ކުރުން ކުޑަކުރުމަށްވެސް އައިއެމްއެފް އިން ވަނީ ގޮވާލާފައެވެ.
ސަބްސިޑީތައް މަރުހަލާތަކަކަށް ބަހާލައިގެން، އެއަށް އެންމެ ބޮޑަށް ބޭނުންޖެހޭ ފަރާތްތަކަށް އަމާޒުކޮށްގެން ތައާރަފްކުރަން ޖެހޭ ކަމަށް އައިއެމްއެފްގެ ލަފާގައި މިފަހަރުވެސް ވަނީ ފާހަގަކޮށްފައެވެ. މީގެ އިތުރުން ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) މަޝްރޫއުތަކަށް އިސްކަންދޭ ތަރުތީބު ހަރުދަނާކުރުމަކީ މާލީ ގޮންޖެހުންތަކަށް ހައްލެއް ހޯދުމަށް ވަރަށް މުހިންމު ކަމެއްކަމަށްވެސް ވަނީ ބުނެފައެވެ.
މާލީ ނުތަނަވަސްކަމެއް އޮތްނަމަވެސް، ކުރިއަރަމުންދާ ފަތުރުވެރިކަމުގެ ސިނާއަތުގެ ސަަބަބުން ރާއްޖޭގެ އިގްތިސާދު މިއަހަރު 5 އިންސައްތައިން ކުރިއަރާނެ ކަމަށް އައިއެމްއެފް އިން ވަނީ ލަފާކޮށްފައެވެ.
Advertisement
This content is created and paid for by advertisers and does not involve Voice Journalists
