ޕާކިސްތާނުގައި 2022 އަހަރު ހިނގާދިޔަ ފެންބޮޑުވި ހާދިސާގައި ހާލުގައިޖެހުނު މީހުންނަށް ދިވެހިންގެ އެހީގައި އެޅި 32 ގެ އިންޓަރނޭޝަނަލް އެއިޑް ކެމްޕެއިން ޖަމިއްޔާއިން ހަވާލުކޮށްފިއެވެ.

އައިއޭސީން އެ ގެތަށް އެޅުމުގެ މަސައްކަތް ކުރިއަށްގެންގޮސްފައިވަނީ ޕާކިސްތާނަށް ކުރިމަތިވި ފެންބޮޑުވުމުގެ ހާދިސާއަށްފަހު އެ ސަރަހައްދަށް ޒިޔާރަތްކޮށް ހާލަތުބަލައި، ދިރާސާކުރުމަށްފަހުއެވެ. ދިވެހިންގެ ދީލަތި އެހީތެރިކަމާއެކު އައިއޭސީން މި ޕްރޮޖެކްޓް ކުރިއަށް ގެންގޮސްފައިވަނީ އަލް ހައިރާ ގުޅިގެން ޕާކިސްތާނުގެ ޕަންޖާބުގެ އިހްސާން ޕޫރުގައެވެ. އެ އަވަށަކީ މޮޑެލް ވިލެޖެއްގެ ގޮތުގައި ތަރައްޤީ ކުރަމުންދާ ހިސާބެކެވެ.

އައިއޭސީން ބުނީ 32 އާއިލާއަށް މި ގެތަށް ހަދިޔާކުރީ މި ރޯދަމަހުގެ ތެރޭގައެވެ. މިއިން ކޮންމެ ގެއެއްގައި 5 ކާއި 7 ކާ ދެމެދުގެ އަދަދަކަށް މީހުން އުޅޭއިރު، މި ގެތަށް ހަދާފައިވަނީ އެތަނުގައި ދިރިއުޅޭ މީހުން އެންމެ ބޭނުންވާ ގޮތަށް ބަލައިގެންކަމަށް އައިއޭސީން ބުނެއެވެ. މި ގެތައް ހަދާފައިވަނީ، ކޮންމެ ގެއަކަށް ވަކިން ފެންވަޅަކާއި، ދެ ކޮޓަރި ހިމަނައި ފާހާނާ ކުރެވޭގޮތަށެވެ. މީގެ އިތުރުން ކޮންމެ ގެއެއްގައި ވަނިކް ހުސްތަންކޮޅެއް އޮވެއެވެ.

ދިވެހިންގެ އެހީގައި އައިއޭސީން ޕާކިސްތާނުގައި ހެދި ގެތައް... ފޮޓޯ: އައިއޭސީ

އައިއޭސީން ބުނީ މި ގެތަށް ހަދިޔާކުރީ އެމީހުން އަމިއްލަ ފައިމައްޗަށް ތެދުވެ ދިރިއުޅުން ބިނާކުރުމުގެ މަޤްސަދުގައި ކަމަށާއި، މިއީ މި ރަމަޟާންމަހު އެމީހުންނަށް ލިބުނު އެންމެ ބޮޑު ހަދިޔާކަމަށެވެ.

"ގެތައް ލިބުނު މީހުން ތިބީ ވަރަށް އުފާވެފައި. އަދި ދިވެހިންގެ ފަރާތުން މި ލިބުނު ހަދިޔާ އެމީހުން ބަލައިގަތީ ވަރަށް އުފާވެފައިތިވެ، ޝުކުރުވެރިވާ ހާލުގައި" ވޮއިސްއަާ މައުލޫމާތު ހިއްސާކުރަމުން އައިއޭސީގެ އޮފިޝަލަކު ވިދާޅުވިއެވެ.

ދިވެހިންގެ އެހީގައި އައިއޭސީން ޕާކިސްތާނުގައި ހެދި ގެތައް... ފޮޓޯ: އައިއޭސީ

ޕާކިސްތާނަށް 2022 ވަނަ އަހަރު ކުރި ވިއްސާރާގައި ފެންބޮޑުވުމުގެ ސަބަބުން 33 މިލިއަނަށްވުރެ ގިނަ މީހުންނަށް އެކަމުގެ އަސަރުތައް ކުރިއިރު، 1،800 އަށްވުރެ ގިނަ މީހުންވަނީ މަރުވެފައެވެ. މި ހާދިސާގައި 9 މިލިއަނަށްވުރެ ގިނަ މީހުން ހާލުގައި ޖެހުނުކަމަށް ޕާކިސްތާނުގެ ކަމާބެހޭ އިދާރާތަކުން ވަނީ ބުނެފައެވެ.