ޗައިނާ-ރާއްޖެ ފްރީޓްރޭޑް އެއްބަސްވުން (އެފްޓީއޭ) ގެ ސަބަބުން ދިވެހިރާއްޖެއަށާއި އަވަށްޓެރި ގައުމުތަކަށް، ޚާއްސަކޮށް އިންޑިޔާއަށް ކުރާނެ އެއްވެސް ފައިދާއެއް ނެތް ކަމަށް ކުރީގެ ރައީސް، މުޙައްމަދު ނަޝީދު ވިދާޅުވެއްޖެއެވެ.
އިންޑިޔާގެ ނޫހަކަށް ދެއްވި ޚާއްސަ ބަސްދީގަތުމެއްގައި، ނަޝީދު ވަނީ މިއަހަރުގެ ޖަނަވަރީ މަހުން ފެށިގެން އަމަލުކުރަން ފަށާފައިވާ ޗައިނާ ރާއްޖެ އެފްޓީއޭއާ ގުޅޭގޮތުން އެމަނިކުފާނު ދެކެވަޑައިގަންނަވާގޮތް ހިއްސާ ކުރައްވާފައެވެ.
އެގޮތުން ނަޝީދު ވިދާޅުވީ، އެ އެއްބަސްވުމަށް އަމަލުކުރަން ފެށުމަކީ ވަރަށް ކަންބޮޑުވެލައްވާ ކަމެއް ކަމަށެވެ. އެހެނީ އެއިން ރާއްޖެއާއި އިންޑިޔާއަށް އެއްވެސް ފައިދާއެއް ކުރާތަން އެމަނިކުފާނަށް ފެނުވަޑައިނުގަންނަވާ ކަމަށެވެ.
”އެހެންކަމުން އަޅުގަނޑު ބޭނުންވަނީ ދިވެހި ސަރުކާރުން މިކަމާ ގުޅޭގޮތުން އިންޑިޔާއާއިއެކު މަޝްވަރާކޮށް ހައްލެއް ހޯދުމަށް“ ނަޝީދު ވިދާޅުވުއެވެ.
މިއާއެކު ނަޝީދު ވަނީ، އެފްޓީއޭ އެއްބަސްވުމުން 2018 ވަނަ އަހަރުވެސް އޮތްކަން ފާހަގަކުރައްވައި ނިމިދިޔަ އެމްޑީޕީ ސަރުކާރުގައި އެއަށް އަމަލުކުރަން ނުފެށި އޮތީ ސަބަބުތަކެއް އޮވެގެންކަމަށް ވިދާޅުވެފައެވެ.
އެގޮތުން ވިދާޅުވީ، އެ އެއްބަސްވުމުގެ ސަބަބުން ބޮޑަށް ފައިދާވާނީ ޗައިނާއަށް ކަމަށެވެ. އެހެނީ، ރާއްޖެއިން ޗައިނާއަށް ބޭރުކުރަނީ ވަރަށް މަދު ބާވަތްތަކެއް ކަމަށާ ނަމަވެސް ޗައިނާއިން ރާއްޖެއަށް ވަރަށް ގިނަ މުދާ އެތެރެކުރާ ކަމަށެވެ. އެހެންކަމުން، ރާއްޖެއިން ބޭރުވާ ފައިސާ އިތުރުވެގެންދާނެ ކަން ނަޝީދު ފާހަގަކުރެއްވިއެވެ.
” އަޅުގަނޑަށް ޔަގީން މި އެއްބަސްވުމަކީ އިންޔާ ސަރުކާރުގެވެސް ކަންބޮޑުވުން އޮތް އެއްބަސްވުމެއް. އަދި ދިވެހި ސަރުކާރުން އެ އެއްބަސްވުމަށް އަމަލުކުރަން އެ ގައުމުން ބޭނުމެއްވެސް ނުވާނެ. އެހެންކަމުން އެ މައްސަލަ ހައްލުކުރުމަށް އިންޑިޔާއާ އެކު މަޝްވަރާ ކުރާނެ ކަމަށް އަޅުގަނޑު އުއްމީދުކުރަން. “ ނަޝީދު ވިދާޅުވިއެވެ.
ރާއްޖެއިން ޗައިނާއާ އެކު މިނިވަން ވިޔަފާރީގެ އެއްބަސްވުމެއްގަައި ސޮއިކުރީ ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ވެރިކަމުގައި 2014 ވަނަ އަހަރުގެ ޑިސެމްބަރު މަހުގެ ތެރޭގައެވެ.
ނަމަވެސް، ރައީސް އިބްރާހިމް މުހައްމަދު ޞާލިޙްގެ ސަރުކާރުން މިނިވަން ވިޔަފާރީގެ އެއްބަސްވުމަށް އަމަލުކުރަން ފަށައިފައެއް ނުވެއެވެ. އެއަށް އަމަލުކުރަން ފެށީ މި ސަރުކާރުން މި އަހަރުގެ ޖެނުއަރީ އެއްވަނަ ދުވަހުން ފެށިގެންނެވެ.
Advertisement
This content is created and paid for by advertisers and does not involve Voice Journalists
