"ގެދޮރުވެރިޔާ" ސްކީމްގެ ދަށުން ދޫކުރަން ނިންމާފައިވާ 4000 ފްލެޓް ލިބޭ ފަރާތްތަކުގެ ފައިނަލް ލިސްޓް މިއަދު އާއްމު ކުރާއިރު، ފްލެޓު ލިބޭނެ ކަމަށް ޝަރުތު ހަމަވީ 1،820 މީހުން ކަމަށް ހައުސިން މިނިސްޓަރު ޑރ. އަބްދުالله މުއްޠަލިބު މިއަދު ވިދާޅުވެއްޖެ އެވެ.

މިއަދު މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ބޭއްވި ނޫސްވެރިންގެ ބައްދަލުވުމުގައި މިނިސްޓަރ މުއްޠަލިބު ވިދާޅުވި ގޮތުގައި ވެރިފިކޭޝަން ޕްރޮސެސް ގައި ޗެކުކުރެވުނީ 4939 ފޯމެވެ. އެ ފޯމު ތަކުގެ ތެރެއިން؛

* ތިން ކޮޓަރީގެ ލިސްޓުގައި ހިމެނޭ 3721 ފަރާތުގެ ތެރެއިން ޝަރުތު ހަމަވެ 75 ޕޮއިންޓް ލިބުނީ، 1423 ފަރާތެއް

* ދެ ކޮޓަރީގެ ލިސްޓުގައި ހިމެނޭ 1218 ފަރާތުގެ ތެރެއިން ޝަރުތު ހަމަވެ 73 ޕޮއިންޓް ލިބުނީ، 397 ފަރާތެއް

* އެހެންކަމުން އާއްމުކޮށްފައިވާ ލިސްޓުގައި ފުލެޓް ލިބޭ ކަމަށް ކަނޑައަޅާފައުވަނީ 1820 ފަރާތެއް

* 2695 ފޯމު ޝަރުތު ހަމަ ނުވޭ 

* ޕޮއިންޓަށް އައި ބަދަލާއެކު 424 ފަރާތެއް ލިސްޓުން އުނިވެފައިވޭ

ވަޒީރު ވިދާޅުވީ ފުލެޓް ލިސްޓު މިއަދު އާއްމު ކުރުމާއެކު، ފުލެޓް ނުލިބޭ ފަރާތްތަކަށް ޝަކުވާ ހުށަހެޅުމަށް އެއްމަސް ދުވަހުގެ މުއްދަތެއް ދެވޭނެ ކަމަށާ، އަދި ލިބުނު ފަރާތްތަކުގެ ތެރެއިން މައްސަލައެއް ފާހަގަނުވާ ފަރާތްތަކަށް ފުލެޓް ހަވާލުކުރުނުގެ މަސައްކަތް ފެށިގެންދާނެ ކަމަށެވެ.

ކުރީގެ ރައީސް ސޯލިހްގެ ވެރިކަމުގައި ފެށި ގެދޮރުވެރިޔާ މަަޝްރޫއުން ފްލެޓް ލިބުނު މީހުން ކަނޑައަޅާ އިއުލާނު ކުރި އެވެ. އެ ލިސްޓް ނެރުނީ ވެރިކަމުގެ އެންމެ ފަހު ދުވަސްކޮޅު އެވެ.

އެ ލިސްްޓްގައި ހިމެނޭ ބައެއް މީހުންނަކީ ނުހައްގުން ނުފޫޒު ބޭނުންކޮށްގެން ލިސްޓްގައި ޖައްސާފައިވާ މީހުން ކަމަށް ބެލެވި އޭސީސީން މައްސަލަ ބެލި އެވެ. އޭސީސީގެ ތަހުގީގުން އެނގުނީ ލިސްޓްގެ 60 ޕަސެންޓް ގޯސް ކަމެވެ.

ފްލެޓް ލިސްޓް ނެރެން ސަރުކާރުން މި ނިންމީ ލިސްޓް އާންމު ކުރާނެ ކަމަށް ބުނެ މި ސަރުކާރުން އެތައް ތާރީހެއް ދިނުމަށް ފަހު އެވެ.