ރަމަޟާން މަހަކީ އަޅުގަނޑުމެން ރޫޙާނީ ގޮތުން ޠާހިރުވުމާއި، އަޅުގަނޑުމެންގެ ތަޤްވާވެރިކަން އިތުރުކުރުމަށާއި، ދަރުމައާއި ބަރަކާތް ހޯދުމަށާއި، އަދި މާތްالله އާއި ދެމެދު ވަރުގަދަ ގުޅުމެއް ބިނާކުރުމަށް އޮންނަ ވަގުތެކެވެ. ރަމަޟާން މަހުގެ ދުވަސްތަކާއި ރޭތަކުގެ ތެރެއިން އެންމެ އަގުހުރި ދުވަސްތަކަކީ ފަހު ދިހައިގެ ދުވަސްތަކެވެ. އަދި އޭގެ ތެރެއިން އެންމެ މާތް ރެއަކީ ލައިލަތުލް ޤަދުރު ރެއެވެ. މި ރޭތަކުގައި އަޅުކަން ކުރުމުން އަޅުގަނޑުމެންނަށް މުޅި އުމުރުގައި ވެސް ނުލިބޭވަރުގެ ދަރުމަ ލިބުމުގެ ފުރުސަތު ލިބެއެވެ.

ކަންމިހެން ހުރިއިރު، އެ ދުވަސްތަކާއި ރޭތަކުގެ ބޭނުން އެންމެ ހެޔޮ ގޮތުގައި ހިފުމަށް ގިނަ ދަތިތަކާއި ކުރިމަތިލާން ޖެހެއެވެ.

އެހެންކަމުން މި ލިޔުމުގައި އަލިއަޅުވާލާނީ ރަމަޟާން މަހުގެ ބޭނުން އެންމެ ފުރިހަމަ ގޮތިގައި ހިފުމަށް، މަައިންނަށް ކުރެވިދާނެ ކަންކަމުގެ މައްޗަށެވެ. 

ތިބާގެ ވަގުތުތައް ހޭދަކުރާނެ ގޮތްތައް ރާވާލާށެވެ. ތިބާ ދުވަސްތައް ހޭދަކުރަނީ އެއްވެސް ރޭވުމެއް ނެތި ކަމުގައިވާނަމަ، އަޅުކަމަށް ވަގުތު ހުސްކުރަން އުނދަގޫ ވެދާނެއެވެ. އެހެންކަމުން ނިޔަތް ވަރުގަދަކޮށް، ރަނގަޅު ޕްލޭނެއް ހަދައިގެން އަޒުމުގައި މަސައްކަތް ކޮށްފިނަމަ، ކަންކަން ރަނގަޅު ކުރެވިދާނެއެވެ. 

އިމާމް ޣަޒާލީ "ދަ ބިގިނިންގ އޮފް ގައިޑަންސް" ގައި ވިދާޅުވެފައިވެއެވެ.

"ތިބާގެ ވަގުތު އެއްވެސް ރޭވުމެއް ނެތި އެއިރަކު އެ ޖެހުނު ކޮންމެ ކަމަކާ އެކު މަޝްޣޫލުވާ ގޮތަށް ހޭދަނުކުރާށެވެ. އޭގެ ބަދަލުގައި، ތިބާ އަމިއްލަ ނަފްސު ހިސާބުކޮށް، ދުވާލާއި ރޭގަނޑުގެ އަޅުކަންތައްތައް ކުރާނެ ގޮތްތައް ތަރުތީބުކުރަންވާނެއެވެ. ކޮންމެ ވަގުތަކަށް ވެސް ވަކި ކަމެއް ކަނަޑައަޅައި އެވަގުތުގައި އެކަމެއް ކުރާށެވެ. އަދި އެކަނޑައެޅުނު ކަންތައް ފިޔަވައި އެހެން ކަމެއް އެ ވަގުތުގައި ނުކުރާށެވެ."

އެހެންކަމުން، ކުރިއަށް އޮތް ދުވަސްތަކަށް ކެއްކުމާއި ގުޅޭވެސް ޕްލޭނެއް ހެދުމަށްފަހު، އެކަމުގައި ޢާއިލާގެ ހުރިހާ މެންބަރުން ބައިވެރި ކުރާށެވެ. ދަރިން ތިބި ނަމަ ދަރިންނަށް ވެސް ބައެއް ކަންކަން ކަނޑައަޅާށެވެ.

މައިންގެ ހައިސިއްޔަތުން، އަޅުކަން ކުރުމަށް ގިނަ ފަހަރު އަޅުގަނޑުމެން އިންތިޒާރުކުރަނީ ދަތިތަކެއް ނެތް، ހުސް، ދިގު ވަގުތުކޮޅަކަށެވެ. ނަމަވެސް އަޅުގަނޑުމެން އެންމެންނަށް ވެސް އެއްބަސްވެވޭނެ ފަދައިން، މިފަދަ ފުރުސަތުތައް ލިބޭނީ ވަރަށް މަދުންނެވެ. އެހެންކަމުން، ހުސް، ދިގު ވަގުތެއް ލިބޭނެ އިރަކަށް އިންތިޒާރުކުރުމުގެ ބަދަލުގައި، ލިބޭ ކޮންމެ ފުރުސަތެއްގެވެސް ބޭނުން ހިފާށެވެ. އެވަގުތު ތަކުގައި ޤުރުއާނުން ކުޑަ މިންވަރެއް ނަމަވެސް ކިޔަވާށެވެ.

ފިޤުހުގެ އުސޫލަކީ، "އެއްޗެއް ފުރިހަމައަށް ނުކުރެވުނު ނަމަވެސް، އެ އެއްކޮށް ދޫކޮށްލައިގެން ނުވާނެއެވެ."

ރަމަޟާން މަހުގެ މި ފަހު ވަގުތުތަކުގައި، އަޅުގަނޑުމެން ވީހާވެސް ގިނައިން މާތްالله އަށް ހިތުގެ އަޑިން ދުޢާކުރަންވާނެއެވެ. ވަރުބަލިކަމާއެކު ދުވާލުގެ ވަގުތުތައް ހޭދަކުރުމަށްފަހު، އަޅުގަނޑުމެންގެ ދުޢާތައް ހަނދާންކުރުމަކީ ވަރަށް އުނދަގޫ ކަމަކަށް ވެދާނެއެވެ. އެހެންކަމުން ފަހު ދިހައިގެ ރޭތަކުގައި ކުރުމަށް ބޭނުންވާ ދުޢާތަކުގެ ލިސްޓެއް ލިޔެލާށެވެ. 

ތިބާގެ ދަރިންނާ އެކުގައި ކުރެވިދާނެ އެކި އަޅުކަންތައް ކަނޑައަޅަައި އެކުދިންނާއެކު އަޅުކަން ކުރުމަށް އިސްކަންދޭށެވެ.

އެގޮތުން ދަރިފުޅަށް ސޫރަތުލް ފާތިޙާ އުނގަންނައިދިނުމަކީ ޤުރުއާން ޚަތިމްކުރުމާ އަޅާބަލާއިރު ކުޑަ ކަމެއް ކަމަށް ފެނުނު ނަމަވެސް، ތިބާ ތިބާގެ ދަރިފުޅަށް އުނގަންނައިދޭ ކޮންމެ ހެޔޮ ޢަމަލަކީ ތިބާއަށް ލިޔެވެމުންދާ ދެމިގެންވާ ޞަދަަޤާތެއްކަން ހަނދާންކުރާށެވެ. މާތް الله އާއި އެކަލާނގެ ރަސޫލާއަށް ލޯބިކުރާ، އީމާންތެރި އަދި ތަޤްވާވެރި ދަރިއެއް ތަރުބިއްޔަތުކުރުމަށްވުރެ މާތް ކަމެއް އިންސާނަކަށް ކުރެވިދާނެ ހެއްޔެވެ؟

ގޭތެރޭގެ މަސައްކަތްތައް ކުރަމުންދާއިރު ޛިކުރުކުރުމާއި، ޤުރުއާނުން ހިތުދަސް ސޫރަތްތައް ކިޔެވުމުމުގައި މަޝްޣޫލުވެ ތިބޭށެވެ. ތިބާއަކީ ގާތުންދޭ މަންމައެއްނަމަ، ދަރިފުޅަށް ގާތުންދޭ ވަގުތުގައިވެސް ޛިކުރުކޮށް ޤުރުއާން ކިޔަވާށެވެ. މިއިން ތިބާގެ ދަރިންނަށް ރޫޙާނީ ގޮތުން ހެޔޮ އަސަރުކުރާނެއެވެ.

ތިބާއަށް ޢާއިލާގެ އެހީތެރިކަން ލިބޭނަމަ، ދުވާލުގެ ވަގުތުތަކުގެ ތެރޭގައި ތިބާގެ ޢާއިލާއަށް ދަރިން ބެލެހެއްޓުމުގައި އެހީތެރިވެދެވޭނެ ވަގުތުތައް ހޯދާށެވެ. ދަރިން ބެލެހެއްޓުމަކީ މައިންބަފައިންގެ ޒިންމާއެކެވެ. މާތްالله އަޅުގަނޑުމެންނަށް އަންގަވަނީ ހެޔޮކަންތައް ކުރުމުގައި އެކަކު އަނެކަކަށް އެހީތެރިވުމަށެވެ. 

ދަރިން ބޮޑުކުރަމުން އަދި ގާތުންދެމުން ރަމަޟާން މަސް ހޭދަކުރުމަކީ އެއްގޮތަކަށްވެސް ފަސޭހަ ކަމެއް ނޫނެވެ. ނަމަވެސް، ތިބާ އަމިއްލަ ނަފްސަށް ހަނދާންކޮށްދޭށެވެ. މަންމައެއްގެ ހައިސިއްޔަތުން ތިބާ ކުރަމުންދާ ކަންކަމަކީވެސް އަޅުކަމެކެވެ. އަދި އެކަންކަން ކުރަމުން އަޅުކަން ކުރުމަށް ވެވުނު މިންވަރަކަކުން ވަގުތު ހޯދާށެވެ.