ރާއްޖޭގެ ތަޢުލީމީ މަންހަޖަކީ އިސްލާމްދީން ބާރުއަޅާ ތަޢުލީމީ ނިޒާމެއް ޤާއިމުކޮށްދެވޭނެފަދަ މަންހަޖެއްކަމަށާއި އެހެންނަމަވެސް އެމަންހަޖު ރަނގަޅަށް ތަންފީޒުވަމުންދޭތޯ ސުވާލުއުފައްދަން ޖެހޭކަމަށް އިސްލާމީ ޔުނިވާސިޓީގެ ވައިސް ޗާންސެލަރ ޑރ. ޢަލީ ޒާހިރު ބިން ސަޢީދު ޤާސިމް ވިދާޅުވެއްޖެއެވެ.

ރޭ ބޭއްވުނު ރަމަޟާން މަހުގެ އެންމެ ފަހު އިޙްޔާފޯރަމްގައި، "އިސްލާމީ ތަޢުލީމީ ނިޒާމު" މައުޟޫއަށް ވާހަކަދައްކަވަމުން ޑރ. ޢަލީ ޒާހިރު ބިން ސަޢީދު ޤާސިމް ވިދާޅުވީ ދުނިޔޭގެ އެކި ކަންކޮޅުތަކުގައި ތަފާތު ތަޢުލީމީ ނިޒާމްތައް ފެތުރިފައުވާ ކަމަށެވެ. އަދި އެކި ފަރާތްތަތަކުން އެ ނިޒާމްތައް އެކި ކަންކޮޅުތަކުގައި ފެތުރުމަށް މަސަައްކަތް ކުރަމުންދާ ކަމަށެވެ. 

ކަންމިހެން ހުރި ނަމަވެސް ދިވެހިރާއްޖެއަކީ އިސްލާމީ ޤައުމެއް ކަމަށް ވުމުން ރާއްޖޭގެ ތަޢުލީމީ ނިޒާމު ބައްޓަންވެފައި އޮންނަންޖެހޭނީ މާތްވެގެންވާ އިސްލާމްދީނުގެ ހަމަތަކުގެ މަތީގައިކަމަށް ޑރ އަލީ ޒާހިރު ވިދާޅުވުއެވެ. އަދި އިސްލާމީ ތަޢުލީމު ނިޒާމް ގާއިމް ވެފައިވަނީ އިސްލާމީ ޢަޤީދާގެ މައްޗަށް ކަމަށްވާއިރު ދީނުގެ އަޤީދާއާއި ޚިލާފް އެއްވެސް ކަމެއް ތަޢުލީމުގެ ތެރޭގައި ހިމަނައިގެން ނުވާނެ ކަމަށް ކަމަށް ޝެއިޚް ވިދާޅުވިއެވެ.

މިއާއެކު ޑރ އަލީ ޒާހިރު ވިދާޅުވީ، ދިވެހިރާއްޖޭގެ ތަޢުލީމީ މަންހަޖަކީ ވަރަށް ފުރިހަމައަށް ލިޔެވިފައިވާ މަންޙަޖެއް ކަމަށާ، އެ މަންހަޖުގެ ތަޞައްވުރުގެ ގޮތުގައި ލިޔެވުފައުވަނީ އިސްލާމީ އަޤީދާ ވަރުގަދަ ވަރުގަދަ ކުއްޖަކު މުޖުތަމަޢަށް ނެރުންކަމަށެވެ. އެ މަންހަޖުގެ އަސާސްތަކުގެވެސް އެންމެ ކުރީގައި އޮތީ މާތް ވެގެންވާ އިސްލާމްދީން ކަމަށާ، އަދި ހަރުދަނާ އަޤީދާގެ މަތީގައި ޤުރުޢާނާއި ސުންނަތަށް ޢަމަލުކުރާ ދަރިވަރުންތަކެއް އުފެއްދުން ކަން ފާހަގަކުރައްވައި ޑރ.ޢަލީ ޒާހިރު ވަނީ ރާއްޖޭގެ ތަޢުލީމީ ނިޒާމުގެ ތެރެއިން ނުކުމެގެން އަންނަ ކުދިންގެ ކިބާގައި އެ އަސާސީ ސިފަ އެކުލެވިފައިވަނީ ކިހާމިންވަރަކަށްތޯ ސުވާލު ކުރައްވާފައެވެ.

”މީހުންގެ އަބުރަށް އަރައުގަތުމާއި، މީހުންގެ ކަރާމާތް ނަގައިލުމާއި، މީހުންގެ ބޮލުގައި ދޮގު އިލްޒާމް އެޅުވުމާއި، މީހުންނޭ ކިޔައިގެން ތަފާތު އެކިއެކި ވާހަކަތައް ރެއާދުވާލު ދެއްކުމާއި، ބޮޑުމީހެއް ކުޑަމީހެއް، އަންހެނެއް ކުޑަކުއްޖެއް  ތަފާތުނުކޮށް، އެމީހުންނަށް ނިސްބަތްވާގޮތަށް ހަގީގަތާ ޚިލާފް ވާހަކަތައް ދެއްކުމާއި ފެތުރުމާއި، އާއްމު ކުރުން، އަޅުގަނޑުމެންގެ މި ސައްތައިން ސައްތަ އިސްލާމީ ޤައުމުގައި ދުވަހެއް ދުވަހަކަށް މިދަނީ އިތުރުވަމުން.“ ޑރ ޢަލީ ޒާހިރު ވިދާޅުވިއެވެ. 

ކަން މިހެން ހުރުމުން، މިކަމާމެދު ފުންކޮށް ވިސްނައި، މައްސަލައަކީ އުނގަންނައިދެވޭ ގޮތްތޯ ނުވަތަ އުނގެނެމުގައި ދިމާވާ މައްސަލައެއްތޯ ދެނެގަންނަންޖެހޭ ޙާލަތަށް މިކަންގޮސްފައިވާކަން ޑރ. ޢަލީ ޒާހިރު ފާހަގަކުރެއްވިއެވެ. އަދި މިއަދު މުޖުތަމަޢުން ފެންނަމުންދާ ނޭދެވޭ ސިފަތަކަކީ ތަޢުލީމީ ނިޒާމުގެ ތެރެއިން އެކަމުގެ ޙައްލު ގެނެވެންޖެހޭނެ ކަންތައްތަކެއްކަމަށްވެސް ވިދާޅުވިއެވެ.

މިއާއެކު ޑރ.ޢަލީ ޒާހިރު ވިދާޅުވީ ދަރިވަރުންނަށް އުގަންނައި ދެއްވުމުގައި މާތް ނަބިއްޔާ ޞޢވ ނަމޫނާއަކަށް ބަލަންޖެހޭ ކަމަށެވެ. އެކަލޭގެފާނު މީސްތަކުންނަށް އުގަންނައިދެއްވުމުގައި ގެންގުޅުއްވި ކެތްތެރިކަމާއި، ގާތް ކަމާއި، ވިސްނުން ގެންގުޅެންޖެހޭ ކަމަށެވެ.