މިޔަންމާގެ ރޮހިންގާ ދަރިކޮޅުގެ މުސްލިމުންގެ ހައްޤުގައި އިންޓަރނޭޝަނަލް ކޯޓް އޮފް ޖަސްޓިސް (އައި.ސީ.ޖޭ.)ގައި ކުރިއަށްދާ މައްސަލައިގެ ތެރެއަށް ރާއްޖެއިން ތަދައްޚުލުވާން ނިންމިކަމުގެ ލިޔުން ހުށަހަޅައިފިއެވެ.

މި މައްސަލައަކީ، މިޔަންމާގައި ރޮހިންޖާ ދަރިކޮޅުގެ މުސްލިމުންނާ ދެކޮޅަށް ހިންގަމުންދާ އަނިޔާވެރި ލާއިންސާނީ ޢަމަލުތަކާ ގުޅިގެން، ދަ ގެމްބިއާ އިން، މިޔަންމާއާ ދެކޮޅަށް 2019 ވަނަ އަހަރުގެ ނޮވެމްބަރުމަހުގެ 11 ވަނަ ދުވަހު އައި.ސީ.ޖޭ. އަށް ހުށަހަޅާފައިވާ މައްސަލައެކެވެ. މި މައްސަލައަށް ތަދައްޚުލުވުމަށްއެދި ރާއްޖެއިން ހުށަހެޅި ހުށަހެޅުންއައިސީޖޭއިން ބަލައިގަނެފައިވަނީ މިދިޔަ އަހަރުގެ ފެބުރުއަރީމަހުގެ ތިންވަނަ ދުވަހުއެވެ. އެއާއެކު ރާއްޖެއިން ތަދައްޚުލުވާ މަޢުޟޫއާ ގުޅޭގޮތުން ލިޔުމުން އޮބްޒަރވޭޝަންސް ހުށަހެޅުމަށްވަނީ ދަޢުވަތު ދީފައެވެ.

މި މައްސަލާގައި ރާއްޖޭގެ ފަރާތުން ލިޔުމުން ހުށަހަޅާ އޮބްޒަރވޭޝަންސް، ހުށަހަޅާފައިވަނީ މިދިޔަ ހުކުރުދުވަހުއެވެ. މި މައްސަލައަށް ރައްޖޭގެ ފަރާތުން ކަނޑައަޅާފައިވާ އޭޖެންޓަކީ ބަންޑާރަނައިބު އަލްއުސްތާޛު އަޙްމަދު އުޝާމެވެ.

Advertisement

މި މައްސަލައަށް ރާއްޖެއިން ހުށަހެޅި ލިޔުމުގައި އަލިއަޅުވާލާފައިވާނީ، ޤަތުލު ޢާންމުގެ ކުށް ހުއްޓުވުމާއި އަދަބު ދިނުމާގުޅޭ މުޢާހަދާގެ މާއްދާތަކުގެ މާނަކުރުމަށެވެ. އެގޮތުން ވަކިން ޚާއްޞަކޮށް، އެ މުޢާހަދާގެ 1، 4، 5، އަދި 6 ވަނަ މާއްދާތަކުގެ ދަށުން "ޑިއުޓީ ޓު ޕަނިޝް ޖެނޮސައިޑް" މާނަކޮށްފައިވާ ގޮތަށް އަލިއަޅުވާލާފައިވާނޭކަމަށް އޭޖީ އޮފީހުން ބުނެއެވެ.

އޭޖީ އޮފީހުން ބުނީ ރޮހިންޖާގެ މުސްލިމުންނަށް ޢަދުލު އިންސާފު ހޯދައިދިނުމަށާއި، ޤަތުލު ޢާންމުގެ ކުށް ހުއްޓުވުމާއި އަދަބު ދިނުމާގުޅޭ މުޢާހަދާ ތަންފީޛުކުރުމަށް ބައިނަލްއަޤްވާމީ މައިދާނުގައި ކުރާ މަސައްކަތްތަކަށް ރާއްޖެއިން އަބަދުވެސް އެއްބާރުލުން ދިނުމުގައި ސާބިތުކަމާއެކު ދެމިއޮންނާނޭ ކަމަށެވެ.