ރައްޔިތުން މަޖިލީހުގެ ރިޔާށަތުގައި އިންނަވަނީ ފުރިހަމަ މިނިވަންކަމާއެކުގައިކަމަށް މަޖިލީހުގެ ރައީސް ޢަބްދުއްރަހީމް ޢަބްދުﷲ ވިދާޅުވެއްޖެއެވެ.

ރައްޔިތުން މަޖިލީހުގައި މިއަދު އިދިކޮޅު އެމްޑީޕީއަށް ނިސްބަތްވެ ވަޑައިގަންނަވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ދެއްކެވި ވާހަކައަށް ރައްދުދެއްވަމުން ޢަބްދުއްރަހީމް ވިދާޅުވީ، މަޖިލީހުގެ ރިޔާސަތުގައި އިންނަވަނީ މިނިވަންކަމާއެކު ކަމަށާއި، އެކަމަށް އެއްވެސް ބައެއްގެ ނުފޫޒެއް ނެތްކަމަށެވެ.

މަޖިލީހުގެ ރައީސް އިންނަވަނީ ބޮލުގައި ބަޑި ޖައްސަވައިގެން އިންނަވާފަދަ ގޮތަކަށްކަމަށް މީކާއީލް ވިދާޅުވިތަނުން ޢަބްދުއްރަހީމް ވަނީ މީކާއީލްގެ ވާހަކަ މެދުކަނޑާލައްވައި އޭނާގެ ވާހަކަތަކަށް ރައްދުދެއްވާފައެވެ.

ޢަބްދުއްރަހީމް ވިދާޅުވީ ރިޔާސަތަށް އެމަނިކުފާނު އިންތިހާބުކުރެއްވީ އިއްޒަތްތެރި މެމްބަރުން ކަމަށާއި މަޖިލީހުގެ ރިޔާސަތުގައި އިންނަވަން އެއްވެސް ހުރަހެއް ނެތްކަމަށެވެ. މީކާއީލަށް ނިސްބަތްކޮށް ޢަބްދުއްރަހީމް ވިދާޅުވީ ރައްޔިތުންނަށް ކަންކަން އޮޅުވާލުމަށް މައިކު ބޭނުން ނުކުރެއްވުމަށް ދަންނަވާކަމަށެވެ. 

މަޖިލީހުގެ ރައީސް އެހިސާބަށް ވިދާޅުވިތަނާ މެމްބަރު މީކާއީލް ވިދާޅުވީ، ގަލޮޅު ދެކުނު ދާއިރާގެ މައިކުގައި އަޑު ހުރިހާ ހިނދަކު އަޑު އިއްވަމުންދާނޭކަމަށް ވިދާޅުވެފައެވެ. މީކާއީލް ވިދާޅުވީ ސަރުކާރުން މިއަދު މަސައްކަތްކުރަމުންދަނީ ރައްޔިތުންގެ މަޖިލީހުގެ ބާރު ކަނޑުވާލަން ކަމަށައި އެކަން މިއަދު ރައްޔިތުންނަށް އެނގޭކަމަށެވެ.

ރައްޔިތުން މަޖިލީހުގެ ރައީސް ޢަބްދުއްރަހީމް ޢަބްދުﷲ އާއި ރައީސުލްޖުމްހޫރިއްޔާ ޑރ.މުހައްމަދު މުއިއްޒުއާ ދެމެދު އޮންނަ ގުޅުން ގޯސްވެފައިވާކަމަށް އިދިކޮޅު ފަރާތްތަކުން ގެންދަވަނީ ތަކުރާރުކޮށް ބުނަމުންނެވެ. އެގޮތުން ވަރަށް އަވަހަށް މަޖިލީހުގެ ރިޔާސަތުން ޢަބްދުއްރަހީމް ވަކިކުރާނޭކަމަށްވެސް އިދިކޮޅުން އަންނަނީ ބުނަމުންނެވެ.

ރައީސް ޑރ.މުއިއްޒު އާއި ޢަބްދުއްރަހީމާ ދެމެދު ގުޅުން ގޯސްވެފައިވާަކަމަށް ބައެއް ފަރާތްތަކުން ތުހުމަތު ކުރަމުންދާއިރު، ޓޫރިޒަމް މިނިސްޓަރުކަމުގެ މަޤާމުގައި ހުންނެވި ޢަބްދުއްރަހީމުގެ ދަރިކަލުން ފައިސަލް ވަނީ ޖެނުއަރީމަހުގެ 28 ވަނަ ދުވަހު މަޤާމުން ވަކިކުރައްވާފައެވެ. ޓޫރިޒަމް މިނިސްޓަރުކަމުން ފައިސަލް ވަކިކުރެއްވި ނަމަވެސް މަގާމުން ވަކިކުރެއްވި ސީދާ ސަބަބެއް އަދި މިހާތަނަކަށް ސަރުކާރުން ހާމަކޮށްފައެއް ނުވެއެވެ.