ފުލުހުންގެ ޚިދުމަތް އަތޮޅުތަކަށް ފުޅަކުރުމަށް ފަށްޓަވާފައިވާ މަސައްކަތުގެ ދަށުން، ފުލުހުންގެ ޢިމާރާތް ހަތްދިހަ ފަސް ރަށެއްގައި އެޅުމަށް، ސަރުކާރުގެ 3 ކުންފުންޏަކާ ހަވާލުކޮށްފިއެވެ. އެގޮތުން ހަވާލުކޮށްފައިވަނީ، އެމްޓީސީސީއާއި، އާރްޑީސީގެ އިތުރުން ފެނަކަ ކޯޕަރެޝަނާއެވެ.

މިމަޝްރޫޢުގެ ދަށުން އެމްޓީސީސީން 15 ރަށެއްގައި، އާރްޑީސީއިން 20 ރަށެއްގައި އަދި ފެނަކައިން 40 ރަށެއްގައި ފުލުހުންގެ ޢިމާރާތް ތަރައްޤީކުރުމަށްވަނީ ހަމަޖެހިފައެވެ.

މި އެއްބަސްވުންތަކުގައި ފުލުހުންގެ ފަރާތުން ސޮއިކުރެއްވީ ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ އަދި މެނޭޖިންގ ޑިރެކްޓަރ، ޑެޕިއުޓި ކޮމިޝަނަރ އޮފް ޕޮލިސް ރިޓަޔާޑް އަޙްމަދު ސަޢުދީއެވެ. އަދި އާރްޑީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ، ބްރިގޭޑިއަރ ޖެނެރަލް ރިޓަޔާރޑް ޢަލީ ޒުހައިރެވެ. މީގެއިތުރުން ފެނަކަ ކޯޕަރޭޝަންގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ މޭޖަރ ރިޓަޔަރޑް މުޙައްމަދު ނަޖާޙެވެ.

ފުލުހުން މައުލޫމާތު ދޭގޮތުގައި، މިދައުރު ފެށުނުއިރު ރާއްޖޭގެ މީހުން ދިރިއުޅޭ ރަށްރަށުގެ ތެރެއިން ފުލުހުންގެ ޚިދުމަތް ދެމުންދިޔައީ އެންމެ 17 ސްޓޭޝަނުގައެވެ. އަދި ދައުރު ފެށުނު އިރު ފުލުހުންގެ ޚިދުނަތް ގާއިމް ނުވެވޭ 70 ރަށެއް އޮތެވެ. 

ފުލުހުން ބުނީ، ރޭ ސޮއި ކުރެވުނު އެމްއޯޔޫ ތަކުގެ ދަށުން އާބާދީ އެއްފަސް ކުރުމުގެ ސިޔާސަތުގެ ދަށުން މީހުން ބަދަލުކުރެވޭ ރަށްތައް ފިޔަވައި ހުރިހާ ރަށެއްގައި އެ ޚިދުމަތް ގާއިމް ކުރެވިގެންދާނެ ކަމަށެވެ. އަދި މަޝްރޫޢު ނިމިގެންދާއިރު ރާއްޖޭގެ ގާތްގަނޑަކަށް ދެބައިކުޅަ އެއްބައި ރަށުގައި ފުކުހުންގެ އަމިއްލަ ޒަމާނީ މަރުކަޒުތައް ގާއިމް ކުރެވިގެންދާނެ ކަމަށްވެސް ބުންޏެވެ. އެއާއެކު ފުލުހުންގެ ބަޖެޓްގެ ރިކަރަންޓް ޚަރަދުތައް ކުޑަކޮށް ޚިދުމަތް ދިނުމަށް ކުރެވޭ ޚަރަދުތައް ކުޑަވެގެންދާނެ ކަމަށްވެސް ބުނެފައިވެއެވެ.