ޤައުމީ އެއާލައިން މޯލްޑިވިއަނުން އޭ 320 ގެ އުދުހުންތައް އައްޑޫސިޓީ ގަމަށް ބޭއްވުމަށް ނިންމައިފިއެވެ.

މޯލްޑިވިއަނުން ބުނީ، އަންނަ އޭޕްރިލްމަހުގެ 10 ވަނަ ދުވަހުން ފެށިގެން ހަފްތާއަކު 2 ދުވަހު އައްޑޫސިޓީ ގަމަށް ދަތުރުތައް ބޭއްވުމަށް ނިންމާފައިވާކަމަށެވެ. ދަތުރުތައް ބޭއްވުމަށް ނިންމާފައިވަނީ، ކޮންމެ ހަފްތާއެއްގެ ބްރާސްފަތި އަދި ހޮނިހިރު ދުވަހެވެ. 

މޯލްޑިވިއަނުން މިހާރު އައްޑޫސިޓީއަށް ކޮންމެ ދުވަހަކުވެސް އައްޑޫސިޓީ ގަމަށް ދަތުރުތައް ބާއްވަމުން އަންނައިރު، މި ދަތުރުތަކުގައި ބޭނުންކުރަނީ، ކުދިބޯޓުތަކެވެ. މޯލްޑިވިއަނުން ވަނީ، މީގެކުރިންވެސް އޭ320 ބޯޓުގައި އައްޑޫސިޓީގެ ގަމަށް އުދުހުންތައް ބާއްވާފައެވެ.

މޯލްޑިވިއަންގެ އޭ320 މަރުކާގެ ބޯޓަކީ 138 މީހުންގެ ޖާގައިގެ ބޯޓެކެވެ. މޯލްޑިވިއަނުން ވަނީ އެ އެއާލައިންގެ ދަތުރުތައް ފުޅާކުރުމުގެ ގޮތުން ވަރަށްފަހުން އެއާބަސް މަރުކާގެ އޭ-330 ވައިޑްބޮޑީ އެއާ ކްރާފްޓެއް މިއަހަރުގެ ޖެނުއަރީމަހުގެ 6 ވަނަ ދުވަހު ގެނެސްފައެވެ. މި ބޯޓުގެ ދަތުރުތައް މިހާރު ޗައިނާގެ ޗެންޑޫސިޓީއަށް ފަށާފައިވައިރު، ކައިރި މުސްތަގްބަލެއްގައި ޗައިނާގެ އިތުރު ސިޓީތަކަށް ފެށުމަށް ވަނީ ނިންމާފައެވެ.

މީގެ އިތުރުން ކުރިއަށް އޮތްތަނުގައި ޔޫރަޕްގެ އެކި މަންޒިލްތަކަށްވެސް ވައިޑް ބޮޑީ އެއކްރާފުޓްގެ ދަތުރުތައް ފަށާނޭކަމަށް މޯލްޑިވިއަނުން ވަނީ ބުނެފައެވެ.