ކައުންސިލްތައް ބާރުވެރިކުރުވުމަށް ކުރަމުންދާ މަސައްކަތުގެ ތެރެއިން، މިހާރުވެސް 3 ކައުންސިލަކަށް 4 ފަޅުރަށް ދޫކުރެވިފައިވާ ކަމަށާ، އިތުރު، 5 ކައުންސިލަކުން 7 ފަޅުރަށް ހޯދަން އެދިފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ. 

ނިމިދިޔަ ޖަނަވަރީ މަހުގެ 27 ވަނަ ދުވަހު، ތިން ކައުންސިލަކަށް 4 ފަޅުރަށެއް ވަނީ ރަސްމީކޮށް ހަވާލު ކޮށްފައެވެ. 

* ދ.އަތޮޅު ކައުންސިލަށް ހަވާލުކޮށްފައިވަނީ ދ. މިނިމަސްގަލި އާއި ދ. ފެންފުށި

* ރ.އިނގުރައިދޫ ކައުންސިލަށް ހަވާލުކޮށްފައިވަނީ ރ.ނެޔޮ 

* ލ.މާވަށު ކައުންސިލާ ހަވާލުކޮށްފައިވަނީ ލ.ބޮޑުމާބުޅަލި

އެކަމާއި ގުޅިގެން، ސިޓީ ތަކާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވަޒީރު އާދަމް ޝަރީފް ވިދާޅުވީ، އޭގެ ފަހުންވެސް އިތުރުން 5 ކައުންސިލަކުން 7 ފަޅުރަށް ހޯދަން އެދިފައިވާ ކަމަށެވެ. އެގޮތުން އެދިފައިވާ ކައުންސިލް ތަކަކީ؛ 

• ހދ އަތޮޅު ކައުންސިލުން ހދ. ފަރިދޫ

• ރ ދުވާފަރު ކައުންސިލުން ރ. އިނބޫދޫ

• ފ އަތޮޅު ކައުންސިލުން ފ މަކުނުއެރި 

• ގދ ދެއްވަދޫ ކައުންސިލުން ގއ. ވިލިގަލާ

• ގދ. އަތޮޅު ކައުންސިލުން ގދ.މާނައިދޫ، ވާރެއަދޫ އަދި ލޮނުދޫ

ވަޒީރު ވިދާޅުވީ އެ ރަށްތަކަށް ފަޅުރަށްތައް ހަވާލުކުރުމަށް ކުރަންޖެހޭ މަސައްކަތްތައް މިހާރު ފެށިފައިވާ ކަމަށާ، އެކަމާ ގުޅިގެން ކައުންސިލް ތަކުން ހޯދަންޖެހޭ މައުލޫމާތުތައް ހޯދުމުގެ މަސައްކަތްވެސް ކުރިއަށްދާ ކަމަށެވެ.

ރައީސް ޑރ މުޙައްމަދު މުޢިއްޒުގެ 100 ދުވަހުގެ ވަޢުދުތަކުގެ ތެރޭގައި ހިމެނިގެން، ގަވާއިދަށް އިޞްލާޙު ގެނެވި، ފުރުސަތު ހުޅުވާލެވި، ކައުންސިލްތައް ބާރުވެރިކުރުވުމަށް މަސައްކަތްކުރެވި، ފުރުސަތު ފަހިކޮށްދެވިގެން، ކައުންސިލް ތަކަށް ރަށްތައް ދޫކުރެވޭއިރު، ރަށަށާއި އަތޮޅަށް ފައިދާވާގޮތަށް އެތަންތަނުގެ ބޭނުން ހިފުމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު ޢާދަމް ޝަރީފް ޢުމަރު ވަނީ މީގެ ކުރިން އެދިވަޑައިގެންފައެވެ.