ދުނިޔޭގެ އެކި ޤައުމުތަކަށް ދަތުރުކުރަމުން އަންނަ ކްރޫޒްލައިނާއެއްކަމަށްވާ، "އެމްއެސް ކްރިސްޓަލް ސިންފަނީ" މިއަހަރު ދެވަނަ ފަހަރަށް ރާއްޖެ އަތުވެއްޖެއެވެ.
އެމްއެސް ކްރިސްޓަލް ސިންފަނީ މިފަހުން ރާއްޖެ އައިސްފައިވަނީ، އަވައްޓެރި ސްރީލަންކާގެ ކޮޅުނބުން ފުރައިގެން މިއަދުއެވެ.
މިކަމާ ގުޅޭގޮތުން މޯލްޑިވްސް އިމިގްރޭޝަނުން ބުނީ، އެމްއެސް ކްރިސްޓަލް ސިންފަނީން ރާއްޖެ އައި 307 ފަތުރުވެރިންނަށް ކްލިއަރަންސް ދީފައިވާކަަމަށެވެ. އިމިގްރޭޝަނުން ވަނީ އެ ކްރޫޒްލައިނާއިން ރާއްޖެއައި 477 ފަޅުވެރިންނަށްވެސް ކްލިއަރަންސްދީފައެވެ. ކްރޫޒްލައިނާއިން ރާއްޖެއަށް ޒިޔާރަތްކުރި ފަރާތްތަކަށް އިމިގްރޭޝަނުން ކްލިއަރަންސް ދީފައިވަނީ ސީޕޯޓް ޑިވިޒަނުންނެވެ.
"އެމްއެސް ކްރިސްޓަލް ސިންފަނީ" މިއަދު ރާއްޖެ އައިސްފައިވާއިރު، މި ބޯޓު އެންމެ ފުރަތަމަ ރާއްޖެ އައިސްފައިވަނީ، މިއަހަރުގެ ޖެނުއަރީމަހުގެ 10 ވަނަ ދުވަހުއެވެ. މިއަހަރުގެ ތެރޭގައި 7 ކްރޫޒްލައިނާ ވަނީ ރާއްޖެ އައިސްފައެވެ.
މިއަހަރު ރާއްޖެއަށް އެންމެގިނައިން ކްރޫޒްލައިނާއިން މީހުން އައިސްފައިވަނީ އައު އަހަރާ ދިމާކޮށެވެ. އައު އަހަރާ ދިމާކޮށް ރާއްޖެއަށް ބަނދަރުކުރި ކްރޫޒްލައިނާތަކުން 5 ހާހަށްވުރެ ގިނަ ދަތުރުވެރިންނަށް ވަނީ ކްލިއަރަންސްދީފައެވެ. ކްރޫޒްލައިނާ މާކެޓަކީ ރާއްޖޭގެ ފަތުރުވެރިކަމުގެ ސިނާއަތުގައި ކުރިއަރަމުން އަންނަ ވަރަށް މުހިއްމު މާކެޓެއްކަމަށް ޓޫރިޒަމް ސިނާއަތުން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
