ކުލިއަށް ތަންތަން ދޫކުރާއިރު އެތަންތަން ގޭންގްތަކުގެ ސޭފްހައުސްއެއްގެ ގޮތުގައި ބޭނުންވިޔަ ނުދިނުމަށް ސަމާލުވުމަށް ފުލުހުންގެ މުއައްސަސާއިން އިލްތިމާސްކޮށްފިއެވެ.
ދައުލަތުގެ މީޑިއާ، ޕީއެސްއެމްގެ ޕްރޮގްރާމެއްގައި މައުލޫމާތު ދެއްވަމުން ފުލުހުންގެ ހެޑް އޮފް ގޭންގް ކްރައިމް، ސުޕްރިންޓެންޑެންޓް އޮފް ޕޮލިސް، އާރިފް ވަނީ ގޭންގްތަކުން ކުށްކުރުމަށް ބައެއް އާންމުން އަތުން ތަންތަން ކުލިއަށް ނަގާ، އެތަންތަން ސޭފްހައުސްގެ ގޮތުގައި ބޭނުންކުރާ ކަމަށެވެ. މިފަދަ ގޮތަށް ތަންތަން ދޫކުރާއިރު ގިނަަފަހަރާއި އެތަންތަން ކުލިއަށް ހިފަން އުޅެނީ ގޭންގް ބޭނުމަކަށްކަން ތަނުގެ ވެރިފަރާތަށް އެނގެނީ މާ ފަހުން ކަމަށް އާރިފް ވިދާޅުވިއެވެ.
ކުށްކުރުމަށް އެޕާޓްމެންޓްތައް ހިފާ، އެތަންތަނުގައި ބައެއް ޒާތުގެ ހަތިޔާރާއި މަސްތުވާތަކެތި ގެންގުޅޭ ކަމަށް ފުލުހުން ކުރިއަށްގެންދާ އޮޕަރޭޝަންތަކުގައި ހާމަވެފައި ވެއެވެ. އަދި އެތަންތަން ތެރޭގައި ކުޑަކުދިން ގެންގުޅޭ ކަމަށްވެސް އާރިފް ވިދާޅުވެފައި ވެއެވެ. މި މޭރުމުން ވާހަކަދައްކަވަމުން އާރިފް ވަނީ ސޯޝަލް މީޑިއާގައި ކުދިން ގޭންގާއި ގުޅޭ ޕޯސްޓުތައް ބަލާ މިންވަރު ޗެކްކޮށް، ކުރިއާލާ ހުއްޓުވުމަށް އިލްތިމާސްކުރައްވާފައެވެ. ގިނަފަހަރާއި ކުދިން ގޭންގްތަކަށް ވަންނަނީ އާއިލާއިން ރައްކާތެރިކަމާއި ރަހުމަތްތެރިކަން ނުލިބިގެން ކަމަށް އާރިފް ވަނީ ވިދާޅުވެފައެވެ. އަދި ޅައުމުރުގައި މަސްތުވާތަކެތި ޑެލިވަރީ ކުރުމާއި މީހުންނަށް ފާރަވެރިވުން ފަދަ ކަންތައްތައް ކުދިން ލައްވާ ކުރުވާއިރު ކުދިން ގޭންގްތަކަށް ފުރަތަމަ ވަންނައިރު އެތަންތަނުގެ ނުރައްކާތެރިކަން ނޭނގޭކަން އާރިފް ފާހަގަކުރެއްވިއެވެ.
އާރިފް ވަނީ ކުލިއަށް ތަންތަން ދޫކުރާއިރު މިފަދަ ކަންކަމަށް ވަރަށް ބޮޑަށް ވިިސްނުންތެރިވުމަށް އިލްތިމާސްކުރައްވާފައެވެ. އެތަންތަނުގައި ހިނގާ ކަންތައްތަކުގެ ހަގީގަތް އެނގުމަށްފަހު އެތަން އަތުލަން ވެރިފަރާތުން ކުރާ މަސައްކަތް ނާކާމިިޔާބުވާކަން އާރިފް ފާހަގަކުރެއްވިއެވެ.
އާރިފް ވިދާޅުވީ ކުލިއަށް ހިފާ ފަރާތާއި ކުލިއަށް ދޭ ފަރާތުގެ މެދުގައި އުފެދޭ ދެބަސްވުމުގެ ތެރެއިން އެތަންތަނަށް ގެއްލުން ދިނުމުގެ މައްސަލަތައް ކުރިމަތިކުރުވާ ކަމަށެވެ. އާރިފް ވިދާޅުވިގޮތުގައި ކުށުގެ ވެށްޓެއް ކަމަށް ބެލެވޭ ހާލަތެއްގައި ފުލުހުން އެތަންތަނުގެ ވެރިފަރާތަށް ނޯޓިސް ފޮނުވާ ހަދާ ކަމަށެވެ. އަދި ދެބަސްވުން އުފެދޭ ހާލަތެއްގައި ތަނުގެ ވެރިފަރާތަށް ފުލުހުންގެ އެހީތެރިކަން ލިބޭނެ ކަމަށް ވިދާޅުވެފައި ވެއެވެ.
Advertisement
This content is created and paid for by advertisers and does not involve Voice Journalists
