ބާޒާރުގައި ކުރުނބާ ލިބުންދަތިވެ، ކުރުނބައެއްގެ އަގު 35 ރުފިޔާއަށްވުރެ މައްޗަށް އަރައިފިއެވެ.

ރޯދަމަހު ބާޒާރުގައި އެ އެއްޗެއްގެ ޑިމާންޑް އެންމެ ބޮޑު ތަކެތީގެ ތެރޭގައި ކުރުނބާ ހިމެނެއެވެ. ކުރުނބާ ފަންޏަކީ ރޯދަ ވީއްލުމުގައި ގިނަ ބައެއްގެމެދުގައި ވަރަށް މަޤްބޫލު ބުއިމެކެވެ. 

ދަތުރުވެރިންގެ މާރުކޭޓަށް ބަލާއިރު، ގޮޅިތަކުގައި ކުރުނބާ ލިބެންހުރީ ވަރަށް މަދުންނެވެ. ދަތުރުވެރިންގެ މާރުކޭޓުގައި މިއަދި ކުރުނބާގެ އަގުހުރީ 35 ރުފިޔާއިން މަތީގެ އަގުތަކެއްގައެވެ. ދަތުރުވެރިންގެ މާރުކޭޓުގައި މިއަދު 1.5 ލީޓަރުގެ ކުރުނބާ ފެންފުޅިއެއްގެ އަގުހުރީ 160 ރުފިޔާއަށެވެ. ގޮޅިތަކުގައި ވިޔަފާރިކުރާ ފަރާތްތަކުން ބުނާގޮތުގައި މިހާރު ލިބުން އެންމެ ދަތި އެއްޗެހީގެ ތެރޭގައި ކުރުނބާ ހިމެނެއެވެ. 

Advertisement

ހުޅުމާލޭ މާރުކޭޓަށް ބަލާއިރު، އެތަނުގައި ކުރުނބާގެ އަގުހުރީ 40 ރުފިޔާއިން މަތީގެ އަގުތަކެއްގައެވެ.

މާލެއަށް އެންމެގިނައިން ކުރުނބާ ގެންނަ އެއް ރަށަކީ ކ.ކާށިދޫއެވެ. އެރަށުން މާލެއަށް ކުރުނބާ ގެންނަ މީހުންބުނީ ރަށުގެ ރުއްގަނޑު ހަލާކުވުމުގެ ސަބަބުން މިފަހަރުގެ ރޯދަމަހު އެކަށީގެންވާ އަދަދަކަށް ކުރުނބާ ނުފޮނުވޭކަމަށެވެ. 

ގޮޅިތަކުން ވާހަކަދެއްކި ބައެއް މީހުން ބުނީ މޫސުން ރަނގަޅުވުމުން ރަށްރަށުން ކޮންމެވެސް ވަރަކަށް މާރުކޭޓަށް ކުރުނބާ ލިބޭނެއެވެ. ނަމަވެސް އަގުތައް ހެޔޮވެގެން ނުދާނޭކަމަށް އެމީހުން ބުނެއެވެ.

"ކިހިނެތް އަގުހެޔޮވާނީ. މިހާރު ރުކަށް އަރާމީހާއަށް 50 ރުފިޔާ ދޭންޖެހޭ. ރުކަކުން ލިބެނީ މަދު އަދަދެއް. އެއީވެސް އަގުބޮޑުވުމުގެ އެއް ސަބަބު" ދަތުރުވެރިންގެ މާރުކެޓުގެ ގޮޅިއަކުން ވާހަކަދެއްކި މީހަކު ބުންޏެވެ.

ދަތުރުވެރިންގެ މާރުކޭޓުގައި ކުރުނބާ ލިބުން ދަތިވެ ކުރުނބާގެ އަގު އުފުލިފައިވާއިރު، ރާއްޖޭގެ ރުއްތަށް މުސްކުޅިވުމުގެ ސަބަބުން ރުކުގެ އައު ޖީލެއް ބިނާކުރުމުގެ މަސައްކަތް ސަރުކާރުން ވަނީ ފަށާފައެވެ. ބޭނުމަކީ ދެމެހެއްޓެނިވި ގޮތެއްގައި ރުއްތަކުން ކާއްޓާއި ކުރުނބާ ލިބޭނޭމަގު ތަނަވަސްކޮށްދިނުމެވެ.