ސަލަފުގެ ނަމުގައި ފޭސްބުކުގައި ފޭކު އެކައުންޓެއް، ސަމާލުވާތި!
ޖަމިއްޔަތުއްސަލަފްގެ ނަމުގައި ފޭސްބުކްގައި ފޭކް އެކައުންޓެއް ހިންގަމުންދާ ކަމަށާ އެކަމަށް އާންމުން ސަމާލުވުމަށް އެ ޖަމިއްޔާ އިން އެދިއްޖެ އެވެ.
ސަލަފުން ބުނީ އެކަން ފުރަތަމަ ޖަމިއްޔާގެ ސަމާލުކަމަށް އައީ "ސަލަފް ރޯދަ ހަދިޔާ” އިވެންޓުގެ ހަރަކާތްތައް ފެށި ހިސާބުންނެވެ. އޭރުވެސް އެކަން ޖަމިއްޔާގެ ސޯޝަލް މީޑިއާ ޕްލެޓްފޯމްތަކުން އާންމުންގެ ސަމާލުކަމަށް ގެނެސްފައިވާނެ ކަމަށް ބުންޏެވެ.
“އަޅުގަނޑުމެންގެ ޕޭޖްގައި ކޮމެންޓްކޮށް، ހަދިޔާ ލިބިފައިވާކަމަށް މީހުންނަށް ޓެގްކޮށް ހަދަމުންދަނީ. އަދި އެކަމުގެ ސަބަބުން އަޅުގަނޑުމެންނަށް ބައެއް ފަރާތްތަކުން ފޯނުކޮށް، އެކަން ހިއްސާކުރަމުންދޭ,” އެ ޖަމިއްޔާގެ ސެކްރެޓަރީ މުހައްމަދު ޝުޖާއު ވިދާޅުވި އެވެ.
މީގެ އިތުރުން، ރަމަޟާންމަހުގެ ސުވާލު މުބާރާތްތަކުގައި ޖަވާބު ދީފައިވާ ފަރާތްތަކަށް ވެސް މި ފޭކް އެކައުންޓުން ޓެގްކޮށް މަރުހަބާ ކިޔާކަން ފާހަގަކުރެވިފައިވާ ކަމަށް އޭނާ ވިދާޅުވި އެވެ.
ސަލަފުން ބުނީ އެ ޖަމިއްޔާ އިން އެއްވެސް ފަރާތަކަށް ފްރެންޑު ރިކުއެސްޓެއް ނުފޮނުވާނެ ކަމަށާ ނަސީބުވެރިޔާ ޓެގެއް ވެސް ނުކުރާނެ ކަމަށެވެ.
އެހެން ކަމުން މިފަދަ ކަންކަމަށް ސަމާލުވެ ތިބުމަށާ މިފަދަ ޣައިރު ގާނޫނީ އަމަލުތައް ހިންގާ ފަރާތްތަކަށް މިކަން ހުއްޓާލުމަށް ނަސޭހަތްތެރިވާ ކަމަށް ސަލަފުން ބުންޏެވެ.
ސަލަފްގެ ރަސްމީ ފޭސްބުކް ޕޭޖް މެދުވެރިކޮށް ނޫނީ އެހެން އެއްވެސް އެކައުންޓަކުން ޖަމިއްޔާގެ ނަމުގައި މުއާމަލާތެއް ނުކުރާނެ ކަމަށާ އެފަދަ ކަމެއް ފާހަގަކުރެވިއްޖެނަމަ، ވަގުތުން ޖަމިއްޔާއަށް އެންގުމަށް ވެސް ވަނީ އެދިފަ އެވެ.
ސަލަފުގެ ނަމުގައި ފޭކު އެކައުންޓެއް ހަދާ ހިންގަން ފެށީ ވަރަށް އަގުބޮޑު އިނާމުތަކެއް ލިބޭ ގޮތަށް އެ ޖަމިއްޔާ އިން ރޯދަ ހަދިޔާ ނަމުގައި ހަރަކާތެއް ފެށުމުންނެވެ. އެ ހަރަކާތުގައި 101 އިނާމު ދިނުމަށް ނިންމި އެވެ. އެ ހަރަކާތް މިދިޔަ ބުރާސްފަތި ދުވަހުގެ ރޭ ބާއްވަން މަސައްކަތް ކުރި އެވެ. ނަމަވެސް މޫސުން ގޯސްވެ އެ ހަރަކާތް ވަނީ ފަސްކޮށްފަ އެވެ.
Advertisement
This content is created and paid for by advertisers and does not involve Voice Journalists