އިސްރާއީލްގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ، ކޮރަޕްޝަންގެ ދަޢުވާތަކާ ގުޅިގެން ތެލްއަވީވް ޑިސްޓްރިކްޓް ކޯޓަށް އަނެއްކާވެސް ހާޒިރުކޮށްފިއެވެ.

އިސްރާއީލްގެ މީޑިއާއިން ރިޕޯޓުކުރި ގޮތުގައި މިއީ 2024 ވަނަ އަހަރުގެ ޑިސެމްބަރު 10 ވަނަ ދުވަހު އަލުން ފެށުނު ކޮރަޕްޝަން މައްސަލައިގެ ޝަރީޢަތުގައި ނަތަންޔާހޫ ކޯޓަށް ހާޒިރުވި 16 ވަނަ ފަހަރެވެ.

އިސްރާއީލްގެ އާމީ ރޭޑިއޯއިން ބުނާ ގޮތުގައި ނަތަންޔާހޫ އިތުރު 8 ޝަރީޢަތުގެ އަޑުއެހުމަށް ހާޒިރުވާން ޖެހޭނެއެވެ. އޭނާއާ ދެކޮޅަށް ކުރެވިފައިވާ ދަޢުވާތަކުން ދިފާޢުވުމަށް ކޯޓަށް ހާޒިރުވަނީ ހަފްތާއަކު ދެ ފަހަރުއެވެ.

ނަތަންޔާހޫއާ ދެކޮޅަށް 2019 ވަނަ އަހަރު ކުރެވުނު ވަކި ވަކި ތިން މައްސަލައިގެ ތެރޭގައި (ކޭސް 1000، ކޭސް 2000، އަދި ކޭސް 4000) ރިޝްވަތު ހިފުމާއި، މަކަރާއި ހީލަތް، އަދި އިތުބާރާ ޚިލާފުވުމުގެ ދަޢުވާތައް ހިމެނެއެވެ. ނަމަވެސް ނަތަންޔާހޫ މި ހުރިހާ ދަޢުވާތަކެއް ދޮގު ކަމަށް ބުނެ އިންކާރުކުރެއެވެ.

2020 ވަނަ އަހަރުގެ މެއި 24 ވަނަ ދުވަހު ފެށުނު މި ޝަރީޢަތަކީ އިސްރާއީލްގެ ތާރީޚުގައި ވެރިކަމުގައި ހުރި ލީޑަރެއްގެ މައްޗަށް ހިންގޭ ފުރަތަމަ ޖިނާއީ ޝަރީޢަތެވެ. އިސްރާއީލްގެ ޤާނޫނުގެ ދަށުން ސުޕްރީމް ކޯޓުން ކުށްވެރިވެއްޖެކަމަށް ނުނިންމާހާ ހިނދަކު ނަތަންޔާހޫ އިސްތިއުފާ ދޭކަށް ނުޖެހެއެވެ. މި މުޅި ޕްރޮސެސް ނިމުމަށް އެތައް މަހެއް ނަގާނެ ކަމަށް ބެލެވެއެވެ.

މީގެ އިތުރުން، 2023 ވަނަ އަހަރުގެ އޮކްޓޯބަރު 7 އިން ފެށިގެން ޣައްޒާގައި އިސްރާއިލުން ހިންގި ގަތުލު އާއްމުގައި 48,500 މީހުން، ޝަހީދުކޮށްލާފައިވާތީ 2024 ވަނަ އަހަރުގެ ނޮވެމްބަރު މަހު އިންޓަނޭޝަނަލް ކްރިމިނަލް ކޯޓުން ނަތަންޔާހޫ އާއި ކުރީގެ ދިފާޢީ ވަޒީރު ޔޯވް ގަލަންޓް އަށް ހަނގުރާމައިގެ ކުށްތަކާއި އިންސާނިއްޔަތާ ދެކޮޅު ކުށްތަކުގެ ދަޢުވާ އުފުލައި، އެ ދެމީހުން ހައްޔަރުކުރުމުގެ ވޮރަންޓް ނެރެފައިވެއެވެ.