ޕޯސްޓްމެދުވެރިކޮށް ރާއްޖެ އެތެރެކުރަން އުޅުނު 1.070 ކިލޯގެ މަސްތުވާތަކެތި ކަސްޓަމްސްއިން އަތުލައިގަނެފިއެވެ.

ކަސްޓަމްސްއިން ބުނީ އެތަކެތި އަތުލައިގަނެފައިވަނީ، އިއްޔެ ޕޯސްޓް މެދުވެރިކޮށް ރާއްޖެ ގެނެސްފައިވާ ޕެކޭޖެއް ބަލައި ފާސްކުރަމުންދިޔައިރު، އޭގެ ތެރޭގައި މަސްތުވާތަކެތި ފޮރުވާފައިހުރިކަމަށް ކަސްޓަމްސްއަށް ޝައްކުކުރެވިގެން އިތުރަށް ބެލި ބެލުމުންނެވެ. 

އެ ޕެކޭޖް ބަލާފާސްކުރިއިރު ޕެކޭޖުގެ ތެރެއިން ފެނުނު މަސްތުވާތަކެތިކަމަށް ޝައްކުކުރެވޭ ތަކެތި ފުރަތަމަ މަރުހަލާގައި ތަހްލީލުކުރިއިރު، އެތަކެތި ވަނީ މަސްތުވާތަކެތީގެ ބާވަތެއްކަމަށްވާ ކެނެބިސްއަށް ޕޮޒިޓިވް ވެފައެވެ. ކަސްޓަމްސް އިން ބުނީ ތަކެތީގެ ބަރުދަނުގައި ޕެކިންއާއެކު ޖުމްލަ 1.070 ކިލޯގްރާމް ހުރިކަމަށެވެ. އެތަކެތީގެ މަގުމަތީ އަގަކީ 856،000 ދިވެހި ރުފިޔާކަމަށް ކަސްޓަމްސްއިން ލަފާކުރެއެވެ.

Advertisement

ކަސްޓަމްސްއިން ބުނީ މި މައްސަލަ އިތުރަށް ތަހުގީގުކުރުމަށްޓަކައި އަތުލއިގަނެވުނު މަސްތުވާ ތަކެތި އަދި ޕެކޭޖްބަލާ ކަސްޓަމްސްއަށް އައި 52 އަހަރުގެ ދިވެހި ފިރިހެންމީހާ މިހާރު ފުލުހުންނާ ހަވާލުކޮށްފައިވާކަމަށެވެ.