ކޮންޓްރޯލާ ޖެނެރަލް އޮފް އިމިގްރޭޝަންގެ މަގާމަށް ކުރީގެ ސީޕީ ފަސީހު އައްޔަނު ކުރައްވައިފި އެވެ.
ރައީސް އޮފީހުގެ ތަރުޖަމާން ހީނާ ވަލީދު ދެންމެ ވަނީ އެކަން ޔަގީން ކޮށް ދެއްވާފަ އެވެ.
ފަސީހު އެ މަގާމަށް އައްޔަނު ކުރެއްވީ އިމިގްރޭޝަން ކޮންޓްރޯލްގެ މަގާމުގައި ހުންނެވި މުހައްމަދު ޝަމްއާން ވަހީދު އެ މަގާމުން މިރޭ ވަކިކުރެއްވުމަށް ފަހު އެވެ. ޝަމްއާން ވަކި ކުރެެއްވި ސަބަބެއް ސާފެއް ނުވެ އެވެ. އެކަމާ ގުޅޭގޮތުން ސަރުކާރުން ވާހަކައެއް ނުދައްކަ އެވެ.
ނަމަވެސް މި ދަނޑިވަޅާ ދިމާކޮށް ފުލުހުން ވަނީ ނޫސްބަޔާނެއް ނެރެފަ އެވެ.
އިމިގްރޭޝަންގެ ބައެއްގެ މުވައްޒިފުން ބިދޭސީން އަތުން ނާޖައިޒު މަންފާ ހޯދަމުންދާ ކަމުގެ މައުލޫމާތު ލިބުމާއި ގުޅިގެން އެ މައްސަލަ ތަހުގީގު ކުރަމުންދާ ކަމަށެވެ.
މި މައްސަލައާ ގުޅިގެން މިރޭ އޮޕަރޭޝަނެއް ހިންގާފައިވާ ކަމަަށް ވެސް ބުންޏެވެ. އަދި ގެއެއް ބަލާ ފާސްކޮށް ތިން މީހަކު ހައްޔަރު ކޮށްފައިވާ ކަމަށް ފުލުހުން ބުންޏެވެ.
އަދި ބުނީ މި މައްސަލައިގެ ތަހުގީގު ކުރިއަށްދާ މިންވަރަކުން މައްސަލައާ ގުޅޭ އިތުރު ތަފްސީލު ހާމަ ކުރާނެ ކަމަށެވެ.
ކޮންޓްރޯލާ ޖެނެރަލް އޮފް އިމިގްރޭޝަނުގެ މަގާމަށް ޝަމްއާން އައްޔަންކުރެއްވީ ނޮވެންބަރު 19، 2023 ގަ އެވެ. ޝަމްއާން ފާހަގަ ކުރެވުނީ ވަރަށް އެކްޓިވް ހިންގުންތެރި ވެރިއެއްގެ ގޮތުގަ އެވެ.
ބިދޭސީންގެ މައްސަލަ ހައްލު ކުރުމަށް ރައީސް މުއިއްޒުގެ އިރުޝާދުގެ ދަށުން ފެށި މަސައްކަތަށް އާންމުންގެ ވަރަށް ބޮޑު ތައުރީފެއް ޝަމްއާންއާ އިމިގްރޭޝަނަށް އޮތެވެ.
Advertisement
This content is created and paid for by advertisers and does not involve Voice Journalists
