ނިމިގެންދިޔަ ހަފްތާގައި ބާޒާރުގެ އަގުތަކަށް ބަލާއިރު، އަގުތައް އެންމެބޮޑަށް ދަށަށްދިޔަ އެއްޗެއްގެ ގޮތުގައި ފާހަގަކުރެވުނީ ކަރައެވެ. ހަފްތާ ނިމުނުއިރު، ދިވެހި ކަރާގެ އަގު އެންމެބޮޑުވެގެންވެސް ހުރީ 20 ރުފިޔާގައެވެ. އިންޑިއާ ކަރާގެ އަގު 15 ރުފިޔާގައި ހުރިއިރު، މި ރޯދަމަހު މާރުކޭޓުން މުޅިންވެސް ފެނިގެންދިޔައީ ރާއްޖޭގައި ހައްދާ ކަރައެވެ. މާރުކޭޓަށް އިނޑިއާ ކަރާ ގެނެސްފައިވަނީ މިދިޔަ ހަފްތާގައެވެ. އިންޑިއާއިން ކަރާ ގެނައުމާއެކު ބާޒާރުގައި ކުރިން 30 ރުފިޔާއަށް ވިއްކަމުން އައި ކަރާކިލޯއެއްގެ އަގު ވަނީ 20 ރުފިޔާ އާއި 18 ރުފިޔާ އާ ދެމެދުގެ އަގަށް ތިރިވެފައެވެ.

ނަމަވެސް މިހާރު ބާޒާރުގައި މި ދެތިންދުވަހު ކަރާގެ އަގުތައް ވަނީ އިންތިހާއަށް މައްޗަށްގޮސްފައެވެ. ދަތުރުވެރިންގެ މާރުކޭޓުގައި މިހާރު އެންމެ ހެޔޮވެގެންވެސް ދިވެހިކަރާ ލިބެންހުރީ ކިލޯއެއް 30 ރުފިޔާއަށެވެ. ހުޅުމާލޭ މާރުކޭޓުގައި ކަރާ ކިލޯއެއްގެ އަގުހުރީ 35 ރުފިޔާއަށެވެ. 

ބާޒާރުގައި ވިއްކަން ބަހައްޓާފައިހުރި ކަރާތަކެއް... ފޮޓޯ: ވޮއިސް

މި ރޯދަމަހު މާރުކޭޓަށް އެކި ބާވަތްތަކުގެ ކަރާ ވިއްކަން ހުރިއިރު, މައިގަނޑު ގޮތެއްގައި ހުރިހާ ބާވަތެއްގެ އަގުތައް ހުރީ އެއްވަރެއްގައެވެ. މިގޮތުން ރަންކަރާ، އަލަނާސިކަރާ އަދި އޮރެންޖް ކަރާ ކިލޯއެއް 20 ރުފިޔާއަށް ލިބެން ހުއްޓެވެ. ނަމަވެސް ބާޒާރުން ކަރާ ލިބުން ދަތިވުމާއެކު މި ހުރިހާ ބާވަތެއްގެ އަގުތައްވަނީ ބޮޑުވެފައެވެ. އެގޮތުން އެއްގަމުގެ ބައެއް ފިހާރަތަކުގައި މިހާރު އަލަނާސި ކަރާ ކިލޯއެއްގެ އަގު ހުރީ 55 ރުފިޔާއަށެވެ. މިއީ މި ފަހަކަށް އައިސް ބާޒާރުގައި ކަރާގެ އަގުތައް މިހާ މައްޗަށްދިޔަ ފުރަތަމަ ފަހަރެވެ. 

ފިހާރައެއްގައި ވިއްކަން ބަހައްޓާފައިހުރި އަލަނާސިކަރާތަކެއް... ފޮޓޯ: ވޮއިސް

ބާޒާރުގައި ކަރާގެ އަގު މިހާ މައްޗަށްދިއުމުގެ މައިގަނޑު ސަބަބަކީ މިފަހަރު ރޯދައަށް ކަރާ ހައްދާފައިވަނިކޮށް ކުރިމަތިވި ވިއްސާރައިގައި ދަނޑުތައް  ހަލާކުވުމާއި، އަވައްޓެރި އިންޑިއާއިން ކަރާ ގެނައުން މަދުވުމެވެ. މި ރޯދައަށް އިންޑިއާއިން ގެނައި ކަރާގެ ބޮޑު ޝިޕްމަންޓެއް ވަނީ ހަލާކުވެގެން އުކާލާފައެވެ. 

އިންޑިއާއިން އެތެރެކުރި ކަރާތަކެއް ހަލާކުވެފައި... ފޮޓޯ: ވޮއިސް

ބާޒާރުގައި ކަރާގެ އަގު މައްޗަށްދިޔަ ނަމަވެސް ރޯދަމަސް ފެށުނުއިރު އަގުތައް އުފުލުނު ބައެއް ބާވަތްތަކުގެ އަގުތައް މިހާރުވަނީ ވަރަށްބޮޑަށް ދަށަށްގޮސްފައެވެ. މިގޮތުން ކުރިން 160 ރުފިޔާއަށް އަރައިގެންދިޔަ ލޮނުމެދު ކިލޯއެއްގެ އަގު މިހާރު 90 ރުފިޔާއަށް ދަށަށްގޮސްފައިވާއިރު، ކުރިން 180 ރުފިޔާއަށް ވިއްކަމުން އައި ބަނބުކެޔޮ ކިލޯއެއްގެ އަގު މިހާރު ހުރީ 80 ރުފިޔާގައެވެ. މީގެ އިތުރުން ބާޒާރުގައި ފިޔާ، ލުނބޯ އަދި ފޭރާއި، ފެށަންފުރުޓްގެ އަގުތައްވެސް ވަރަށްބޮޑަށް ދަށަށްގޮސްފައިވާކަން ފާހަގަކޮށްލެވެއެވެ.