ގެދޮރުވެރިޔާ ސްކީމުގެ ދަށުން ދޫކުރުމަށް ނިންމި 4،000 ފްލެޓް ލިސްޓަށް ޝަކުވާ ހުށަހެޅުމަށް ހުޅުވާލުމުން މިހާތަނަށް 675 ޝަކުވާ ލިބިފައިވާކަމަށް އިމާރާތް ގެދޮރުވެރިކަމާ ބެހޭ ވުޒާރާއިން ބުނެފިއެވެ.
ގެދޮރުވެރިޔާ ސްކީމްގެ ދަށުން އެމްޑީޕީ ސަރުކާރުން އެކުލަވާލި ފްލެޓް ލިސްޓް މުރާޖައާ ކުރުމަށްފަހު އަދުގެ ސަރުކާރުން އެ ލިސްޓް އާއްމުކޮށްފައިވަނީ، ހުސްވި ފެބުރުއަރީމަހުގެ 27 ވަނަ ދުވަހުއެވެ. އެއަށްފަހު ލިސްޓަށް ޝަކުވާ ހުށަހެޅުމަށް ފުރުސަތު ހުޅުވާލާފައިވަނީ، މިހިނގާ މާޗްމަހުގެ އެއްވަނަ ދުވަހުއެވެ.
އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ވޮއިސްއާ ހިއްސާކުރި މައުލޫމާތަށް ބަލާއިރު، ލިސްޓާ ގުޅޭގޮތުން މިހާތަނަށް 675 ޝަކުވާ ވަނީ ލިބިފައެވެ. އޭގެ ތެރޭގައި އެންމެ ގިނައިން ޝަކުވާ ލިބިފައިވަނީ 3 ކޮޓަރީގެ ފްލެޓާ ގުޅޭގޮތުންނެވެ. 3 ކޮޓަރީގެ ފްލެޓް ލިސްޓާ ގުޅޭގޮތުން 452 ޝަކުވާ ލިބިފައިވާއިރު، ދެ ކޮޓަރީގެ ފްލެޓް ލިސްޓާ ގުޅޭގޮތުން 223 ޝަކުވާ ވަނީ ލިބިފައެވެ.
ފްލެޓް ލިސްޓާ ގުޅޭގޮތުން ޝަކުވާ ހުށަހެޅުމަށް ހުޅުވާލާފައިވަނީ އަންނަ މާރިޗްމަހުގެ 31 ވަނަ ދުވަހުގެ ނިޔަލަށެވެ. އެގޮތުން ފޯމް ހުށަހަޅާފައިވާ ފަރާތެއްނަމަ އެފަރާތުގެ ފޯމާއި ގުޅޭ ޝަކުވާ ގެދޮވެރިން ޕޯޓަލް މެދުވެރިކޮށް ހުށަހެޅުމަށް އަދި ލިސްޓުގައިވާ ފަރާތަކާއި ގުޅޭ ޝަކުވާއެއް ނަމަ އީމެއިލް ނުވަތަ މިނިސްޓްރީއަށް އެޑްރެސްކޮށް ފޮނުވޭ ސިޓީއަކުން ހުށަހެޅޭނެ އެވެ. މީގެ އިތުރުން، ޝަކުވާ ހުށަހެޅުއްވުމުގެ މުއްދަތުގެ ތެރޭގައި ޝަކުވާ ހުށަހެޅުއްވުމުގެ ކަންކަން ކުރިޔަށްގެންދާނެ ގޮތާއި ގުޅޭ އިތުރު މައުލޫމާތު ސާފުކުރުމަށް މިނިސްޓްރީގެ ނަންބަރު 4004911 އަދި 4004910 ފޯނަށް ގުޅައިގެން މައުލޫމާތު ސާފުކުރެވޭނެ ކަމަށް ވެސް ބުުންޏެވެ.
ފްލެޓު ދޭން ކަނޑައަޅާފައިވާ 4000 މީހުންގެ ލިސްޓް ބެލުމުން ޝަރުތު ހަމަވީ 1،820 މީހުން ކަމަށް ސަރުކާރުން ވަނީ ބުނެފަ އެވެ.
Advertisement
This content is created and paid for by advertisers and does not involve Voice Journalists
