ފަލަސްތީނުގެ ޣައްޒާގައި ތިބި އަޅުގަނޑުމެންގެ ލޮބުވެތި މުސްލިމު އަޚުންނާއި އުޚުތުން މިވަގުތުވެސް ތިބީ ވަރަށް ދަތި ހާލަތެއްގަ އެވެ. ފަލަސްތީނުގެ ބިމުގެ އަހުލުވެރީން އެ ތަނުން ބޭރުކުރުމަށް އެ ބިމަށް ވެރިވެގެން ތިބި ޒަޔަނިސްޓު ޔަހޫދީ އިޒްރޭލުން ހުޅަނގުގެ ބޮޑެތި ބާރުތަކުގެ އެހީގައި ހިންގަމުންދާ ގަތުލުއާންމު އޮގަސްޓް 7, 2023 ގެ ފަހުން ވަނީ އިތުރަށް ވަރުގަދަ ކޮށްފަ އެވެ.

އެއީ އަމިއްލަ ވަޒަނާއި ބިމުގެ ދިފާއުގައި ޣައްޒާގެ ހިތްވަރު ގަދަ މުޖާހިދުން ޔަހޫދީންގެ ބަލިކަށި ސަފުތަކަށް ފޮނުވާލި ވަރުގަދަ ހަމަލާއާ ގުޅިގެންނެވެ. އެ ހަމަލާއާ ގުޅިގެން އިޒްރޭލްގެ އަސްކަރީ ބާރުތައް ޣައްޒާ ވަށާލާ ވަރުގަދަ ހަނގުރާމައެއް ފެށި އެވެ. މުޅި ޣައްޒާ އެކީ އެކަށް ފުނޑުފުނޑުކޮށްލާ ސުންނާފަތި ކޮށްލި އެވެ.

މިއަދު ޣައްޒާގެ ރައްޔިތުން އެނބުރި ވަޒަނަށް އައިއިރު އެ މީހުން ދިރިއުޅުނު ޝަހަރު ވަނީ ގަލާއި ވެއްޔަށް ހަދާލާފަ އެވެ. ނަމަވެސް ހިތްވަރު ގަދަ އެ ރައްޔިތުން ތިބީ އަލުން އެ މީހުންގެ ދިރިއުޅުން އާބާދު ކުރުމަށް ނުގުނޑާ ފަދަ ގަދަ އަޒުމަކާއި އެހާމެ ވަރުގަދަ އީމާނެއްގަ އެވެ.

Advertisement

ޣައްޒާގެ ރައްޔިތުންނަށް ދިވެހީންގެ ދީލަތި އެހީތެރިކަން ފޯރުކޮށް ދިނުމާއި ޣައްޒާގެ ހާލަތާއި އެ ސިޓީގެ ރައްޔިތުންގެ ވާހަކަތަކާއި ހަބަރުތައް ދިވެހީންނަށް އެންމެ ތާޒާކޮށް ގެނެސްދޭ ބަޔަކީ އިންޓަނޭޝަނަލް އެއިޑް ކެމްޕެއިނެވެ. ޣައްޒާގެ ރައްޔިތުންނަށް އެހީ ވެދިނުމުގައި މުޅި ދުނިޔެ ނަމޫނާއަކަށް ބަލާ އެ ޖަމާއަތުން މި ފަހަރު "ކަރުނަ" މި ނަމުގައި ގެނެސްދީފައިވާ އުފެއްދުން ވަރަށް ތަފާތެވެ. ވަރަށް ހާއްސަ އެވެ.

މި ލަވައިގައި ދައްކުވައި ދެނީ ދިވެހި އާއިލާ އެކެވެ. ދިވެހި ކުޑަ ދެ ކުދީންނެވެ. އަދި ރާއްޖެ އެވެ. ނަމަވެސް ޣައްޒާ މިހާރު އޮތް ހާލަތެވެ. އެއިން ކޮންމެ މަންޒަރެއް ގެނެސްދީފައި ވަނީ އަސްލާ ވަރަށް އެއްގޮތަށެވެ. ދައްކުވައިދެނީ އެ ކުދީންގެ ކުރީގެ އުފާވެރި ދިިރިއުޅުމެވެ. ނަމަވެސް ޔަހޫދީ ސިފައިންގެ އަނިޔާވެރި ކަމުން އެ ހާލަތު ބަދަލު ވެގެން ދިޔަ ގޮތެވެ. ދިރިއުޅުން މުޅީން ފުނޑުފުނޑުވެ ގެތައް ބިމާހަމަވެ އެންމެ ފަހުން ބޮއިލާނެ ފެންފޮދެއް ވެސް ނުލިބޭ ހާލަތުގައި ޣައްޒާގެ ކުޑަކުދީން ދިރިއުޅެމުންދާ ގޮތެވެ.

މިއީ ޣައްޒާގެ ހަގީގީ ހާލަތު އިހުސާސު ކޮށްލަން ލިބުނު ފުރުސަތަކަށް ވެ އެވެ.

ލަވަ ކިޔާފައިވަނީ މޫސާ ޝިފާއު އެވެ. ލަވައިގެ ޅެމުގެ އަސަރުން ވަރަށް ގިނަ ފަހަރު ރޮއްވާލަ އެވެ. ޝިފާއުގެ ހިތްގައިމު އަޑާއި އެ އަސަރުން ރޮއްވާލަ އެވެ.

ޅެމުގައި ބުނަނީ "އުންމަތާ މެދު ބަސް ހުސްވެ ކޮސްވެއްޖެ" ކަމަށެވެ. އަދި ޣައްޒާގައި "އިސްލާމުން ރޮމުން" ދާއިރު އެ މައުސޫމް ކުޑަކުދީންގެ ލޯތަކުން ފައިބާ ކަރުނަތައް ފޮހެލަދީ "ފިރުމާލާދޭނެ އަތްތަކެއް ވޭތޯ ސުވާލުކޮށްފައިވެ އެވެ.

އަދި އެ ހާލަތު ބަދަލުކޮށް ޣައްޒާގެ ރައްޔިތުންގެ ހައްގުގައި ނުތެދުވެ "ބަލަހައްޓައިގެން ތިބެނީ ވާޖިބު ނުވަނީތޯ" ސުވާލުކޮށްފައިވެ އެވެ. އަދި އަސަރާއެކު އިތުރަށް ސުވާލު ކޮށް ބުނެފައި ވަނީ "ބަލަހައްޓައިގެން ތިޔަ ތިބީ ނަލަ މަންޒަރަކަށްވާތީ," ހެއްޔެވެ.

ޅެމުގެ ފަހު ބައި އޮތީ އުންމަތް އެކީ އެކުވެރިވެ އަވަހަށް އެހީވުމަށް ގޮވާލާފަ އެވެ.

އިންޓަނޭޝަނަލް އެއިޑް ކެމްޕެއިންގެ މި އުފެއްދުމުގެ މީޑިއާ ޕާޓްނަރަކީ "ވޮއިސް" އެވެ.