2023 ވަނަ އަހަރުގެ ރިޔާސީ އިންތިޚާބުގެ ތެރޭގައި، ކުރީގެ ރައީސް އިބްރާހީމް މުޙައްމަދު ޞާލިހުގެ އަނބިކަނބަލުން ފަޒުނާ އަޙްމަދު، ޑީއެންއާރު ޑާޓާ ބޭނުންކުރައްވައިގެން އެމްޑީޕީއަށް މެންބަރުން ވެއްދުމުގެ މަސައްކަތް ކުރައްވަމުންދާ ފޮޓޯއެއް ދާޚިލީ ވަޒީރު އަލީ އިހްސާން މަޖިލީހުގައި ހާމަކުރައްވައިފިއެވެ.

ވަޒީރު އިހްސާންގެ އިތުބާރު ނެތް ކަމަށް ބުނެ އެމްޑީޕީގެ 12 މެންބަރުން ސޮއި ކުރައްވައި މަޖިލީހަށް ފޮނުއްވި މައްސަލަ މިއަދު މަޖިލީހުގައި ކުރިއަށް ގެންދާއިރު، އެމްޑީޕީން ހުށަހެޅި އެ މައްސަލާގައި ވަނީ، އިހްސާންގެ ބެއްލެވުމުގެ ދަށުން ހިންގާ ޑީއެންއާރުގެ ޑާޓާ ބޭސް ބޭނުން ކޮށްގެން ވަގަށް ޕީއެންސީއަށް މެންބަރުން ވެއްދި ކަމަށް ތުހުމަތު ކޮށްފައެވެ. 

އެ ތުހުމަތު ތަކަށް ޖަވާބު ދާރީވަމުން އިހްސާން ވިދާޅުވީ، ރައީސް ޞާލިހްގެ ވެރިކަމުގައި، އެމްޑީޕީއަށް ވަގަށް ވެއްދި މީހުންގެ އަދަދު 520 އަށް އަރާ ކަމަށެވެ. އެހެން ނަމަވެސް އެ މައްސަލާގައި އެއްވެސް ވަޒީރަކު މަޖިލީހަށް ހާޒިރުކޮށް ސުވާލު ކޮށްފައި ނުވާ ކަމަށެެވެ. 

Advertisement

މިއާއެކު އިހްސާން ވަނީ، ފަޒުނާ އަޙްމަދު، ޑީއެންއާރު ޑާޓާ ބޭނުންކުރައްވައިގެން އެމްޑީޕީއަށް މެންބަރުން ވެއްދުމުގެ މަސައްކަތް ކުރައްވަމުންދާ ފޮޓޯއެއް ހާމަކުރައްވާފައެވެ. 

މީގެ އިތުރުން އިހްސާން ވިދާޅުވީ، ރިޔާސީ އިންތިޚާބުގެ ތެރެއިން، ވޯޓް ވިޔުގެ ނަމުގައި ކުރީ ސަރުކާރުން ސޮފްޓްވެއާ އެެއް ހަދައި، ޑީއެންއާރ، އެންސްޕާ އަދި އާސަންދައިގެ ދަށުގައިހުރި މައުލޫމާތު އޭގައި ހިމެނިކަމުގެ ތުހުމަތު ދަ ޑިމޮކްރެޓްސް ޕާޓީން އޭރު ކުރި ކަމަށެވެ. 

އެފަދައިން ރައްޔިތުންނަށް ނޭނގި ރައްޔިތުންގެ ޑީއެންއާރުގެ ތެރެއިން ނަގާ މައްސަލަތައް 2014 ވަނަ އަހަރުން ފެށިގެން ފެންމަތިވަމުން ދިޔަ ކަމަށް ވަޒީރު ވިދާޅުވިއެވެ. އެކަން ހައްލު ކުރުމަށް އީފާސް މެދުވެރިކޮށް ޕާޓީއަށް ވެއްދޭގޮތް މިހާރު ހަދާފައިވާ ކަމަށްވެސް ވިދާޅުވިއެވެ.