ރަމަޟާންމަހުގެ ފަހު 10 އެއް ސަރުކާރު ބަންދުވިނަމަވެސް، އާއްމު ވިޔަފާރިތަކަށް ދަތިނުވާގޮތަށް އިކޮނޮމިކް މިނިސްޓްރީގެ ހިދުމަތްތައް ދެމުންގެންދަނޭކަމަށް އެ މިނިސްޓްރީން ބުނެފިއެވެ.

ސަރުކާރުން ވަނީ ރަމަޟާންމަހު ފަހު ދިހައަކާއި، ގުޅިގެން ސަރުކާރު ބަންދުވާ ދުވަސްތަކުގައި އެ މިނިސްޓްރީގެ ހިދުމަތްތައް މެދުނުކެނޑި ދެވޭނެ އިންތިޒާމުތަކެއް ހަމަޖައްސާފައިވާކަމަށެވެ. އެގޮތުން ވިޔަފާރިއާ ބެހޭ ހިދުމަތްތައް ވަންގަވް އަދި ބިޒްނަސް ޕޯތަލް މެދުވެރިކޮށް ހުށަހަޅާ އެޕްލިކޭޝަންތައް ހުކުރު، ހޮނިހިރު ފިޔަވައި ކޮންމެ ދުވަހެއްގެ ހެނދުނު 09:30 ހުން 11:30 ގެ ނިޔަލަށް ޕްރޮސެސް ކުރުން ކުރިއަށް ގެންދާނޭކަމަށް އިކޮނޮމިކް މިނިސްޓްރީން ބުނެއެވެ. އަދި މި މުއްދަތުގެ ތެރޭގައި ހިދުމަތަށް އެދެމުންދާ މިންވަރު އިތުރުވެއްޖެ ނަމަ، މިނިސްޓްރީން އާއމްުކޮށްފައިވާ ސަރވިސް ޕްރޮސެސިން ގަޑިތަކަށް ބަދަލު އަންނާނޭކަމަށެވެ.

މީގެ އިތުރުން ފޮރިން އިންވެސްޓްމަންޓާބެހޭ އެޕްލިކޭޝަންތައް [email protected] އަށް އީމެއިލްކުރުމަށް އިކޮނޮމިކް މިނިސްޓްރީން ވަނީ އެދިފައެވެ. މީގެ އިތުރުން އެކަމާ ގުޅޭ މައުލޫމާތު ހޯދުމަށް ނުވަތަ ހުށަހަޅާ އެޕްލިކެޝަނާ ބެހޭގޮތުން ހުކުރު، ހޮނިހިރު ދުވަސް ފިޔަވައި ކޮންމެ ދުވަހެއްގެ ހެނދުނު 09:30 ހުން ފެށިގެން 11:30 އަށް 3333181 ނުވަތަ 3333182 ނަމްބަރަށް ގުޅުމުން މައުލޫމާތު ފޯރުކޮށްދޭނޭކަމަށް މިނިސްޓްރީން ބުންޏެވެ. 

Advertisement

މީގެ އިތުރުން ބައްދަލުކުރައްވަން ބޭނުންވާ ފަރާތްތަކަށް އޮންލައިނުކޮށް ބައްދަލުވުންތައް ބޭއްވުމުގެ އިންތިޒާމް ހަމަޖެހިގެންދާނޭކަމަށްވެސް އިކޮނޮމިކް މިނިސްޓްރީން ބުނެއެވެ.