ކުދިންގެ ތެރެއިން ކުށައް އަރައިގަންނަ ނުވަތަ ކުށުގެ މާހައުލަށް ވަދެދާނެކަމުގެ ރިސްކު އޮތް ކުދިންނަށް ދާއިމީ ހައްލެއް ހޯދައިދިނުމަކީ މި ސަރުކާރުގެ އަމާޒުކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ، ޑިޕާޓްމަންޓް އޮފް ޖުވެނައިލް ޖަސްޓިސްގެ ވެބްސައިޓް ލޯންޗްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

އެ ރަސްމިއްޔާތުގައި ވާހަކަފުޅުދައްކަވަމުން ވަޒީރު އިޙްސާން ވިދާޅުވީ، އެ ވުޒާރާއިން ކުރަމުންދާ މަސައްކަތަކީ ރާއްޖޭގެ މުޅި އިޖްތިމާއީ ގިއުގަނޑު ބަދަލުކޮށްލުމުގެ މަސައްކަތް ކަމަށެވެ.

Advertisement

އަދި އެ މަސައްކަތް ކާމިޔާބު ވާނީ، ކުށުގެ މާހައުލަށް ކުޑަކުދިން ހުށަހެޅޭ މައްސަލައަށް ދާއިމީ ހައްލެއް ލިބިގެން ކަމަށް އިހްސާން ވިދާޅުވުއެވެ.

"އަޅުގަނޑުމެން މިކުރާ މަސައްކަތަކީ ރާއްޖޭގެ މުޅި އިޖްތިމާއީ ގިއުގަނޑު އެއްކޮށް ބަދަލުކޮށްލުމަށްޓަކައި މީގެ އާހިރު ނަތީޖާ ހޯދުމަށްޓަކައި ކުރާ މަސައްކަތެއް. މި މަސައްކަތް ކާމިޔާބު މަސައްކަތެއްކަމަށް ވާ ހިސާބަކީ އަޅުގަނޑުމެންގެ ތުއްތު ކުދިންގެ ތެރެއިން ކުށައް އަރައިގަންނަ ނުވަތަ ކުށުގެ މާހައުލަށް ވަދެދާނެކަމުގެ ރިސްކު އޮތް ކުދިންނަށް ދާއިމީ ހައްލެއް ހޯދައިދެވޭނެ ދުވަސް. އެދުވަހަކީ އަޅުގަނޑުމެން ބޭނުން އަދުގެ ސަރުކާރުގެ މި ޒައާމަތުގެ ތެރޭގައި އަޅުގަނޑުމެންނަށް ފެންނާނެ ދުވަހެއްކަމަށްވުން. އެކަމުގެ އެންމެ ބޮޑު ޒިންމާއެއް އަދާކުރާނީ މި ޑިޕާޓްމަންޓުން". ވަޒީރު ވިދާޅުވިއެވެ.

އިއްޔެ ލޯންޗުކުރެވުނު ޑިޕާޓްމަންޓް އޮފް ޖުވެނައިލް ޖަސްޓިސްގެ ވެބްސައިޓް  މެދުވެރިކޮށް ޖުވެނައިލް ޖަސްޓިސްއިން ކުރަމުންދާ މަސައްކަތްތަކުގެ މައުލޫމާތު ފަސޭހަކަމާއެކު ބަލާލުމުގެ ފުރުސަތު ފަހިވެފައެވެ.

އެގޮތުން އާންމު މައުލޫމާތުތަކާއި، އަދުލުގެ ޤާނޫނުގެ ދަށުން ޑިޕާޓްމަންޓުން ކުރާ މަސައްކަތްތަކާއި، ޖުވެނައިލް ޖަސްޓިސްގެ މެންޑޭޓްތަކާއި، ގާނޫނުތަކާއި ގަވައިދުތަކާއި، މީޑިއާ ރިޕޯޓްތަކާއި، ތަފާސްހިސާބުތައް އެ ވެބްސައިޓުން ބަލާލެވެއެވެ.