އދ. މާމިގިލީގައި ޕޮލިސް ސްޓޭޝަނެއް އަޅުއްވަން ޖުމްހޫރީ ޕާޓީގެ ލީޑަރ ޤާސިމް އިބްރާހީމް ހުށަހަޅުއްވައިފިއެވެ.

ރައްޔިތުންގެ މަޖިލީހުގެ މާމިގިލި ދާއިރާގެ މެންބަރުކަން ކުރައްވަމުން ގެންދަވާ ޤާސިމް މިކަން ހުށަހަޅުއްވާފައިވަނީ އިއްޔެ ކޮމިޝަނަރ އޮޕް ޕޮލިސް ޢަލީ ޝުޖާއުއަށް ފޮނުއްވެވި ސިޓީއެއްގައެވެ.

އެ ސިޓީގައި ޤާސިމް ވިދާޅުވީ އޭނާ މާމިގިލީގައި ޕޮލިސް ސްޓޭޝަނެއް އަޅުއްވަން ރާވާފައިވަނީ ވިލާ ފައުންޑޭޝަންގެ ކޯޕަރޭޓް ސޯޝަލް ރެސްޕޮންސިބިލިޓީ އުސޫލުގެ ދަށުން ކަމަށެވެ. 

ޤާސިމްގެ ސިޓީގައި ވިދާޅުވީ މާމިގިލީއަކީ އާބާދީއާއި ބިމުގެ ސައިޒުން އެ ސަރަޙައްދުގެ އެންމެ ބޮޑު ރަށް ކަމަށާއި، އެއާޕޯޓާއި އަވަށްޓެރި ރިސޯޓްތަކުންވެސް ގިނަ ބަޔަކު ޒިޔާރަތްކުރާ ރަށެއް ކަމަށެވެ.

އޭނާ ފާހަގަކުރެއްވި ގޮތުގައި އދ. ގެ ރަށްރަށުގެ ތެރެއިން ކުށުގެ ނިސްބަތް އެންމެ ގިނައީވެސް މާމިގިލީގަ އެވެ. 

ޤާސިމް ވިދާޅުވީ މާމިގިލީގައި ސަރަހައްދީ ފެންވަރުގެ ޕޮލިސް ސްޓޭޝަނެއް އޮންނަން ޖެހޭކަމީ އަހަރުތަކެއް ވަންދެން ތަކުރާރުކޮށް މަޝްވަރާ ކުރަމުން އަންނަ ކަމެއް ކަމަށާއި، މިދިޔަ ފަސް އަހަރު ތެރޭގައި ދައުލަތުގެ ބަޖެޓްގައިވެސް އެ މަޝްރޫއު ހިމެނި ކަމަށެވެ.

ނަމަވެސް އެ މަޝްރޫއު ކުރިއަށްގެންދެވިފައިނުވާތީ މާމިގިލީގައި ފުލުހުންގެ ހިދުމަތް ދިނުމުގައި ދަތިތަކެއް ހުރިކަން ޤާސިމް ފާހަގަކުރެއްވިއެވެ. އެއާއެކު، ޤާސިމް ވަނީ މާމިގިލީގައި ޕޮލިސް ސްޓޭޝަނެއް ވިލާ ފައުންޑޭޝަނުން ގާއިމުކުރުމަށް ހުއްދަ ދެއްވުމަށް ސީޕީ ޝުޖާއު އަރިހުން އެދިވަޑައިގެންފައެވެ. 

ވިލާ ގްރޫޕްގެ ޗެއާމަން ޤާސިމަކީ މާމިގިލީގެ ރައްޔިތެކެވެ. ގިނަ ދުވަސްވަންދެން ޤާސިމް ވަނީ މާމިގިލި ދާއިރާގެ މެންބަރުކަން ކުރައްވާފައެވެ. މާމިގިލީ ރައްޔިތުންގެ ތަރައްގީއަށްޓަކައި ޤާސިމް ވަނީ ގިނަގުނަ މަސައްކަތްތަކެއް ކުރައްވާފައެވެ. އެގޮތުން، މީގެ ކުރިން ޤާސިމް ވަނީ އަމިއްލަ ހަރަދުގައި އެ ރަށުގައި އެއާޕޯޓެއްވެސް ގާއިމުކުރައްވާފައެވެ.