މިފަހަރުގެ ރަމަޟާންމަހުގެ ފުރަތަމަ ދުވަހު ކަރަންޓް ބޭނުންކުރި މިންވަރު ވަރަށްބޮޑަށް ދަށަށްގޮސްފައިވާކަމަށް ސްޓެލްކޯއިން ބުނެފިއެވެ.

ސްޓެލްކޯއިން މިއަދު އެކްސްގައި ކުރި ޕޯސްޓެއްގައި ބުނީ، ރޯދަ މަހުގެ ފުރަތަމަ ދުވަހު މާލެއާއި، ހުޅުމާލޭގައި ކަރަންޓު ބޭނުންކުރެވިފައިވާ ގޮތަށް ބަލާއިރު، ވިއްސާރަ ދުވަހަކަށްވުމުންނާއި، ސްކޫލްތަކާއި އޮފީސްތައް ބަންދުވުމާއެކު، ކަރަންޓު ބޭނުން ކުރި މިންވަރު ވަނީ ވަރަށް ބޮޑުތަނުން ދަށަށްގޮސްފައި ކަމަށެވެ. 

އެގޮތުން މިދިޔަ ހޮނިހިރުދުވަހު އެންމެ ޕީކްގަޑީގައިވެސް އެންމެ ގިނައިން ބޭނުންކޮށްފައިވަނީ 78 މެގަވޮޓް ކަރަންޓްކަމަށް ސްޓެލްކޯއިން ބުންޏެވެ. އެކުންފުނިން ބުނީ، ރޯދަ މަހުގެ ކުރިން ޕީކް ގަޑީގައި ކަރަންޓު ބޭނުންކުރާ މިންވަރު ޖުމްލަގޮތެއްގައި ހުރީ 100 މެގަވޮޓް އިން މަތީގަކަމަށެވެ.

ރޯދަމަހުގެ ފުރަތަމަ ދުވަހު ކަރަންޓް ބޭނުންކުރި މިންވަރު ދަށަށް ގޮސްފައިވާއިރު، ރަމަޟާންމަހާއި ހޫނުމޫސުމާ ދިމާވާތީވެ ސްޓެލްކޯއިން ވަނީ، މާލެ ސަރަހައްދުގެ ކަރަންޓް ކެޕޭސިޓީ އިތުރުކުރުމުގެ މަސައްކަތް ކުރިއަށްގެންގޮސްފައެވެ.

ސްޓެލްކޯއިން ވަނީ މިހިނގާ ރޯދަމަހުގެ ތެރޭގައި ގޭބިސީތަކުން ކަރަންޓް އިތުރަށް ބޭނުންކުރާނޭ ވަރު ބަލައި މިހާރުގެ ކަރަންޓް ކެޕޭސިޓީއަށް 17 މެގަވޮޓް އިތުރުކުރާނޭކަމަށް ބުނެފައެވެ. 

މިދިޔަ އަހަރުވެސް ކަރަންޓް އެންމެބޮޑަށް ޕީކަށް އަރައިގެންދިޔައިރު، 114 މެގަވޮޓްގެ ކަރަންޓް ބޭނުންކޮށްފައިވާކަމަށް ސްޓެލްކޯގެ ތަފާސްހިސާބުތަކުން ދައްކައެވެ. ސްޓެލްކޯއިން ވަނީ މިފަހަރު އެއަދަދު 132 މެގަވޮޓަށް އަރާނޭކަމަށް ފާހަގަކޮށްފައެވެ. ކަރަންޓް ބޭނުންކުރާ މިންވަރު އިތުރުވިނަމަވެސް ކަރަންޓް ކަނޑަންޖެހޭ ހާލަތަށް ނުދާނޭކަމަށް ސްޓެލްކޯއިން ވަނީ ޔަގީންކަންދީފައެވެ.