އީރާނުން ހޫޘީންނަށް ދެމުންގެންދާ އެހީތައް މިހާރުން މިހާރަށް ހުއްޓާލަން ޖެހޭކަމަށްބުނެ، އެމެރިކާގެ ރައީސް ޑޮނާލްޑް ޓްރަމްޕް، އީރާނަށް ފަހުގެ އިންޒާރު ދީފިއެވެ.
ޓްރަމްޕްގެ އަމިއްލަ ސޯޝަލް މީޑިއާ އެކައުންޓް ޓްރަސްޓްގައި ކުރި ޕޯސްޓެއްގައި ޓްރަމްޕް ބުނީ، އީރާނުން ހޫޘީންނަށް ދެމުންގެންދާ މިލިޓަރީ އެހީތައް ވީހާވެސް އަވަހަކަށް ހުއްޓާލަންޖެހޭކަމަށެވެ. ޓްރަމް ބުނީ އީރާނުން ހޫޘީންނަށް މިސެއިލް ފޯރުކޮށްދިނުން ހުއްޓާލައި އެމީހުން އަމިއްލައަށް އެކަންކަންކުރަން ދޫކޮށްލަން ޖެހޭކަމަށާއި، މިފަހަރު ހޫޘީންނަށް ބަލިވުން ފިޔަވައި އެހެންގޮތެއް ނެތްކަމަށެވެ.
ހޫޘީންގެ މައްސަލާގައި މީގެ ކުރިންވެސް ޓްރަމްޕް ވަނީ އީރާނަށް އިންޒާރެއް ދެއްވާފައެވެ. މިގޮތުން ރަތްކަނޑުގައި ހޫޘީން ބޯޓުތަކަށްދޭ ހަމަލާތަކުގެ ޒިންމާ އީރާނުންވެސް ނަގަންޖެހޭނޭކަމަށް ޓްރަމްޕް ވަނީ ވިދާޅުވެފައެވެ. އެމެރިކާއިން ހޫޘީންނަށް ދެމުންދާ ހަމަލާތަކުގައި އިތުރަށް ވަރުގަދަ ކުރުމަށް ނިންމާފައިވާއިރު، މި ހަމަލާތައް ކުރިއަށްއޮތް 24 ގަޑިއިރުގެ ތެރޭގައި ދޭން ފަށާނޭކަމަށް މެދުއިރުމަތީގެ ނޫސްތަކުން ވަނީ ބުނެފައެވެ.
ހޫޘީންގެ މައްސަލާގައި އެމެރިކާއިން އީރާނަށް އިންޒާރު ދިންނަމަވެސް އީރާނުން ވަނީ، އެޤައުމުގެ ހާރިޖީ ސިޔާސަތު ކަނޑައަޅާނީ އެމެރިކާއިން ނޫންކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
