ނޮވެންބަރު ތިނެއްގެ އުދުވާން ގައި ޝަހީދުވި މީހުންގެ އާއިލާތަކަށް އިނާޔަތް ދެއްވަން ފައްޓަވައިފި އެވެ.

ޑިފެންސް މިނިސްޓްރީން ބުނީ ޝަހީދުވި ސިފައިންގެ އާއިލާތަކާއި، އަދި އެ ހަނގުރާމައިގައި ދައްކުވައިދިން އާދަޔާހިލާފު ހިތްވަރު ފާހަގަކޮށް ޝަރަފުގެ ނިޝާން ދެވިފައިވާ ފަރާތްތަކަށް އިނާޔަތް ދިނުން ނިންމާފައިވާ ކަމަށެވެ. އެ ގޮތުން އާއިލާގެ ކޮންމެ މީހަކަށް މަހަކު 9،000 ރުފިޔާގެ އިނާޔަތެއް ދޭން ވަނީ ނިންމާފަ އެވެ.

މިއަދު ގެޒެޓްކުރި ގަވާއިދުގައި ބުނަނީ ޝަހީދުންގެ އާއިލާތަކަށް ބަލާނީ އެ މީހުންގެ މަންމައާ ބައްޕައާ ދަރީންނާއި ހުވަފެން އަނބީންނަށް ކަމަށެވެ. އެ ގޮތުން ޝަހީދުވި ސިފައިންގެ އާއިލާތަކާއި އާދަޔާ ޚިލާފު ހިތްވަރު ފާހަގަކޮށް ޝަރަފުގެ ނިޝާން ދީފައިވާ ފަރާތްތަަކަށް އިނާޔަތް ދިނުމަށް ވަނީ ހަމަޖެހިފަ އެވެ.

އެގޮތުން ޝަހީދުވި ސިފައިންގެ އާއިލާތަކާއި އެ މީހުން ދުނިޔޭގައި ހުރިހާ ދުވަހަކު މަހުން މަހަށް އިނާޔަތެއްގެ ގޮތުގައި 9,000 ރުފިޔާ ދިނުމަށް ވަނީ ނިންމާފަ އެވެ. އަދި އަމިއްލަ ހަށިގަނޑާއި ފުރާނައަށް ބެލުމެއް ނެތި ދައްކުވައިދީފައިވާ ޖެހިލުންކުޑަ އަދި ހިތްވަރުގަދަ އަމަލު ފާހަގަކޮށް ރަން މެޑަލް ދީފައިވާ ފަރާތްތަކަށް އެ މީހުން ދުނިޔޭގައި ހުރިހާ ދުވަހަކު މަހުން މަހަށް އިނާޔަތެއްގެ ގޮތުގައި 9,000 ރުފިޔާ އާއި ހިރި މެޑަލް ދީފައިވާ ފަރާތްތަކަށް އެ މީހުން ދުނިޔޭގައި ހުރިހާ ދުވަހަކު މަހުން މަހަށް އިނާޔަތެއްގެ ގޮތުގައި 8,000 ރުފިޔާ ދިނުމަށް ވެސް ވަނީ ނިންމާފަ އެވެ.

އަދި ހިތްވަރުގަދަ ކުލަ ދީފައިވާ ފަރާތްތަކަށް މަހަކު 6,000 ރުފިޔާ ދިނުމަށް ވަނީ ނިންމާފަ އެވެ.

ޑިފެންސް މިނިސްޓްރީން ބުނީ ގަވާއިދު ގެޒެޓް ކުރި ދުވަހުން ފެށިގެން އާއިލާތަކަށް އިނާޔަތް ދިނުމަށް ނިންމާފައިވާ ކަމަށެވެ.

ނޮވެންބަރު ތިނެއްގެ އުދުވާނީ ޙަމަލާގައި ދިވެހިރާއްޖޭގެ މިނިވަންކަމާއި ސިޔާދަތު ދިފާޢުކޮށް އާދަޔާ ޚިލާފު ހިތްވަރު ދައްކުވައިދިން ޤައުމީ ބަތަލުން އެކުރެއްވި ޚިދުމަތުގެ އަގު ވަޒަންކުރުމަކީ، ދިވެހިރާއްޖޭގެ މިނިވަންކަމާއި ސިޔާދަތު ޙިމާޔަތްކޮށް ރައްކާތެރިކުރުމަށާއި، ޤައުމީ ލޯތްބާއި ދިވެހި ޤައުމިއްޔަތު ދިރުވާއާލާކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްޞަ އިސްކަމެއްދެއްވާ ކަމެއް ކަމަށް ޑިފެންސް މިނިސްޓްރީން ބުންޏެވެ.

ނޮވެމްބަރު 3 ގެ ޝަހީދުވި އާއިލާތަކަށް އެލަވަންސެއްދީ، ބޯހިޔާވަހިކަންދޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިއުލާނު ކުރެއްވީ ނަސްރުގެ ދުވަހުގެ މުނާސަބަތުގައި ބޭއްވި މިދިޔަ އަހަރު ބޭއްވި ޖަލްސާގައި ވާހަކަ ދައްކަވަމުންނެވެ.

ޝަހީދުވި އާއިލާތަކަށް ހާއްސަކޮށް ބޯހިޔާވަހިކަން ފޯރުކޮށްދިނުމަށް 50 ހައުސިން ޔުނިޓްގެ، ހައުސިން އިމާރާތެއް އެޅުމުގެ މަސައްކަތް ކުރިއަށްގެންދާނޭ ކަމަށްވެސް ރައީސް ވިދާޅުވި އެވެ. ރައީސް އެ ފރޭ ވިދާޅުވީ 1979 ވަނަ އަހަރުން ފެށިގެން މިހާތަނަށް އެކިފަހަރުމަތިން ވޭތުވެދިޔަ 40 އަހަރުދުވަހުގެ ތެރޭގައި 29 ސިފައިންނާއި ދެ ފުލުހުން ޝަހީދުވެފައިވާ ކަމަށެވެ.