އިންޑިއަން ޕްރިމިއާ ލީގު (އައިޕީއެލް) ކްރިކެޓް ޓީމް، މުމްބާއީ އިންޑިއަންސްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށް ދިވެހިރާއްޖެ ހަމަޖައްސައިފިއެވެ.

މުމްބާއީ އިންޑިއަންސްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށް މުމްބާއީ އިންޑިއަންސް ހަމަޖެއްސިކަން މޯލްޑިވްސް މާކެޓިން ޕީއާރު ކޯޕަރޭޝަނުން ވަނީ ރަސްމީކޮށް ހާމަކޮށްފައެވެ. އެމްއެމްޕީއާރުސީން ބުނީ، މުމްބާއީ އިންޑިއަންސް ފަދަ ބޮޑު އަދި މަޝްހޫރު ކްރިކެޓް ޓީމެއްގެ ޑެސްޓިނެޝަން ޕާޓްނަރެއްގެ ގޮތުގައި ރާއްޖެ ހަމަޖެހިގެން ދިއުމަކީ އެ ކޯޕަރޭޝަނުން ފަހުރުވެރިވާ ކަމެއްކަމަށެވެ.

މުމްބާއީ އިންޑިއަންސް އާއެކު ވެވުނު ޕާޓްނަރޝިޕްގެ ދަށުން، އެންމެބޮޑު އެއް ސޯސްމާކެޓެއްގެ ގޮތުގައި ފާހަގަކުރެވެމުންއައި، އަވައްޓެރި އިންޑިއާއިން ރާއްޖެ އަންނަ ފަތުރުވެރިންގެ އަދަދު އިތުރުކުރުމަށް މަގުފަހިވެގެންދާނޭކަމަށް އެމްއެމްޕީއާރުސީން ބުންޏެވެ. ކްރިކެޓަކީ ދުނިޔޭގެ ގިނަބަޔަކު ބަލާ ކުޅިވަރެއްކަމުން، މުމްބާއީ އިންޑިއަންސް އާއެކު ވެވުނު މި އެއްބަސްވުމަކީ ދުނިޔޭގެ އެކި ކަންކޮޅުތަކުން ފަތުރުވެރިން ގެނަުއމަށް ކުރަމުންގެންދާ މަސައްކަތްތަކަށްވެސް ލިބިގެންދާނެ ކުރިއެރުމަކަށްވާނޭކަމަށް އެމްއެމްޕީއާރުސީން ބުންޏެވެ.

އެމްއެމްޕީއާރުސީގެ އަމާޒަކީ ހިނގަމުންދާ 2025 ވަނަ އަހަރު އިންޑިއާއިން ރާއްޖެއަށް 200،000 ފަތުރުވެރިން ގެނައުމެވެ. މުމްބާއީ އިންޑިއަންސްއާއެކު ކުރަން ނިންމި މަސައްކަތްތަކުގެ ދަށުން އެމްއެމްޕީއާރުސީގެ މި އަމާޒަށް ވާސިލްވެވޭނޭކަމަށް އެ ކޯޕަރޭޝަނުން ދެކެވެއެވެ. މި އެއްބަސްވުމުގެ ދަށުން މުމްބާއީ އިންޑިއަންސްއާ ގުޅިގެން މަންޒިލެއްގެ ގޮތުގައި ރާއްޖޭގެ ފަތުރުވެރިކަން އިސްތިހާރުކުރުމަށް ކުޅިވަރުދަނޑުތަކުގެ އިތުރުންވެސް އެހެނިހެން ގޮތްގޮތުން މަސައްކަތް ކުރެވިގެންދާނޭކަމަށް އެމްއެމްޕީއާރުސީން ބުނެއެވެ.

މުމްބާއީ އިންޑިއަންސް އާ އެކު ވެވުނު މި އެއްބަސްވުމުގެ ސަބަބުން މާކެޓްކުރުމަށް ކުރަމުންގެންދާ މަސައްކަތްތައް އިތުރު ކުރިއެރުންތައް ލިބިގެންދާނެ. އަދި އެޓީމާ ގުޅިގެން އިންޑިއާގެ ފަތުރުވެރިންގެ މެދުގައި ރާއްޖެއާމެދު އޮންނަ ޝައުގުވެރިކަން އިތުރުކުރެވިެގންދާނެ" އެމްއެމްޕީއާރުސީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވިއެވެ.

އެއްބަސްވުމާ ގުޅޭގޮތުން މުމްބާއީ އިންޑިއަންސްގެ ތަރުޖަމާން ވިދާޅުވެފައިވަނީ، ދުނިޔޭގެ އެކި ކަންކޮޅުތަކުގައި ތިބި އެ ކްލަބްގެ ފޭނުންނަށް މަންޒިލެއްގެ ގޮތުގައި ރާއްޖެ ދައްކާލެވިގެންދާނޭކަމަށެވެ.

މުމްބާއީ އިންޑިއަންސްއަކީ އިންޑިއާގެ އެންމެ ކާމިޔާބު އެއް ކްރިކެޓް ޓީމެވެ. އެޓީމްވަނީ އިންޑިއަން ޕްރިމިއާ ލީގްގެ ޗެމްޕިއަންކަން 5 ފަހަރު ހޯދާފައެވެ. މުމްބާއީ އިންޑިއަންސް އަކީ އިންޑިއާގެ އިތުރުން އޭޝިއާގެ އެންމެބޮޑު މަހުޖަނު މުކޭޝް އަމްބާނީގެ ޓީމެކެވެ. 

މުމްބާއީ އިންޑިއަންސްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރުގެ ގޮތުގައި ރާއްޖެ ހަމަޖައްސާފައިވާއިރު، އެމްއެމްޕީއާރުސީން ވަނީ އިނގިރޭސި ޕްރިމިއާލީގްގެ ކްލަބް، ލިވަޕޫލްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރުގެ ގޮތުގައިވެސް ރާއްޖެ ހަމަޖައްސާފައެވެ.