ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން އިނގުރޭސިވިލާތުގައި، އިންޖިނިއަރިންގ ދާއިރާއިން މަތީ ތަޢުލީމު ހާސިލުކުރުމަށް 3 ސްކޮލަރޝިޕް ފުރުސަތު ހުޅުވާލައިފިއެވެ.
މި ފުރުސަތުތަކަކީ ސްޓެލްކޯ މެރިޓް ބޭސްޑް އިންޖިނިއަރިންގ ސްކޮލަރޝިޕް ސްކީމްގެ ދަށުން ހުޅުވާލެވޭ ބެޗްލަރސް ޑިގްރީ ފެންވަރުގެ ފުރުސަތުތަކެކެވެ.
މި ސްކޮލަރޝިޕް ސްކީމްގެ ދަށުން ހުޅުވާލާފައިވަނީ އިލެކްޓްރިކަލް އެންޑް އިލެކްޓްރޯނިކް އިންޖިނިއަރިންގ ދާއިރާއިން އެއް ފުރުސަތާއި، މެކޭނިކަލް އިންޖިނިއަރިންގ ދާއިރާއިން 2 ފުރުސަތެވެ.
ސްޓެލްކޯއިން ބުނީ މި ޖާގަތަކަށް އެދި 24 އަހަރުން ދަށުގެ ދިވެހި ދަރިވަރުންނަށް ކުރިމަތިލެވޭނެކަމަށެވެ. މި ޖާގަތަކަށް އެދެވޭނީ ހިސާބާއި ފިޒިކްސް ނުވަތަ ކެމިސްޓްރީ އާއި ކޮމްޕިއުޓަރ ސައިންސް ހިމެނޭހެން އޭލެވެލްގައި ދެ އޭސްޓަރ އަދި އޭއެއް ހޯދާފައިވާ ދަރިވަރުންނަށް ނުވަތަ އެއާ އެއްވަރުގެ އައިބީ ސެޓްފިކޭޝަނެއް އޮތް ފަރާތްތަކަށް ކަމަށްވެސް ބުންޏެވެ.
އަންނަ އޭޕްރިލް މަހުގެ ނިޔަލަށް ހުޅުވާލާފައިވާ މި ސްކޮލަރޝިޕަށް ހޮވޭ ދަރިވަރުންނަށް ކޯސްފީގެ އިތުރުން ސްޓައިޕަންޑް، ވިސާ ފީ، ދެކޮޅު ޓިކެޓް، ފޮތްތަކަށް ދޭ އެލަވަންސް އަދި އެސްޓަބްލިޝްމަންޓް އެލަވަންސް ލިބޭނެ ކަމަށް އެ ކުންފުނިން ބުނެއެވެ.
މި ކޯސްތައް ފުރިހަމަކުރާ ދަރިވަރުން ކޯސް ނިންމުމަށްފަހު ޚިދުމަތް ކުރަންޖެހޭނީ ސްޓެލްކޯއަށެވެ. އަދި ކޯސް ފެށުމުގެ ކުރިން އެ ކުންފުނީގައި އިންޓަރންޝިޕް ހަދަން ޖެހޭނެ ކަމަށްވެސް ސްޓެލްކޯއިން ބުނެއެވެ.
މި ސްކޮލަރޝިޕްތަކާ ގުޅޭ އިތުރު މަޢުލޫމާތު ސްޓެލްކޯގެ ވެބްސައިޓް www.stelco.com.mv އިން ލިބެން ހުންނާނެ ކަމަށް އެ ކުންފުނިން މަޢުލޫމާތު ދީފައިވެއެވެ. އަދި އިތުރު މަޢުލޫމާތު ހޯދުމަށް 3338236 އަދި 3338480 ނަންބަރު މެދުވެރިކޮށް ގުޅައި މަޢުލޫމާތު ސާފުކުރެވޭނެ ކަމަށް ސްޓެލްކޯއިން ބުނެއެވެ.
Advertisement
This content is created and paid for by advertisers and does not involve Voice Journalists
