އަންނަ އޭޕްރީލް މަހުގެ ފުރަތަމަ ހަފްތާ ތެރޭގައި ރާއްޖެއަށް ފުރަތަމަ ސޯލާ ފެރީ އެތެރެކުރާނެ ކަމަށް އިންޑިއާގެ ނަވަލްްޓް ކުންފުނިން ބުނެފިއެވެ.
އަވައްޓެރި އިންޑިއާގެ އީކޯ މެެރިން ޓެކް ކުންފުނި، ނަވަލްޓްއާ އާ ހަވާލާދީ ނިއު އިންޑިއަން އެކްސްޕްރެސް އިން ބުނީ، އެކުންފުނިން މިހާރު ދަނީ ރާއްޖޭގައި ބޭނުންކުރަން އުޅޭ ސޯލާ ފެރީ ބަނުމުގެ މަސައްކަތް ކުރަމުން ކަމަށެވެ. އަދި މިހާރު އެ މަސައްކަތް އޮތީ އެންމެ ފަހު މަރުހަލާގައި ކަމަށް ރިޕޯޓްކޮށްފައި ވެއެވެ. 

"އެޕޮލޯ" ގެ ނަމުން ނަންދީފައިވާ މި ފެރީއަކީ ކަނޑު ގަދަ ދުވަސްވަރުވެސް ރައްކާތެރިކަމާއިއެކީ ދަތުރުކުރުމުގެ ކުޅަދާނަކަން ލިބިގެންވާ ފެރީއެކެވެ. މި ފެރީގެ އަގެއްކަމަށް ރިޕޯތްކޮށްފައިވަނީ 5 ކްރޯޑް އިންޑިއާ ރުޕީސް ނުވަތަ ދިވެހި ފައިސާއިން ބަލާނަމަ 9.3 މިލިއަން ރުފިޔާ އެވެ.

ނިއު އިންޑިއަން އެކްސްޕްރެސްއަށް ދެއްވި ބަސްދީގަތުމެއްގައި ނަވަލްޓްގެ ސީއީއޯ ސަންޑިތު ތަންޑަޝެރީ ވިދާޅުވިގޮތުގައި މި އުޅަނދު އުފައްދަނީ ރާއްޖޭގެ ފިނޭންސް މިނިސްޓްރީގެ އޯޑަރަކަށް ކަމަށެވެ. މިއީ އެކުންފުނިން ޕެސެންޖާ ލައިނެއް އެކްސްޕޯޓްކުރާ ފުރަތަމަ ފަހަރުކަން އޭނާ ފާހަގަކުރެއްވިއެވެ. މިއަހަރުގެ މެދު ތެރޭގައި ދިވެހި ސަރުކާރުން މި އުޅަނދު ޕަބްލިކް ޓްރާންސްޕޯޓްގެ ގޮތުގައި އޮޕަރޭޓް ކުރަން ފަށާނެ ކަމަށް އޭނާ މައުލޫމާތު ވިދާޅުވިއެވެ.

މި އުޅަނދު ގަޑިއަކު 8 ނޮޓްގައި ދުވާއިރު، ހަކަތަ ބޭނުންކުރަނީ އުޅަނދުގެ ފުރާޅުގައި ބަހައްޓާފައި ހުންނަ 25 ކިލޯވޮޓްގެ ސޯލާ ޕެނަލްތަކުން ލިބޭ ހަކަތައިން ކަރަންޓް އުފައްދައިގެންނެވެ. 

މިދިޔަ އަހަރުގެ އޮކްޓޯބަރުމަހު ނޫސްވެރިންނާ ވާހަކަދައްކަވަމުން ތިމާވެއްޓާބެހޭ ވަޒީރު ތާރިޤް އިބްރާހީމް ވިދާޅުވީ އެއަހަރު ނިމުމުގެ ކުރިން ސޯލާ ފެރީ ރާއްޖެ ގެނެވޭވަރުވާނޭކަމަށެވެ. އެގޮތުން އުޅަނދު އޮތީ ބަނދެ ނިމިފައިކަމަށްވެސް މިނިސްޓަރު ފާހަގަކުރެއްވިއެވެ.