އާރްޓީއެލް ބަސްތަކުން ހިލޭ ދަތުރުކުރެވޭނެ ކަމަށް ބުނެ ހިންގަމުންދާ ސްކޭމަކާ ގުޅޭ ގޮތުން ސަމާލުވުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން އެދިއްޖެއެވެ. 

"މޯލްޑިވްސް ޕަބްލިކް ޓްރާންސްޕޯޓް" ނަމަކަށް ކިޔާ ފޭސްބުކު ޕޭޖަކުން މި ސްކޭމް ހިންގަމުންދާ ކަމަށް އެމްޓީސީސީން މަޢުލޫމާތު ދީފައިވެއެވެ.

މި ޕޭޖުން ޝާއިޢުކޮށްފައިވާ ޕޯސްޓެއްގައި ބުނެފައިވަނީ "ސްމާޓް ޕާސް" އަކާއެކު 3 މަސްދުވަހުގެ މުއްދަތަށް ހިލޭ ދަތުރުކުރެވޭނެ ކަމަށެވެ. އަދި ރާއްޖޭގެ ރަށްތަކުގައި ދަތުރުފަތުރުގެ ނިޒާމު ހަރުދަނާކޮށް، އާންމު ދަތުރުފަތުރުގެ ވަސީލަތްތައް ބޭނުންކުރުން އިތުރުކުރުމަށް އެ ސްކޭމް ހިންގާ ފަރާތާ ބައިވެރިވުމަށް އާރްޓީއެލްއިން ދަޢުވަތު ދީފައިވާ ކަމަށެވެ.

މީގެ އިތުރުން، ރާއްޖޭގައި 3 މަސްދުވަހުގެ މުއްދަތަށް ނުހަނު ގިނަ ދަތުރުތައް ކުރެވޭނެ 500 ކާޑު އެންމެ 34.64 ރުފިޔާއަށް ލިބެން ހުންނާނެ ކަމަށާ، މި ޚާއްޞަ ޑީލް ލިބެން ހުންނާނީ 7 ދުވަހުގެ މުއްދަތަށް ކަމަށްވެސް ސްކޭމް ޕޭޖުގައި ބުނެފައިވެއެވެ.

މިކަމާ ގުޅިގެން އެމްޓީސީސީން ބުނީ، އެ ކުންފުނީގެ ފަރާތުން އައު ޚިދުމަތެއް ނުވަތަ ޕްރޮޑަކްޓެއް ތައާރަފް ކުރާނަމަ، އެކަމެއް ރަސްމީކޮށް ފެށުމުގެ ކުރިން ކުންފުނިން އިއުލާން ކުރާނެ ކަމަށެވެ. އަދި އެ ސްކޭމް ހިންގާ ފަރާތާ އާރްޓީއެލް އާއި އެއްވެސް ގުޅުމެއް ނެތް ކަމަށާ އެފަރާތުން ދީފައިވާ ލިންކާ މެދު ސަމާލުވުމަށް އެކުންފުނިން އެދިފައިވެއެވެ. 

މީގެ އިތުރުން އެމްޓީސީސީން ވަނީ އެކުންފުނީގެ ބޭނުންކޮށް ރައްޔިތުންގެ އަތުން ނުހައްގުން ފައިސާ ހޯދުމަށް ކުރާ އެފަދަ ކަންކަން ކުށްވެރިކޮށްފައެވެ.  އަދި އެ ސްކޭމް ޕޭޖު ރިޕޯޓް ކުރުމަށްވެސް އެދިފައިވެއެވެ.