ސުޕްރީމް ކޯޓުގެ ފަނޑިޔާރުން ވަކިކުރުމުގެ ބިލު އަނެއްކާ ވެސް އިތުރަށް އިސްލާހުކުރުމަށް ޖުޑިޝިއަރީ ކޮމިޓީއަށް މިއަދު ފޮނުވައިފިއެވެ.

ސުޕްރީމް ކޯޓުގެ ފަނޑިޔާރުން ވަކިކުރުމުގެ ބިލާމެދު އަލުން ވިސްނުމަށް އެދިވަޑައިގެން ރައީސް ޑރ. މުހައްމަދު މުއިއްޒު އެ ބިލު އަނބުރާ މަޖިލީހަށް މިދިޔަ އަންގާރަ ދުވަހު ފޮނުއްވާފައިވާއިރު، މިއަދުގެ މަޖިލީހުގެ ޖަލްސާގައި ވަނީ އެ ބިލަށް އަނެއްކާވެސް ބަހުސް ކޮށްފައެވެ. 

އެ ބަހުސްގައި ބައިވެރިވި ބައެއް މެންބަރުން ވަނީ ބިލަކީ ގާނޫނު އަސާސީއާ ޚިލާފް ބިލެއް ކަމަށްވާތީ، ބިލް މަޖިލީހުގެ ތަޅުމުން ބޭރުކުރުމަށް ގޮވާލާފައެވެ. 

Advertisement

ނަމަވެސް، ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު ވަނީ އަލުން ބިލު އެކަމާ ގުޅުން ހުރި ކޮމިޓީއަށް ފޮނުވުމަށް ހުށަހަޅުއްވައިފައެވެ. އެ ހުށަހެޅުއްވުމަށް މިލަންދޫ ދާއިރާގެ ޕީއެންސީ މެންބަރު ހަސަން މުފީދު ތާއިދު ކުރެއްވުމުން، ބިލު ކޮމިޓީއަށް ފޮނުވުމާމެދު ގޮތެއް ނިންމުމަށް ވަނީ ވޯޓަށް އަހާފައެވެ. 

ވޯޓުގައި ބައިވެރިވި 50 މެންބަރުން ވަނީ ހުށަހެޅުން ފާސްކުރުމަށް ވޯޓު ދެއްވައިފައެވެ. ދެކޮޅަށް ވޯޓުދެއްވީ ހަތް މެންބަރުންނެވެ.