ދެކުނު ކޮރެއާގެ އުތުރު ގިއޯންގްސަންގް ޕްރޮވިންސްގެ ސަންޗިއޯންގް ކައުންޓީގައި ހުކުރު ދުވަހުގެ ރޭ ފެށުނު ބޮޑު އަލިފާނުގެ ހާދިސާއަކީ އެ ޤައުމުގެ ތާރީޚުގައި މިހާތަނަށް ދިމާވި އެންމެ ނުރައްކާތެރި އަލިފާނުގެ ހާދިސާ ކަމަށާ މި ހާދިސާގައި މިހާތަނަށް މަރުވެފައިވާ މީހުންގެ އަދަދު 26 އަށް އަރާފައިވާ ކަމަށް ރަސްމީ އިދާރާތަކުން ބުނެފިއެވެ. 

މި އަލިފާނުގެ ސަބަބުން ގާތްގަނޑަކަށް 33،000 ހެކްޓަރުގެ ސަރަހައްދެއް އަނދައި ހުލިވެފައިވާ ކަމަށް ވެސް އެ ފަރާތްތަކުން ބުނެފައިވެއެވެ. މިއީ ބުދަ ދުވަހު ރިޕޯޓުކުރެވުނު އަދަދުގެ ދެ ގުނައެވެ. އަދި 2000 ވަނަ އަހަރުގެ މާރިޗު މަހު ހިނގި، މިހާތަނަށް އެންމެ ނުރައްކާތެރި ކަމަށް ބެލެވުނު އަލިފާނުގެ ހާދިސާގައި އަނދާފައިވާ 24،000 ހެކްޓަރަށް ވުރެ ވެސް ބޮޑު ސަރަހައްދެކެވެ.

ދެކުނު ކޮރެއާގެ ވަގުތީ ރައީސް ހަން ޑަކް-ސޫ ވިދާޅުވެފައިވަނީ މި އަލިފާނުގެ ހާދިސާއަކީ ޤައުމީ ކާރިސާއެއް ކަމަށާއި، އަލިފާން ވަރަށް ބާރު ސްޕީޑެއްގައި ފެތުރެމުންދާތީ ގިނަ އަދަދެއްގެ މީހުން މަރުވެފައިވާ ކަމަށެވެ.

Advertisement

މި އަލިފާން ނިއްވުމަށް ޓަކައި 120 އަށް ވުރެ ގިނަ ހެލިކޮޕްޓަރު ބޭނުންކުރަމުންދާ ކަމަށް ދެކުނު ކޮރެއާއިން ބުނެފައިވެއެވެ. އަލިފާން ރޯވެފައިވަނީ ގިއޯންގްބަކް، އުއިސިއޯންގް، އަންޑޯންގް، ޗިއޯންގްސޯންގް، ޔިއޯންގްޔަންގް އަދި ސަންޗިއޯންގް ފަދަ ފަރުބަދަ ސަރަހައްދުތަކުގައެވެ. އަދި ވައި ގަދަވެ، ހޫނުވެފައިވާތީ އަލިފާން އަވަހަށް ފެތުރެމުންދާ ކަމަށް ވެސް އެ ފަރާތްތަކުން ފާހަގަކޮށްފައިވެއެވެ.

ކޮރެއާ ފޮރެސްޓް ސަރވިސްގެ މިނިސްޓަރު ލިމް ސަންގް-ސިއޯޕް ވިދާޅުވެފައިވަނީ މި ދުވަސްވަރު އެ ސަރަހައްދަށް ވާރޭވެހުމުގެ ފުރުސަތު ކުޑަކަމަށާއި، އެހެންކަމުން އަލިފާން ނިއްވުމަށް އެކަން އެހީތެރިވެދާނެ ކަމަކަށް ނުފެންނަ ކަމަށެވެ.

ސަރުކާރުގެ އިސްވެރިން ބުނެފައިވާ ގޮތުގައި މި އަލިފާނުގެ ހާދިސާ ހިނގާފައިވަނީ އިންސާނުންގެ އިހުމާލުންނެވެ. ޤަބުރުސްތާނުތަކުގައި ހެދިފައިވާ ވިނަ އަންދާލުމަށް ނުވަތަ ވެލްޑިންގ މަސައްކަތްތަކުން އުފެދޭ ރޯވާ އެއްޗެހީގެ ސަބަބުން މި އަލިފާން ފެށިފައިވުމުގެ ފުރުސަތު އޮތް ކަމަށް އެ ފަރާތްތަކުން ބުނެފައިވެއެވެ.

މި އަލިފާނުގެ ހާދިސާގެ ސަބަބުން މިހާތަނަށް 30،000 އަށް ވުރެ ގިނަ މީހުން ވަނީ އެމީހުންގެ ގެދޮރު ދޫކޮށް ރައްކާތެރި ތަންތަނަށް ބަދަލުވެފައެވެ. އަލިފާން ނިއްވުމުގެ މަސައްކަތުގައި އުޅުނު 4 ފަޔަރ ފައިޓަރުންނާއި ސަރުކާރުގެ މުވައްޒަފުން ވަނީ ސަންޗިއޯންގް ކައުންޓީގައި މަރުވެފައެވެ. އަދި އުއިސިއޯންގްގެ ފަރުބަދަ ސަރަހައްދެއްގައި އަލިފާން ނިއްވުމުގެ މަސައްކަތުގައި އުޅުނު ހެލިކޮޕްޓަރެއް ވެއްޓި، ޕައިލެޓް ވެސް ވަނީ މަރުވެފައެވެ.

ދެކުނު ކޮރެއާގެ ސަރުކާރުން މިހާރު ވަނީ މި އަލިފާނުގެ ހާދިސާއާ ގުޅިގެން ޤައުމީ ކުއްލި ނުރައްކަލުގެ ހާލަތު އިއުލާނުކޮށް، އަލިފާން ނިއްވުމަށް އިތުރު ވަސީލަތްތައް ހޯދުމަށް މަސައްކަތް ފަށާފައެވެ. އަދި ގެއްލުން ލިބުނު ފަރާތްތަކަށް އެހީތެރިކަން ފޯރުކޮށްދިނުމަށް ޚާއްޞަ ޕްރޮގްރާމްތަކެއް ހިންގަން ވެސް ރޭވެމުންދާ ކަމަށްވެސް މައުލޫމާތު ދީފައިވެއެވެ.