ނިމިގެންދިޔަ ގަދައިގައި ވިއްސާރަވެހިގެންނާއި، ކަނޑު ގަދަވެ، ވައިގަދަވުމުގެ ސަބަބުން ކަނޑުމަތީގެ އެކިއެކި ހާދިސާތައް ވަނީ ހިނގާފައެވެ. މީގެ ތެރެއިން އެންމެ ފާހަގަކޮށްލެވުނު އެއް ހާދިސާއަކީ މިދިޔަ އާދިއްތަދުވަހު 48 މީހުންނާއެކު ދިގުރަށުން މާލެއަށް ދަތުރުކުރި ލޯންޗެއް ދިޔަވެ، އަޑިއަށް ދިޔަ ހާދިސާއެވެ. އެ ހާދިސާ ހިނގިއިރު، އެ ލޯންޗްގައި އަންހެނުންނާއި ޓޫރިސްޓުންގެ އިތުރުން ކުދަކުދިންވެސް ތިއްބެވެ. ގިނަ ބައެއްގެ ސަމާލުކަން އެ ހާދިސާއަށް ލިބުނު އެންމެ ބޮޑު ސަބަބަކީ އެ ލޯންޗުގައި ކުޑަކުދިން ތިބުމެވެ.

ހުވަން ލޯންޗް އަޑިއަށްދިޔަ ހާދިސާ ހިނގިތާ ދެދުވަސްފަހުން އެ ލޯންޗް އަޑިއަށްދިއުމުގެ ހާދިސާ ހިނގިވަގުތު ލޯންޗުގައި އިން ޓޫރިސްޓަކު ނަގާފައިވާ ވީޑިއޯއެއް ވަނީ ބޭރުގެ މީޑިއާގެ ސަމާލުކަމަށް އައިސްފައެވެ. މި ވީޑިއޯއިން ފެންނަ މަންޒަރުތަކަށް ބަލާއިރު، ލޯންޗް ދިޔަވެ އަޑިއަށްދިއުމުގެ ކުރިން އޭގައި ތިބި މީހުން ލައިފްޖެކެޓް އެޅުމަށް ތައްޔާރުވަމުންދިޔަކަން އެނގެއެވެ. މިއީ މި ހާދިސާއިން އެންމެ ކަންބޮޑުވާ ކަމެއްގެ ގޮތުގައި ފާހަގަކުރެވުނު މަންޒަރެވެ. 

އާދިއްތަ ދުވަހަކީ މޫސުން ގޯސް ދުވަހެކެވެ. އެކަން މެޓް އޮފީހުން ނެރެފައިވާ ސަމާލްތަކަށް ބަލާލުމުން އެނގެއެވެ. ހުވަން ލޯންޗް ދަތުރަށް ފެށުމުގެ ވަގުތުކޮޅެއް ކުރިންވެސް އޮތީ ބ. އަތޮޅުން ފެށިގެން ދ. އަތޮޅަށް އޮރެންޖު ސަމާލް ނެރެފައެވެ.

އަދި އޮރެންޖް ސަމާލްގެ ވަގުތު ހަމަވުމަށްފަހުވެސް މެޓް އޮފީހުން ވަނީ ވިލާގަނޑުގައި ވައިގަދަވާނެކަމަށް ލަފާކޮށް އެދުވަހުގެ 11:00 ގެ ނިޔަލަށް މެދުރާއްޖެތެރެއަށް ރީނދޫ ސަމާލް ނެރެފައެވެ. ހުވަން ލޯންޗް ދިޔަވެ އަޑިއަށްގޮސްގެން އެކަމުގެ ރިޕޯޓް ފުލުހުންނަށް ލިބުނުކަމަށް ބުނެފައިވަނީ 07:57 ގައެވެ. 

މޫސުމާ ބެހޭ އިދާރާގެ އެންގުންތަކަށް ބަލާއިރު، ހުވަން ލޯންޗުން އެދުވަހު ފުރާފައިވަނީ މާބޮޑަށް މޫސުމަށް ސަމާލުކަން ނުދީކަން ބުނެވެން އެބައޮތެވެ.

ޓޫރިސްޓް މީހާ ނެގި ވީޑިއޯއިން އެނގޭގޮތުގައި ހުވަން ލޯންޗުގައި ތިބި މީހުން އެދުވަހު ލައިފްޖެކެޓް އަޅާފައިވަނީ ހާދިސާ ހިނގުމާއެކުގައިކަން ފާހަގަކޮށްލެވެއެވެ. ލޯންޗްފަހަރުތަކުގައި ދަތުރުކުރާއިރު، އެ ލޯންޗަކުން ދަތުރުކުރާ ދަތުރުވެރިންގެ ލައިފްޖެކެޓް އަޅުވާކަމަށް ފާހަގަކުރެވެނީ ރިސޯޓްތަކުގެ ލޯންޗް ފަހަރުތަކުގައެވެ. މީގެ އިތުރުން ފުލުހުންނާއި އެމްއެންޑީއެފްގެ ލޯންޗްތަކުގައި ދަތުރުކުރާއިރު ކަނޑުގަދަވިޔަސް ނުވިއަސް ތިބެންޖެހެނީ ލައިފް ޖެކެޓް އަޅައިގެންނެވެ. ނަމަވެސް އަތޮޅު ތެރެއިން މާލެއަށް ދަތުރުކުރާ ލޯންޗްފަހަރުތަކުގައި އެކަމެއް ނުފެނެއެވެ. ޓޫރިސްޓުން ތިއްބަސް އެކަންއޮތީ އެހެންނެވެ. ފެރީކުރުމުގެ ޤަވާއިދުގައި ބުނެފައި އޮންނަނީ ލައިފްޖެކެޓް އޮންނަން ޖެހޭނީ ދަތުރުކުރާ މީހާއަށް ފަސޭހައިން އަތުޖެހޭނެ ހިސާބެއްގައިކަަމަށެވެ.

ހުވަން ލޯންޗް އަޑިއަށްދިޔަ އެ ހާދިސާއަކީ އެހާ ގިނަ މީހުންނާއެކު މިފަހުގެ ތާރީހެއްގައި ހިނގި އެފަދަ ފުރަތަމަ ހާދިސާއެވެ. އެ ހާދިސާގައި ލޯންޗް އަޑިއަށްގޮސް ލޯންޗުން ދަތުރުކުރި މީހުން ކަނޑުވިނަމަވެސް މީހެއްގެ ފުރާނަ ގެއްލުންފަދަ ކަމެއް ނުވެއެވެ. އޭގެ ކުރިން ކަނޑުވި މީހުންތައް ވަނީ ފުލުހުންގެ އެހީތެރިކަމާއެކު ސަލާމަތްކޮށްފައެވެ. ނަމަވެސް ލޯންޗުން ދަތުރުކުރި މީހުންގެ ދަބަސްތަކާއި ފޮށިތައް ގެއްލުނުކަން ފާހަގަކޮށްލެވެއެވެ.