އިސްރާއީލް ޕާސްޕޯޓް މަނާކުރަން އިމިގްރޭޝަން ގާނޫނަށް އިސްލާހް ގެނައުމަށް  މަޖިލީހަށް ހުށަހަޅާފައިވާ ކަމަށާ، އެ އިސްލާހް ފާސްވުމުން އިސްރާއީލް ޕާސްޕޯޓް މަނާ ކުރަން މަގުފަހުވެގެންދާނެ ކަމަށް ޚާރިޖި ވަޒީރު ޑރ.އަބްދުالله ޚަލީލު ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ވަނީ 2 ޖޫން 2024 ވަނަ ދުވަހު، އިސްރާއީލް ޕާސްޕޯޓް މަނާ ކުރުމަށް ރައީސުލްޖުމްހޫރިއްޔާ ނިންމެވި ނިންމުން މިހާތަނަށް އައި އިރުވެސް ތަންފީޒު ނުވެ އޮތީ ކީއްވެތޯ ސުވާލު ކުރައްވާފައެވެ.

އެ ސުވާލަށް ލިޔުމުން ޖަވާބު ދެއްވަމުން ވަޒީރު ޚަލީލް ވިދާޅުވީ، ރައީސުލްޖުމްހޫރިއްޔާ ނިންމެވި އެ ނިންމެވުން ތަންފީޒުކުރެއްވުމަށްޓަކައި އިމިގްރޭޝަން ގާނޫނަށް ބަދަލު ގެންނަންޖެހޭ ކަމަށެވެ. އަދި އެ ގާނޫނަށް ހުށަހަޅާފައިވާ އިސްލާހް މިވަގުތު އޮތީ މަޖިލީހުގެ ސަލާމަތީ ޚިދުމަތްތަކާ ބެހާެ ކޮމިޓީގައި ކަމާ ގުޅުންހުރި އެކިއެކި ފަރާތްތައް ހާޒިރުކޮށްގެން ދިރާސާ ކުރުމުގެ މަރުހަލާގައި ކަމަށެވެ. 

”މި ދެންނެވި އިސްލާހު ގާނޫނަކަށް ވުމާއެކު، ސަރުކާރުގެ ނިންމުން ތަންފީޒު ކުރުމަށް މަގުފަހިވެގެންދާނެ“ ވަޒީރު ޚަލީލްގެ ޖަވާބުގައި ވިދާޅުވެފައިވެއެވެ. 

އިޒްރޭލް މީހުން ރާއްޖެ އައުން މަނާ ކުރުމަށް އިމިގްރޭޝަން ގާނޫނަށް ހުށަހާޅާފައިވާ އިސްލާހަށް ހިޔާލު ހޯދުމަށް މަޖިލީހުގައި ސަލާމަތީ ހިދުމަތްތަކާ ބެހޭ ކޮމިޓީ، 241 ކޮމިޓީއަށް ކަމާގުޅުންހުރި އެކިއެކި ފަރާތްތައް ވަނީ މަޖިލީހުގެ މިދިޔަ ދައުރުގައި ވެސް ހާޒިރުކޮށްފައެވެ. 

އެގޮތުން، ގެސްޓްހައުސް އެސޯސިއޭޝަނުގެ ވެރިން ހާޒިރު ކުރުމުން އެފަރާތްތަމުން އެދިފައިވަނީ ”ޓާގެޓެޑް އެޕްރޯޗެއް“ ނުވަތަ ވަކި ބަޔަކު މަނާކުރުން ކަމަށެވެ. އެ އެސޯސިއޭޝަނުން އެދުނީ އިސްރާއިލުން ސިފައިންވެސް ނުހިމެނޭ ގޮތަށް ވެރިންގެ ޕާސްޕޯޓް މަނާކުރުމަށެވެ.

ގެސްޓްހައުސް އެސޯސިއޭޝަނުން އެދުނު ގޮތަށް ތާއީދުކޮށް މަޓާޓޯއިންވެސް އެދުނީ އެގޮތުގެ މަތީން އިސްރާއީލް ޕާސްޕޯޓް މަނާ ކުރުމަށެވެ.