މި ރޯދަ މަހަށް ހާއްސަކޮށް ސަރުކާރުން ހަދިޔާ ކުރާ މަސްދަޅު ކޭސް ބެހުމުގެ މަސައްކަތް މާލެ ސަރަހައްދުގައި މާދަމާ ފަށާއިރު ފަސް ސަރަހައްދަކުން މަސްދަޅު ކޭސް ދޫކުރުން ކުރިއަށް ގެންދަން ނިންމައިފި އެވެ.

މާލެ ސަރަހައްދުގައި މަސްދަޅު ކޭސް ބެހުމުގެ މަސައްކަތް ކުރިއަށް ގެންދާނީ މާލެ ސިޓީ ކައުންސިލުންނެވެ.

މާލެ ސިޓީ ކައުންސިލުން މިއަދު ބުނީ މާދަމާ އިން ފެށިގެން މި މަހުގެ 28 ވަނަ ދުވަހުގެ ނިޔަލަށް މަސްދަޅު ކޭސް ދޫކުރުން ކުރިއަށް ގެންދާނެ ކަމަށެވެ.

Advertisement

މަސްދަޅު ކޭސް ދޫކުރުން ކުރިއަށް ގެންދާނީ ހުކުރުދުވަސް ފިޔަވާ ކޮންމެ ދުވަހެއްގެ މެންދުރުފަހު 2:30 އިން 6:00 އަށް ރޭގަނޑު 8:30 އިން 11:00 އަށެވެ. ފަސް ސަރަހައްދަކުން މަސްދަޅު ދޫކުރާނެ އެވެ.

އެއީ މާލޭ ސިޓީ ކައުންސިލް ތައިސޭކޮށި، އާންމު ހިދުމަތްތަކާބެހޭ ބައިންނާއި މާފަންނު މިފްކޯ ގޯތިތެރޭގައި އެކަމަށް ހާއްސަ ކޮށްފައިވާ ސަރަހައްދުންނާއި ހުޅުމާލެ ފޭސް އެކަކުން އުމަރުޒާހިރު ބިލްޑިން އަދި ފޭސް ދޭއްގައި ހިޔާ ޓަވާ 10ގެ ގްރައުންޑް ފްލޯއިންނެވެ. ވިލިމާލޭގައި މަސްދަޅު ކޭސް ދޫކުރުން އޮންނާނީ ވިލިމާލެ ސިޓީ ކައުންސިލު އޮފީހުންނެވެ.

ކައުންސިލުން ބުނީ މަސްދަޅު ކޭސް ބަލާ އަންނައިރު އެ ގޭބީސީއެއްގެ ކަރަންޓް ބިލްގެ އެންމެ ފަހު ތިން މަހުގެ ބިލްގެ ތެރެއިން ކަރަންޓް މީޓަރު އެނގޭނެ ފަދަ ލިޔުމެއް ގެންނަން ޖެހެ އެވެ. އަދި ބަލާ އަންނަ މީހެއްގެ އައިޑީކާޑު ބޭނުންވާނެ އެވެ. މަސްދަޅު ކޭސް ދޫކުރާނީ ހަމައެކަނި ދިވެހީންނަށެވެ.