"ގެދޮރުވެރިޔާ" ސްކީމްގެ ދަށުން ދޫކުރަން ނިންމާފައިވާ 4000 ފްލެޓް ލިބޭ ފަރާތްތަކުގެ ލިސްޓަށް ޝަކުވާ ހުށައަޅަން ހުޅުވާލާފައިވާ ފުރުސަތުގައި މާދަމާ އިން ފެށިގެން ޕޯޓަލުގައި ލިޔެވޭ މިންވަރު އިތުރު ކުރަން ނިންމާފައިވާ ކަމަށް ކޮންސްޓްރަކްޝަން އެންޑް ހައުސިން މިިނިސްޓްރީން ބުނެފި އެވެ.
ފްލެޓު ދޭން ކަނޑައަޅާފައިވާ 4000 މީހުންގެ ލިސްޓް ބެލުމުން ޝަރުތު ހަމަވީ 1،820 މީހުން ކަމަށް ސަރުކާރުން ވަނީ ބުނެފަ އެވެ. އަދި އެ ލިސްޓް މިހާރު ވަނީ އާންމުކޮށްފަ އެވެ. މި މަހުގެ ނިޔަލަށް ޝަކުވާ ހުށައަޅަން ވެސް އޮތީ ފުރުސަތު ހުޅުވާލާފަ އެވެ.
ނަމަވެސް އާންމުންގެ ޝަކުވާ އަކީ ޕޯޓަލް މެދުވެރިކޮށް ޝަކުވާ ހުށައަޅާއިރު ޕޯޓަލްގައި ލިޔެވޭ މިންވަރު ލިމިޓްކޮށްފައިވުމެވެ. މިހާާރު ލިޔެވެނީ 1500 ލަފްޒެވެ.
ދައުލަތުގެ މީޑިއާގައި ވާހަކަ ދައްކަވަމުން ސްޓޭޓް މިނިސްޓަރު އިބްރާހިމް ނަޒީމް ވިދާޅުވީ މިދިޔަ ހަތަރު ދުވަސްތެރޭ ހާހަކަށް ވުރެ ގިނަ ޝަކުވާ ހުށައަޅާފައިވާ ކަަމަށާ އާންމުންގެ އެންމެ ބޮޑު ކަންބޮޑުވުމަކީ ޕޯޓަލުން ޝަކުވާ ހުށައަޅަން ޖެހޭއިރު ޝަކުވާގެ ގޮތުގައި ލިޔެވޭ މިންވަރު މަދުވުން ކަމަށެވެ. އެހެން ކަމުން މިހާރު ލިޔެވޭ 1500 ލަފުޒުގެ ބަދަލުގައި 3000 ލަފުޒަށް އިތުރު ކުރަން ނިންމާފައިވާ ކަމަށް ނަޒީމް ވިދާޅުވި އެވެ. އަދި ވިދާޅުވީ މާދަމާ އިން ފެށިގެން އެ އަދަދަށް ލިޔެވޭނެ ކަމަށެވެ.
"މިހެން ވެސް ދެވެން ހުރި ހުރިހާ ލުއިތަކެއް އަޅުގަނޑުމެން ދޭނަން,"
ނަޒީމް ވިދާޅުވީ އެންމެ ބޮޑު އެެއް ޝަކުވާ އަކީ މާލޭގައި 15 އަހަރު އުޅުނު ކަމަށް މުއްދަތު ގުނުމުގައި ބަލާފައިވާ ގޮތާމެދު އޮތް ޝަކުވާ ކަމަށެވެ. އަދި އެކަން ސާބިތުކޮށްދޭން އިތުރު ޑޮކިއުމަންޓް ހުށައަޅަން ފުރުސަތު ދޭން ބައެެއް މީހުން އެދޭ ކަމަށެވެ. ނަމަވެސް ކުރީން ހިނގި ދެ މަރުހަލާއެއްގައި ޑޮކިއުމަންޓް ހުށައަޅަން ފުރުސަތު ދިން ކަމަށާ އެހެން ކަމުން އެ ފުރުސަތު ދޭން ނިންމާފައި ނުވާ ކަމަށެވެ.
ނަމަވެސް ހުށައަޅާ ޝަކުވާ އަކުން އިތުުރު ޑޮކިއުމަންޓް ބަލަން ޖެހޭ ހާލަތެއްގައި އެކަން ކުރާނެ ކަމަށާ އެއްވެސް މީހެއްގެ ހައްގު ގެއްލޭނެ ގޮތަށް ސަރުކާރުން އަމަލު ނުކުރާނެ ކަމަށެވެ. ނަޒީމް ތަކުރާރު ކުރައްވާ ވިދާޅުވީ ލިސްޓަށް ހުށައަޅާ ޝަކުވާ އަކީ މިހާރު އޮތް ނިންމުން ބަދަލުވާނެ ފަދަ ޝަކުވާއެއް ނަމަ ރަނގަޅަށް ދިރާސާކޮށް ބަލާނެ ކަމަށެވެ.
"ވީއެންމެ ތަފްސީލެއް ކޮށް އަޅުގަނޑުމެން ބަލަމުން ގެންދާނަން. ފަހަރުގައި ލިސްޓަށް ބަދަލު އައުމުގެ ފުރުސަތު އޮވެދާނެ. ހުށައެޅޭ ޝަކުވާއަކާ ގުޅިގެން އިތުރު ބަދަލުތަކެއް ލިސްޓަށް އަތުވެދާނެ,"
ނަޒީމް ވަނީ ފްލެޓް ލިސްޓާމެދު އޮތް ޝަކުވާއެއް ހުށައަޅަން އާންމުންނަށް ވެސް ފުރުސަތު އޮތްކަން ފާހަގަކޮށް އެފަދަ ޝަކުވާއެއް އޮތްނަމަ ހުށައެޅުމަށް އެދިފަ އެވެ.
Advertisement
This content is created and paid for by advertisers and does not involve Voice Journalists
