ހުޅުމާލޭ ކޮންޓެއިނާ ޕާކު ސަރަހައްދުގައި ހުންނަ "ހިޔަލަމާކެޓް ކިއޯސްކު" ތައް އަހަރުދުވަހަށް ކުއްޔަށް ދޫކުރުމަށް ބިޒްނަސް ސެންޓަރ ކޯޕަރޭޝަނުން ނިންމައިފިއެވެ.

މިކަމާ ގުޅޭގޮތުން ބިޒްނަސް ސެންޓަރ ކޯޕަރޭޝަން (ބީސީސީން) ބުނީ، "ހިޔަލަ ވީކެންޑް މާކެޓު"ގެ ނަމުގައި ޤާއިމުކޮށްފައިވާ އެ ސަރަހައްދަށް ލިބެމުންދާ ތަރުޙީބަށް ބަލައި، އެ ސަރަހައްދުގެ ނަން "ހިޔަލަ މާކެޓް"އަށް ބަދަލުކޮށް، ވިޔަފާރީގެ ބޭނުމަށް ކޮންމެ ދުވަހަކުވެސް އެތަން ހުޅުވުމަށް ނިންމާފައިވާކަމަށެވެ. ބީސީސީން މިގޮތަށް ނިންމާފައިވަނީ، އަންހެން ވިޔަފާރިވެރިންނަށް ވިޔަފާރީގެ އިތުރު ފުރުސަތުތަކެއް ފަހިކުރުމުގެ ގޮތުން މިނިސްޓްރީ އޮފް އިކޮނޮމިކް ޑިވެލޮޕްމެންޓް އެންޑް ޓްރޭޑްގެ އިސްނެގުމާއެކުގައެވެ.

ބީސީސީން ބުނީ، ދިވެހި އަންހެން ވިޔަފާރިވެރިންނަށް ވިޔަފާރީގެ އިތުރު ފުރުސަތު ފަހިކޮށް ދިނުމުގެ ގޮތުން، ހުޅުމާލޭ ކޮންޓެއިނާ ޕާކް ސަރަހައްދުގައި ބެހެއްޓިފައިވާ ކިއޮސްކްތައް 1 އަހަރު ދުވަހުގެ މުއްދަތަށް ކުއްޔަށް ދޫކުރުމަށް މިހާރު ހުޅުވާލާފައިވާކަމަށެވެ. މި ގެނެވުނު ބަދަލާއެކު، ކިއޮސްކުތައް މެދުވެރިކޮށް ދިވެހި އަންހެން ވިޔަފާރިވެރިންނަށް ވިޔަފާރި ކުރުމުގެ އިތުރު ފުރުސަތުތައް ފަހިވެ، ވިޔަފާރިތައް އިތުރު ހަރުފަތަކަށް ގެންދިޔުމަށް ލިބޭނެ ވަރަށް ބޮޑު ބާރަކަށް ވެގެންދާނެކަމަށް ބީސީސީން ބުނެއެވެ.

"ހިޔަލަ މާކެޓު"ގެ ކިއޮސްކުތަށް ކުއްޔަށް ހިފުމަށް އެދި ފޯމު ހުށަހަޅުމުގެ ފުރުސަތު ހުޅުވާލާފައިވާއިރު، ކިއޮސްކުތައް ކުއްޔަށް ހިފުމަށް ޝައުގުވެރިވާ ފަރާތްތަކުން އޭޕްރިލްމަހުގެ 8 ވަނަ ދުވަހުގެ 16:00ގެ ކުރިން ފޯމް ފުރުމަށްފަހު ހުށަހެޅުމަށް ބީސީސީން ވަނީ އެދިފައެވެ.

ކޮންޓެއިނާ ޕާކްގައި މިދިޔަ އަހަރުގެ ތެރޭގައި ހިޔަލަމާކެޓް ކުރިއަށްގެންގޮސްފައިވާއިރު، ކުދި ވިޔަފާރިތަކުގެ ވަރަށްބޮޑު ޝައުގުވެރިކަމެއް ލިބިގެންގޮސްފައިވާކަމަށް ބީސީސީން ފާހަގަކުރެއެވެ.