އައްޑޫ ސިޓީ ހިތަދުއާއި ހުޅުމީދޫ ގުޅައިލާ ބުރިޖުގެ މަސައްކަތަށް ފަންނީ ލަފާދޭނެ ބަޔަކު ހޯދަން އިއްޔެ އިއުލާންކޮށްފިއެވެ.

ފިނޭންސް މިނިސްޓްރީން ކުރި އިއުލާނެއްގައިވަނީ އިންފްރާސްޓްރަކްޗާ މިނިސްޓްރީގެ އެދުމުގެ މަތީން އެ މަޝްރޫއުގެ ސާވޭ، ޑިޒައިން، ޓެންޑާ ޑޮކިއުމަންޓް އަދި ޓެކްނިކަލް ސްޕެސިފިކޭޝަން ހިމެނޭ ގޮތަށް ތައްޔާރުކުރުމުގެ މަސައްކަތަށް ލަފާދޭނެ ބަޔަކު ހޯދަން ބޭނުންވާ ކަމަށެވެ.

އަދި އެކަމަށް ޝައުގުވެރިވާ ފަރާތްތަކުން، ކުންފުނީގެ ފަންނީ ގާބިލުކަމާއި، ދާއިރާއިން ކޮށްފައިވާ މަަސައްކަތްތަކުގެ އަގާއި ތަފުސީލު ހިމެނޭހެން، މުވައްޒަފުންގެ ހުނަރާއި ގާބިލުކަން އެނގޭނެ ލިޔެކިޔުން ހުށަހަޅަންޖެހެއެވެ.

މި މަސައްކަތްތަކަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ޝޯޓް ލިސްޓް ކުރެވޭ ފަރާތްތަކަށް ޕްރޮޕޯޒަލް ހުށަހެޅުމުގެ ދައުވަތު ދޭނެ ކަމަށާ، މި މަސައްކަތާގުޅޭ މައުލޫމާތު ހިމެނޭގޮތަށް ތައްޔާރުކޮށްފައިވާ ޓާމްސް އޮފް ރިފަރެންސް، މާދަމާއިން ފެށިގެން ފިނޭންސް މިނިސްޓްރީގެ ވެބްސައިޓުން ޑައުންލޯޑު ކުރެވޭނެ ކަމަށް އިއުލާނުގައިވެއެވެ.

އެހެން ކަމުން މި މަސައްކަތާ ގުޅިގެން ދޫކުރެވޭ އެންމެފަހުގެ މައުލޫމާތުތައް ވެބްސައިޓް މެދުވެރިކޮށް ހޯދުމަކީ ބީލަމަށް ކުރިމަތިލާ ފަރާތުގެ ޒިންމާއެއް ކަމަށްވެސް ބުނެފައިވެއެވެ.

މި ކަމަށް ޝައުގުވެރިވެލައްވާ ފަރާތްތަކުން މިމަހުގެ 24ވާ ހޯމަ ދުވަހު 13:00 ގެ ކުރިން، "އެކްސްޕްރެޝަން އޮފް އިންޓަރެސްޓް" މެއިލް ނުވަތަ އީމެއިލް މެދުވެރިކޮށް [email protected] ނުވަތަ [email protected] އަށް ފޮނުވުމަށް ފިނޭންސުން އެދެއެވެ.

އަދި ބްރިޖުގެ މަސައްކަތް ކުރިއަށްގެންދިއުމަށް ބޭނުންވާ ސަރވޭ އަދި ޑިޒައިން ހެދުމަށް މިސްރުގެ ދި އަރަބް ކޮންޓްރެޓާސް އާ ހަވާލުކޮށްފައިވަނީ މިދިޔަ އަހަރުގެ ފެބްރުއަރީ މަހުގެ 19ވަނަ ދުވަހެވެ.