މިހާރު ރާއްޖެއަށް ކުރަމުންދާ ވިއްސާރާގައި މާލެއިން 16911 ޓަނުގެ ފެން ހިންދާފައިވާ ކަމަށް އެމްއެންޑީއެފުން މިއަދު ބުނެފި އެވެ.
އިއްޔެ އިން ފެށިގެން ރާއްޖޭގެ އެކި ސަރަހައްދުތަކަށް ކުރަމުންދާ ވިއްސާރާގައި، މާލެ ސަރަހައްދާއި ރާއްޖޭގެ ބައެއް ރަށްތަކުގައި ފެންބޮޑުވެ ގޭގެއަށް ފެންވަދެ، މުދަލަށް ވަނީ ބޮޑެތި ގެއްލުންވެފަ އެވެ.
އަދި ބޯކޮށް ވާރޭ ވެހި، ފެންބޮޑުވުމުގެ ސަބަބުން ފެން ހިންދުމުގެ މަސައްކަތް ޤައުމީ ދިފާޢީ ބާރާއި، ކަމާއި ގުޅުން ހުރި މުއައްސަސާތަކުން ގުޅިގެން ވަނީ ކޮށްފައެވެ.
އެގޮތުން، މާލޭގެ 6 ސަރަހައްދެއްގައި 17 ޕަމްޕެއް ބަހައްޓައިގެން ފެން ހިންދުމުގެ މަސައްކަތް ވަނީ ކޮށްފައިވާއިރު، މާލެ ސިޓީގެ ފެންބޮޑުވެފައިވާ ސަރަހައްދުތައް އާންމު ހާލަތަށް މިހާރު ގެނެވިފައިވާ ކަމަށް އެމްއެންޑީއެފުން ބުނެއެވެ. އެހެންކަމުން، ްފެން ހިންދުމުގެ މަސައްކަތް މިހާރުވަނީ މެދުކަނޑާލާފައެވެ.
އެމްއެންޑީއެފުން އިތުރަށް ބުނީ ވިއްސާރައާ ގުޅިގެން ކުރިއަށް ގެންދިޔަ އޮޕަރޭޝަނުގައި މާލޭގެ 131 ގެއަކަށް އެހީތެރިކަން ފޯރުކޮށްދީފައިވާ ކަމަށާ އަދި 976 ވެލި ބަސްތާ ޖަހައިދިން ކަމަށެވެ.
Advertisement
This content is created and paid for by advertisers and does not involve Voice Journalists
