ދިވެހި ބަހުގެ އެކަޑަމީން އައު ދިވެހި ލަފުޒުތަކެއް އުފައްދާ އެ ލަފުޒުތައް އާންމުކުރުމާއެކު ބޮޑު ބަހުސެއް އުފެދިއްޖެ އެވެ.
އެކަޑަމީން އިއްޔެ ވަނީ އެ ލަފުޒުތަކާއި އެ ލަފުޒުތަކުގެ މާނަތައް އާންމުކޮށްފަ އެވެ. އެކަޑަމީން ބުނި ގޮތުގައި މިއީ މިދިޔަ އަހަރު އުފައްދާފައިވާ ބަސްތަކެވެ. އަދި އެ ލަފުޒުތަކާއި ލަފުޒުތަކުގެ މާނަތައް ފާސްކޮށްފައިވާ ކަމަށް ވެސް ބުންޏެވެ.
އަލަށް އުފެއްދި ބަސްތަކުގެ ތެރޭގައި ޅެންފަރުވާ އާއި ފަތުރުވެހި އަދި މޫތު ފަދަ ލަފުޒުތައް ހިމެނެ އެވެ. ޅެންފަރުވާ އަކީ ޕޮއިޓްރީ ތެރަޕީގެ ދިވެހި ލަފްޒެވެ. ފަތުރުވެހި މިއީ ގެސްޓްހައުސްގެ ދިވެހި ލަފްޒެވެ. މޫތު އަކީ ޔޫރިންގެ ދިވެހި ލަފްޒެވެ.
މި ބަސްތައް އާންމުުކުރުމާއެކު އާންމުންނާއި ބަސްވާރުންގެ މެދުގައި ވެސް ވަނީ ބޮޑު ބަހުސެއް އުފެދިފަ އެވެ. ބައެއް ބަސްވާރުން ވަނީ އަލަށް އުފެއްދި ބަސްތަކާމެދު ސުވާލު އުފައްދާފަ އެވެ. އަދި ބައެއް ބަސްތައް އުފެއްދިއިރު, އެ ބަސްބަހުގެ ބަދަލުގައި މިހާތަނަށް ބޭނުން ކުރަމުން ދިޔަ އެތައް ބަހެއް ހުރިކަން ފާހަގަ ކޮށްފައިވެ އެވެ.
އެންމެ ބަހުސް ބޮޑުވީ މޫތު އެއީ ޔޫރިންގެ ދިވެހި ލަފްޒު ކަމަށް ހަމަޖެއްސި ހަމަޖެއްސުމާ ގުޅިގެންނެވެ. ބައެއް ބަސްވާރުން ވަނީ ޔޫރިންއަށް ބޭނުން ކުރެވޭނެ ދިވެހި ތިން ހަތަރު ބަހެއް އޮތްއިރު ދިވެހި ދޫތަކަށް ފަސޭހައިން ނުވެސްކިޔޭ ޒާތުގެ ނަމެއް އިއުލާނުކުރުމުގެ ބޭނުމަކީ ކޮބައިތޯ ސުވާލު ކޮށްފަ އެވެ.
މީގެ އިތުރުން ބަސް ކޮމިޓީން އުފެއްދި ގިނަ ބަސްތަކަކީ ސާންސްކިރިތު ބަސްބަސްކަން ފާހަގަކޮށް މާވަރަކަށް ސާންސްކިރިތު ވެގެން އުޅުމުގެ ސިއްރެއް އޮންނާނެ ކަމަށް ބުނެފައިވެ އެވެ.
ކުރީއްސުރެ ހުރި ބަސްބަސް އެކަހެރިކޮށްފައި ސާންސްކިރިތު ރަދީފުން ލަފުޒުތައް ނަކަލުކޮށްގެން ގެނެސް ބަސްބަސް ހަދައިފީމޭ ބުނުމުގެ ފަހަތުގައި ސިއްރެއް އޮންނާނެ. ތިޔަގޮތަށް އަމަލުކުރާތީ ފެންނަނީ އިންޑިޔާގައި. ހިންދީބަހުގެ ތެރެއަށް ވަދެފައިހުރި އުރުދޫ ފާރިސީ ލަފުޒުތައް ހޮވައިގެން ނެރެ އެއްލައިލުމަށްފަހު މާއިހުގެ ސާންސްކިރިތު ރަދީފަކުން ބަސްބަސް ނެރެނީ އިންޑިޔާގެ ހިންދޫތަވާ ސިޔާސަތުގެ ދަށުން. އަހަރެމެންވެސް ތަބާވަނީ އެކަމަށް ހެއްޔެވެ
ބަހުގެ އިސް ބޭފުޅެއް ކަމަށްވާ އިމާދު ލަތީފް ލިޔުއްވާފައިވެ އެވެ.
އިމާދު ވިދާޅުވި ގޮތުގައި ދިވެހި ބަހާއި އަހަރެމެންގެ ސަގާފަތަކީވެސް އިންޑިއާގެ އެއްޗެކޭ ކިޔާ ދައުވާކުރާ ބަޔަކު ފާޅުކޮށް ފެންނާން ތިއްބައި ދިވެހީންގެ ބަޔަކު މިކުރާކަމަކީ އެމީހުންގެ ދައުވާޔަށް ބާރުލިބޭ ކަންކަން ކުރާ މަންޒަރެވެ.
Advertisement
This content is created and paid for by advertisers and does not involve Voice Journalists
