ރޯދައަށްފަހު ބަދަލު ނުކުރެވިހުރި، ހުރިހާ ކަރަންޓް މީޓަރުތައް ސްމާޓް މީޓަރަށް ބަދަލުކުރުމުގެ މަސައްކަތް ފަށާނޭކަމަށް ސްޓެލްކޯއިން ބުނެފިއެވެ.
ދައުލަތުގެ މީޑިއާގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ ވިދާޅުވީ، ރޯދަ ނިމުމާއެކު މިހާރު ބަދަލުނުކޮށް ހުރި ހުރިހާ މީޓަރުތައް ސްމާތް މީޓަރަށް ބަދަލުކޮށް ނިންމާނޭކަމަށެވެ. ފަހުމީ ވިދާޅުވީ މީޓަރުތައް ބަދަލުކުރާނީ ސްޓެލްކޯގެ ހަރަދުގައި ކަމަށާއި އެކަމަށް އެއްވެސް ރައްޔިތަކު ހަރަދެއް ކުރާކަށެއް ނުޖެހޭނޭ ކަމަށެވެ.
ފަހުމީ ވިދާޅުވީ ސްމާޓް މީޓަރަށް ބަދަލުވުމުގެ ގޮތުން ފަށާފައިވާ މަޝްރޫޢު ކުރިއަށްއޮތް 9 މަސްދުވަހުގެ ތެރޭގައި ނުވަތަ އަހަރެއްހާ ދުވަހުގެ ތެރޭގައި ނިންމާލައި ހިދުމަތް ދެވޭނޭ ކަމަށެވެ. ސްމާޓް މީޓަރަށް ބަދަލުވުމުން ރިއަލް ޓައިމްގައި ކަސްޓަމަރުންނަށް ބިލާބެހޭ ހުރިހާ މައުލޫމާތުތައް ފޯނުން ބަލާލެވޭނޭކަމަށް ފަހުމީ ފާހަގަކުރެއްވިއެވެ.
ފަހުމީ ވިދާޅުވީ ކަރަންޓް ބިލާ ގުޅޭގޮތުން ރައްޔިތުންގެ ހިތުގައި އުފެދެމުންދާ ޝަކުވާތަކަށް މި ސަރުކާރުން ހައްލު ގެންނާނޭ ކަމަށެވެ.
ކަސްޓަމަރުންނަށް ބިލާ ދޭތެރޭގައި ޝަކުވާ ކުރުމުގެ ކުރިން އެބޭފުޅުންނަށް އެނގިލައްވާނެ ކަރަންޓް ބޭނުންކުރެވިފައިހުރިގޮތް. މިއީ އިގްތިސާދު ކުރުމަށް ލިބިގެންދާނެ ވަރަށްބޮޑު ފުރުސަތެއް
ސްޓެލްކޯގެ މެނޭޖިންގ ޑިރެކްޓަރު ފަހުމީ ވިދާޅުވިއެވެ
ސްޓެލްކޯއިން ކަރަންޓް މީޓަރުތައް ސްމާޓް މީޓަރަށް ބަދަލުކުރުމުގެ ގޮތުން ޓެސްޓްކުރުމުގެ މަރުހަލާގެ މަސައްކަތް ފަށާފައިވަނީ 2021 ވަނަ އަހަރެވެ. އޭގެ ފަހުން އެކި ފަހަރުމަތިން މީޓަރުތައް ސްމާޓް މީޓަރަށް ބަދަލުކުރުމުގެ މަސައްކަތް ވަނީ ކުރިއަށްގެންގޮސްފައެވެ.
Advertisement
This content is created and paid for by advertisers and does not involve Voice Journalists
