ބޯކޮށް ވާރޭވެހި ފެންބޮޑުވުމުގެ ސަބަބުން މިއަދަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ހަމަޖައްސަވައިފިއެވެ. 

މިކަން ހާމަކުރައްވައި، ރައީސް އޮފީހުގެ ތަރުޖަމާނު ހީނާ ވަލީދު އެކްސް ގައި ކިރެއްވި ޕޯސްޓެއްގައި ވިދާޅުވީ، މެދުނުކެނޑި ބޯކޮށް ވާރޭވެހި އަދި ބައެއް ސަރަހައްދު ތަކުގައި ފެންބޮޑުވެ، އެކަމުގެ ސަބަބުން ވަރަށްގިނަ ރައްޔިތުންނަށް ދަތިވެ، ތަކުލީފުތަކެއް ލިބިފައިވާތީ 2 މާރިޗް 2025 ވަނަ ދުވަހަކީ (މިއަދު) ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ހަމަޖައްސަވާފައިވާ ކަމަށެވެ.

ރާއްޖެ އަށް މިހާރު ކުރަމުންދާ ވިއްސާރައާއި ގުޅިގެން ބ އަތޮޅުން ދ އަތޮޅަށް ރޭ ދަންވަރު ތިނެއް ޖަހަންދެނ އޮތީ އޮރެންޖު އެލާޓުވެސް ނެރެފައެވެ. 

މި ވިއްސާރައިގައި ، މާލެއަށާއި އަތޮޅުތެރޭގެ ގިނަ ރަށްތަކަށް ބޯކޮށް ވާރޭވެހި ފެންބޮޑުވެ، ގިނަ އަދަދެއްގެ ގޭގެއަށް ފެންވަންނަމުން ދާތީ، މިކަމުގައި އެހީތެރިކަން ފޯރުކޮށްދިނުމަށް ފުލުހުންނާއި ސިފައިންނާއި އެންޑީއެމްގެއޭގެ ފަރާތުން އަންނަނީ ވެލިބަސްތާ ޖެހުމުގެ ކަންކަން ކުރަމުންނެވެ. 

އަދި މާލެއާއި ބައެއް ރަށް ރަށުގައިވެސް ފެންބޮޑުވެ ބައެއް ގޭތަކުން ނަޖިސް ލީކްވެގެން އެ ގެތަކަށް ނަޖިސް ވަނުމުން ރައްކާތެރިކުރުމަށް އެ އިދާރާތަކުން މަސައްކަތް ކުރާއިރު، މާލޭގެ ހަތަރު ގެއަކުން މީހުން ވަނީ ރައްކާތެރި ތަންތަނަށް ބަދަލުކޮށްފައެވެ. 

ރާއްޖެއަށް މިހާރު ކުރަމުން މިދާ ވިއްސާރަ އަލިވާނެ ކަމަށް މެޓް އޮފީހުން ލަފާ ކުރަނީ މާދަމާއިން ފެށިގެންނެވެ.